Aruna Prashna

तॆलुगु
स्तोत्रनिधि
श्री सूर्य स्तोत्रालु
गमनिक
: ई स्तोत्रमु
(श्लोकालु मात्रमे)
श्री सूर्य स्तोत्रनिधि
” पारायण ग्रंथमुलो कूडा उन्नदि.
(तै.आ.१.०.०)
ॐ भ॒द्रं कर्णे॑भिः शृणु॒याम॑ देवाः |
भ॒द्रं प॑श्येमा॒क्षभि॒र्यज॑त्राः |
स्थि॒रैरङ्गै”स्तुष्टु॒वाग्ंस॑स्त॒नूभि॑: |
व्यशे॑म दे॒वहि॑त॒o यदायु॑: |
स्व॒स्ति न॒ इन्द्रो॑ वृ॒द्धश्र॑वाः |
स्व॒स्ति न॑: पू॒षा वि॒श्ववे॑दाः |
स्व॒स्ति न॒स्तार्क्ष्यो॒ अरि॑ष्टनेमिः |
स्व॒स्ति नो॒ बृह॒स्पति॑र्दधातु ||

ॐ शान्ति॒: शान्ति॒: शान्ति॑: || १-०- ||

ॐ भ॒द्रं कर्णे॑भिः शृणु॒याम॑ देवाः |
भ॒द्रं प॑श्येमा॒क्षभि॒र्यज॑त्राः |
स्थि॒रैरङ्गै”स्तुष्टु॒वाग्ंस॑स्त॒नूभि॑: |
व्यशे॑म दे॒वहि॑त॒o यदायु॑: |
स्व॒स्ति न॒ इन्द्रो॑ वृ॒द्धश्र॑वाः |
स्व॒स्ति न॑: पू॒षा वि॒श्ववे॑दाः |
स्व॒स्ति न॒स्तार्क्ष्यो॒ अरि॑ष्टनेमिः |
स्व॒स्ति नो॒ बृह॒स्पति॑र्दधातु |
आप॑मापाम॒पः सर्वा”: |
अ॒स्माद॒स्मादि॒तोऽमुत॑: || १ || १-१- ||

अ॒ग्निर्वा॒युश्च॒ सूर्य॑श्च |
स॒ह स॑oचरस्क॒रर्द्धि॑या |
वा॒य्वश्वा॑ रश्मि॒पत॑यः |
मरी”च्यात्मानो॒ अद्रु॑हः |
दे॒वीर्भु॑वन॒सूव॑रीः |
पु॒त्र॒व॒त्वाय॑ मे सुत |
महानाम्नीर्म॑हामा॒नाः |
म॒ह॒सो म॑हस॒स्स्व॑: |
दे॒वीः प॑र्जन्य॒सूव॑रीः |
पु॒त्र॒व॒त्वाय॑ मे सुत || २ || १-१- ||

अ॒पाश्न्यु॑ष्णिम॒पा रक्ष॑: |
अ॒पाश्न्यु॑ष्णिम॒पारघम्” |
अपा”घ्रा॒मप॑ चा॒वर्तिम्” |
अप॑दे॒वीरि॒तो हि॑त |
वज्र॑o दे॒वीरजी॑ताग्‍श्च |
भुव॑नं देव॒सूव॑रीः |
आ॒दि॒त्यानदि॑तिं दे॒वीम् |
योनि॑नोर्ध्वमु॒दीष॑त |
शि॒वान॒श्शन्त॑मा भवन्तु |
दि॒व्या आप॒ ओष॑धयः |
सु॒मृ॒डी॒का सर॑स्वति |
मा ते॒ व्यो॑म स॒oदृशि॑ || ३ || १-१- ||

स्मृति॑: प्र॒त्यक्ष॑मैति॒ह्यम्” |
अनु॑मानश्चतुष्ट॒यम् |
ए॒तैरादि॑त्यमण्डलम् |
सर्वै॑रेव॒ विधा”स्यते |
सूर्यो॒ मरी॑चि॒माद॑त्ते |
सर्वस्मा”द्भुव॑नाद॒धि |
तस्याः पाकवि॑शेषे॒ण |
स्मृ॒तं का॑लवि॒शेष॑णम् |
न॒दीव॒ प्रभ॑वात्का॒चित् |
अ॒क्षय्या”त्स्यन्द॒ते य॑था || ४ || १-२- ||

तान्नद्योऽभिस॑माय॒न्ति |
सो॒रुस्सती॑ न नि॒वर्त॑ते |
ए॒वन्ना॒नास॑मुत्था॒नाः |
का॒लास्स॑oवत्स॒रग्ग् श्रि॑ताः |
अणुशश्च म॑हश॒श्च |
सर्वे॑ समव॒यन्त्रि॑तम् |
सतै”स्स॒र्वैस्स॑मावि॒ष्टः |
ऊ॒रुस्स॑न्न नि॒वर्त॑ते |
अधिसंवत्स॑रं वि॒द्यात् |
तदेव॑ लक्ष॒णे || ५ || १-२- ||

अणुभिश्च म॑हद्भि॒श्च |
स॒मारू॑ढः प्र॒दृश्य॑ते |
संवत्सरः प्र॑त्यक्षे॒ण |
ना॒धिस॑त्वः प्र॒दृश्य॑ते |
प॒टरो॑ विक्लि॑धः पि॒ङ्गः |
ए॒तद्व॑रुण॒लक्ष॑णम् |
यत्रैत॑दुप॒दृश्य॑ते |
स॒हस्र॑o तत्र॒ नीय॑ते |
एकग्ंहि शिरो ना॑ना मु॒खे |
कृ॒त्स्नं त॑दृतु॒लक्ष॑णम् || ६ || १-२- ||

उभयतस्सप्ते”न्द्रिया॒णि |
ज॒ल्पित॑o त्वेव॒ दिह्य॑ते |
शुक्लकृष्णे संव॑त्सर॒स्य |
दक्षिणवाम॑योः पा॒र्श्वयोः |
तस्यै॒षा भव॑ति |
शु॒क्रं ते॑ अ॒न्यद्य॑ज॒तं ते॑ अ॒न्यत् |
विषु॑रूपे॒ अह॑नी॒ द्यौरि॑वासि |
विश्वा॒ हि मा॒या अव॑सि स्वधावः |
भ॒द्रा ते॑ पूषन्नि॒ह रा॒तिर॒स्त्विति॑ |
नात्र॒ भुव॑नम् |
न पू॒षा | न प॒शव॑: |
नादित्यस्संवत्सर एव प्रत्यक्षेण प्रियत॑मं वि॒द्यात् |
एतद्वै संवत्सरस्य प्रियत॑मग्ं रू॒पम् |
योऽस्य महानर्थ उत्पत्स्यमा॑नो भ॒वति |
इदं पुण्यं कु॑रुष्वे॒ति |
तमाहर॑णं द॒द्यात् || ७ || १-२- ||

सा॒क॒oजानाग्॑o स॒प्तथ॑माहुरेक॒जम् |
षडु॑द्य॒मा ऋष॑यो देव॒जा इति॑ |
तेषा॑मि॒ष्टानि॒ विहि॑तानि धाम॒शः |
स्था॒त्रे रे॑जन्ते॒ विकृ॑तानि रूप॒शः |
को नु॑ मर्या॒ अमि॑थितः |
सखा॒ सखा॑यमब्रवीत् |
जहा॑को अ॒स्मदी॑षते |
यस्ति॒त्याज॑ सखि॒विद॒ग्॒o सखा॑यम् |
न तस्य॑ वा॒च्यपि॑ भा॒गो अ॑स्ति |
यदीग्॑o शृ॒णोत्य॒लकग्॑o शृणोति || ८ || १-३- ||

न हि प्र॒वेद॑ सुकृ॒तस्य॒ पन्था॒मिति॑ |
ऋ॒तुरृ॑तुना नु॒द्यमा॑नः |
विन॑नादा॒भिधा॑वः |
षष्टिश्च त्रिग्ंश॑का व॒ल्गाः |
शु॒क्लकृ॑ष्णौ च॒ षाष्टि॑कौ |
सा॒रा॒ग॒व॒स्त्रैर्ज॒रद॑क्षः |
व॒स॒न्तो वसु॑भिस्स॒ह |
स॒oव॒त्स॒रस्य॑ सवि॒तुः |
प्रै॒ष॒कृत्प्र॑थ॒मः स्मृ॑तः |
अ॒मूना॒दय॑तेत्य॒न्यान् || ९ || १-३- ||

अ॒मूग्‍श्च॑ परि॒रक्ष॑तः |
ए॒ता वा॒चः प्र॑युज्य॒न्ते |
यत्रैत॑दुप॒दृश्य॑ते |
ए॒तदे॒व वि॑जानी॒यात् |
प्र॒माण॑o काल॒पर्य॑ये |
वि॒शे॒ष॒णं तु॑ वक्ष्या॒मः |
ऋ॒तूना”o तन्नि॒बोध॑त |
शुक्लवासा॑ रुद्र॒गणः |
ग्री॒ष्मेणा॑ऽऽवर्त॒ते स॑ह |
नि॒जह॑न्पृथि॑वीग्ं स॒र्वाम् || १० || १-३- ||

ज्यो॒तिषा”ऽप्रति॒ख्येन॑ सः |
वि॒श्व॒रू॒पाणि॑ वासा॒ग्॒oसि |
आ॒दि॒त्याना”o नि॒बोध॑त |
संवत्सरीण॑o कर्म॒फलम् |
वर्षाभिर्द॑दता॒ग्॒o सह |
अदुःखो॑ दुःखच॑क्षुरि॒व |
तद्मा॑ पीत इव॒ दृश्य॑ते |
शीतेना”व्यथ॑यन्नि॒व |
रु॒रुद॑क्ष इव॒ दृश्य॑ते |
ह्लादयते” ज्वल॑तश्चै॒व |
शा॒म्यत॑श्चास्य॒ चक्षु॑षी |
या वै प्रजा भ्र॑ग्ग्‍श्य॒न्ते |
संवत्सरात्ता भ्र॑ग्ग्‍श्य॒न्ते |
या॒: प्रति॑तिष्ठ॒न्ति |
संवत्सरे ताः प्रति॑तिष्ठ॒न्ति |
व॒र्षाभ्य॑ इत्य॒र्थः || ११ || १-३- ||

अक्षि॑दु॒:खोत्थि॑तस्यै॒व |
वि॒प्रस॑न्ने क॒नीनि॑के |
आङ्क्ते चाद्ग॑णं ना॒स्ति |
ऋ॒भूणा”o तन्नि॒बोध॑त |
क॒न॒का॒भानि॑ वासा॒ग्॒oसि |
अ॒हता॑नि नि॒भोद॑त |
अन्नमश्नीत॑ मृज्मी॒त |
अ॒हं वो॑ जीव॒नप्र॑दः |
ए॒ता वा॒चः प्र॑युज्य॒न्ते |
श॒रद्य॑त्रोप॒दृश्य॑ते || १२ || १-४- ||

अभिधून्वन्तोऽभिघ्न॑न्त इ॒व |
वा॒तव॑न्तो म॒रुद्ग॑णाः |
अमुतो जेतुमिषुमु॑खमि॒व |
सन्नद्धास्सह द॑दृशे॒ ह |
अपध्वस्तैर्वस्तिव॑र्णैरि॒व |
वि॒शि॒खास॑: कप॒र्दिनः |
अक्रुद्धस्य योत्स्य॑मान॒स्य |
क्रु॒द्धस्ये॑व॒ लोहि॑नी |
हेमतश्चक्षु॑षी वि॒द्यात् |
अ॒क्ष्णयो”: क्षिप॒णोरि॑व || १३ || १-४- ||

दुर्भिक्षं देव॑लोके॒षु |
म॒नूना॑मुद॒कं गृ॑हे |
ए॒ता वा॒चः प्र॑वद॒न्तीः |
वै॒द्युतो॑ यान्ति॒ शैशि॑रीः |
ता अ॒ग्निः पव॑माना॒ अन्वै”क्षत |
इ॒ह जी॑वि॒कामप॑रिपश्यन् |
तस्यै॒षा भव॑ति |
इ॒हेहव॑स्स्वत॒पसः |
मरु॑त॒स्सूर्य॑त्वचः |
शर्म॑ स॒प्रथा॒ आवृ॑णे || १४ || १-४- ||

अति॑ता॒म्राणि॑ वासा॒ग्॒oसि |
अ॒ष्टिव॑ज्रिश॒तघ्नि॑ च |
विश्वे देवा विप्र॑हर॒न्ति |
अ॒ग्निजि॑ह्वा अ॒सश्च॑त |
नैव देवो॑ न म॒र्त्यः |
न राजा व॑रुणो॒ विभुः |
नाग्निर्नेन्द्रो न प॑वमा॒नः |
मा॒तृक्क॑च्चन॒ विद्य॑ते |
दि॒व्यस्यैका॒ धनु॑रार्त्निः |
पृ॒थि॒व्यामप॑रा श्रि॒ता || १५ || १-५- ||

तस्येन्द्रो वम्रि॑रूपे॒ण |
ध॒नुर्ज्या॑मच्छि॒नथ्स्व॑यम् |
तदि॑न्द्र॒धनु॑रित्य॒ज्यम् |
अ॒भ्रव॑र्णेषु॒ चक्ष॑ते |
एतदेव शंयोर्बार्ह॑स्पत्य॒स्य |
ए॒तद्रु॑द्रस्य॒ धनुः |
रु॒द्रस्य॑ त्वेव॒ धनु॑रार्त्निः |
शिर॒ उत्पि॑पेष |
स प्र॑व॒र्ग्यो॑ऽभवत् |
तस्मा॒द्यस्सप्र॑व॒र्ग्येण॑ य॒ज्ञेन॒ यज॑ते |
रु॒द्रस्य॒ स शिर॒: प्रति॑दधाति |
नैनग्॑o रु॒द्र आरु॑को भवति |
य ए॒वं वेद॑ || १६ || १-५- ||

अ॒त्यू॒र्ध्वा॒क्षोऽति॑रश्चात् |
शिशि॑रः प्र॒दृश्य॑ते |
नैव रूपं न॑ वासा॒ग्॒oसि |
न चक्षु॑: प्रति॒दृश्य॑ते |
अ॒न्योन्य॒o तु न॑ हिग्ग् स्रा॒तः |
स॒तस्त॑द्देव॒लक्ष॑णम् |
लोहितोऽक्ष्णि शा॑रशी॒र्ष्णिः |
सू॒र्यस्यो॑दय॒नं प्र॑ति |
त्वं करोषि॑न्यञ्ज॒लिकाम् |
त्व॒o करो॑षि नि॒जानु॑काम् || १७ || १-६- ||

निजानुका मे”न्यञ्ज॒लिका |
अमी वाचमुपास॑तामि॒ति |
तस्मै सर्व ऋतवो॑ नम॒न्ते |
मर्यादाकरत्वात्प्र॑पुरो॒धाम् |
ब्राह्मण॑ आप्नो॒ति |
य ए॑वं वे॒द |
स खलु संवत्सर एतैस्सेनानी॑भिस्स॒ह |
इन्द्राय सर्वान्कामान॑भिव॒हति |
स द्र॒प्सः |
तस्यै॒षा भव॑ति || १८ || १-६- ||

अव॑द्र॒प्सो अग्॑oशु॒मती॑मतिष्ठत् |
इ॒या॒नः कृ॒ष्णो द॒शभि॑: स॒हस्रै”: |
आव॒र्तमिन्द्र॒: शच्या॒ धम॑न्तम् |
उपस्नुहि तं नृमणामथ॑द्रामि॒ति |
एतयैवेन्द्रः सलावृ॑क्या स॒ह |
असुरान्प॑रिवृ॒श्चति |
पृथि॑व्य॒ग्॒oशुम॑ती |
ताम॒न्वव॑स्थितः संवत्स॒रो दि॒वं च॑ |
नैवं विदुषाऽऽचार्या”न्तेवा॒सिनौ |
अन्योन्यस्मै” द्रुह्या॒ताम् |
यो द्रु॒ह्यति |
भ्रश्यते स्व॑र्गाल्लो॒कात् |
इत्यृतुम॑ण्डला॒नि |
सूर्यमण्डला”न्याख्या॒यिकाः |
अत ऊर्ध्वग्ं स॑निर्व॒चनाः || १९ || १-६- ||

आरोगो भ्राजः पटर॑: पत॒ङ्गः |
स्वर्णरो ज्योतिषीमान्॑ विभा॒सः |
ते अस्मै सर्वे दिवमा॑तप॒न्ति |
ऊर्जं दुहाना अनपस्फुर॑न्त इ॒ति |
कश्य॑पोऽष्ट॒मः |
स महामेरुं न॑ जहा॒ति |
तस्यै॒षा भव॑ति |
यत्ते॒ शिल्प॑o कश्यप रोच॒नाव॑त् |
इ॒न्द्रि॒याव॑त्पुष्क॒लं चि॒त्रभा॑नु |
यस्मि॒न्त्सूर्या॒ अर्पि॑तास्स॒प्त सा॒कम् || २० || १-७- ||

तस्मिन्राजानमधिविश्रये॑ममि॒ति |
ते अस्मै सर्वे कश्यपाज्ज्योति॑र्लभ॒न्ते |
तान्सोमः कश्यपादधि॑निर्द्ध॒मति |
भ्रस्ताकर्मकृ॑दिवै॒वम् |
प्राणो जीवानीन्द्रिय॑जीवा॒नि |
सप्त शीर्ष॑ण्याः प्रा॒णाः |
सूर्या इ॑त्याचा॒र्याः |
अपश्यमहमेतान्त्सप्त सू”र्यानि॒ति |
पञ्चकर्णो॑ वात्स्या॒यनः |
सप्तकर्ण॑श्च प्ला॒क्षिः || २१ || १-७- || [१६*३३]

आनुश्रविक एव नौ कश्य॑प इ॒ति |
उभौ॑ वेद॒यिते |
न हि शेकुमिव महामे॑रुं ग॒न्तुम् |
अपश्यमहमेतत्सूर्यमण्डलं परिव॑र्तमा॒नम् |
गा॒र्ग्यः प्रा॑णत्रा॒तः |
गच्छन्त म॑हामे॒रुम् |
एक॑o चाज॒हतम् |
भ्राजपटरपत॑ङ्गा नि॒हने |
तिष्ठन्ना॑तप॒न्ति |
तस्मा॑दि॒ह तप्त्रि॑तपाः || २२ || १-७- ||

अ॒मुत्रे॒तरे |
तस्मा॑दि॒हातप्त्रि॑तपाः |
तेषा॑मेषा॒ भव॑ति |
स॒प्त सूर्या॒ दिव॒मनु॒प्रवि॑ष्टाः |
तान॒न्वेति॑ प॒थिभि॑र्दक्षि॒णावान्॑ |
ते अस्मै सर्वे घृतमा॑तप॒न्ति |
ऊर्जं दुहाना अनपस्फुर॑न्त इ॒ति |
सप्तर्त्विजस्सूर्या इ॑त्याचा॒र्याः |
तेषा॑मेषा॒ भव॑ति |
स॒प्त दिशो॒ नाना॑सूर्याः || २३ || १-७- ||

स॒प्त होता॑र ऋ॒त्विज॑: |
देवा आदित्या॑ ये स॒प्त |
तेभिस्सोमाभीरक्ष॑ण इ॒ति |
तद॑प्याम्ना॒यः |
दिग्भ्राजः ऋतू”न् करो॒ति |
एत॑यैवा॒वृता सहस्रसूर्यताया इति वै॑शंपा॒यनः |
तस्यै॒षा भव॑ति |
यद्द्याव॑ इन्द्र ते श॒तग्ंश॒तं भूमी”: |
उ॒त स्युः |
नत्वा॑ वज्रिन्स॒हस्र॒ग्॒o सूर्या”: || २४ || १-७- ||

अनुनजातमष्ट रोद॑सी इ॒ति |
नानालिङ्गत्वादृतूनां नाना॑सूर्य॒त्वम् |
अष्टौ तु व्यवसि॑ता इ॒ति |
सूर्यमण्डलान्यष्टा॑त ऊ॒र्ध्वम् |
तेषा॑मेषा॒ भव॑ति |
चि॒त्रं दे॒वाना॒मुद॑गा॒दनी॑कम् |
चक्षु॑र्मि॒त्रस्य॒ वरु॑णस्या॒ग्नेः |
आप्रा॒ द्यावा॑पृथि॒वी अ॒न्तरि॑क्षम् |
सूर्य आत्मा जगतस्तस्थु॑षश्चे॒ति || २५ || १-७- ||

क्वेदमभ्र॑न्निवि॒शते |
क्वायग्॑o संवत्स॒रो मि॑थः |
क्वाहः क्वेयन्दे॑व रा॒त्री |
क्व मासा ऋ॑तव॒: श्रिताः |
अर्धमासा॑ मुहू॒र्ताः |
निमेषास्तु॑टिभि॒स्सह |
क्वेमा आपो नि॑विश॒न्ते |
य॒दीतो॑ यान्ति॒ संप्र॑ति |
काला अप्सु नि॑विश॒न्ते |
आ॒पस्सूर्ये॑ स॒माहि॑ताः || २६ || १-८- ||

अभ्रा”ण्य॒पः प्र॑पद्य॒न्ते |
वि॒द्युत्सूर्ये॑ स॒माहि॑ता |
अनवर्णे इ॑मे भू॒मी |
इ॒यं चा॑सौ च॒ रोद॑सी |
किग्ग्‍स्विदत्रान्त॑रा भू॒तम् |
ये॒नेमे वि॑धृते॒ उभे |
वि॒ष्णुना॑ विधृ॑ते भू॒मी |
इ॒ति व॑त्सस्य॒ वेद॑ना |
इरा॑वती धेनु॒मती॒ हि भू॒तम् |
सू॒य॒व॒सिनी॒ मनु॑षे दश॒स्ये” || २७ || १-८- ||

व्य॑ष्टभ्ना॒द्रोद॑सी॒ विष्ण॑वे॒ते |
दा॒धर्थ॑ पृथि॒वीम॒भितो॑ म॒यूखै”: |
किं तद्विष्णोर्ब॑लमा॒हुः |
का॒ दीप्ति॑: किं प॒राय॑णम् |
एको॑ य॒द्धार॑यद्दे॒वः |
रे॒जती॑ रोद॒सी उ॑भे |
वाताद्विष्णोर्ब॑लमा॒हुः |
अ॒क्षरा”द्दीप्ति॒रुच्य॑ते |
त्रि॒पदा॒द्धार॑यद्दे॒वः |
यद्विष्णो॑रेक॒मुत्त॑मम् || २८ || १-८- ||

अ॒ग्नयो॑ वाय॑वश्चै॒व |
ए॒तद॑स्य प॒राय॑णम् |
पृच्छामि त्वा प॑रं मृ॒त्युम् |
अ॒वम॑o मध्य॒मञ्च॑तुम् |
लो॒कञ्च॒ पुण्य॑पापा॒नाम् |
ए॒तत्पृ॑च्छामि॒ संप्र॑ति |
अ॒मुमा॑हुः प॑रं मृ॒त्युम् |
प॒वमा॑नं तु॒ मध्य॑मम् |
अ॒ग्निरे॒वाव॑मो मृ॒त्युः |
च॒न्द्रमा”श्चतु॒रुच्य॑ते || २९ || १-८- ||

अ॒ना॒भो॒गाः प॑रं मृ॒त्युम् |
पा॒पास्स॑oयन्ति॒ सर्व॑दा |
आभोगास्त्वेव॑ संय॒न्ति |
य॒त्र पु॑ण्यकृ॒तो ज॑नाः |
ततो॑ म॒ध्यम॑माय॒न्ति |
च॒तुम॑ग्निं च॒ संप्र॑ति |
पृच्छामि त्वा॑ पाप॒कृतः |
य॒त्र या॑तय॒ते य॑मः |
त्वं नस्तद्ब्रह्म॑न् प्रबू॒हि |
य॒दि वे”त्थाऽस॒तो गृ॑हान् || ३० || १-८- ||

क॒श्यपा॑दुदि॑तास्सू॒र्याः |
पा॒पान्नि॑र्घ्नन्ति॒ सर्व॑दा |
रोदस्योरन्त॑र्देशे॒षु |
तत्र न्यस्यन्ते॑ वास॒वैः |
तेऽशरीराः प्र॑पद्य॒न्ते |
य॒थाऽपु॑ण्यस्य॒ कर्म॑णः |
अपा”ण्य॒पाद॑केशा॒सः |
त॒त्र ते॑ऽयोनि॒जा ज॑नाः |
मृत्वा पुनर्मृत्युमा॑पद्य॒न्ते |
अ॒द्यमा॑नास्स्व॒कर्म॑भिः || ३१ || १-८- ||

आशातिकाः क्रिम॑य इ॒व |
ततः पूयन्ते॑ वास॒वैः |
अपै॑तं मृ॒त्युं ज॑यति |
य ए॒वं वेद॑ |
स खल्वैव॑o विद्ब्रा॒ह्मणः |
दी॒र्घश्रु॑त्तमो॒ भव॑ति |
कश्य॑प॒स्याति॑थि॒स्सिद्धग॑मन॒स्सिद्धाग॑मनः |
तस्यै॒षा भव॑ति |
आ यस्मि”न्थ्स॒प्त वा॑स॒वाः |
रोह॑न्ति पू॒र्व्या॑ रुह॑: || ३२ || १-८- ||

ऋषि॑र्ह दीर्घ॒श्रुत्त॑मः |
इन्द्रस्य घर्मो अति॑थिरि॒ति |
कश्यपः पश्य॑को भ॒वति |
यत्सर्वं परिपश्यती॑ति सौ॒क्ष्म्यात् |
अथाग्ने॑रष्टपु॑रुष॒स्य |
तस्यै॒षा भव॑ति |
अग्ने॒ नय॑ सु॒पथा॑ रा॒ये अ॒स्मान् |
विश्वा॑नि देव व॒युना॑नि वि॒द्वान् |
यु॒यो॒ध्य॑स्मज्जु॑हुरा॒णमेन॑: |
भूयिष्ठान्ते नम उक्तिं वि॑धेमे॒ति || ३३ || १-८- ||

अग्निश्च जात॑वेदा॒श्च |
सहोजा अ॑जिरा॒प्रभुः |
वैश्वानरो न॑र्यापा॒श्च |
प॒ङ्क्तिरा॑धाश्च॒ सप्त॑मः
विसर्पेवाऽष्ट॑मोऽग्नी॒नाम् |
एतेऽष्टौ वसवः क्षि॑ता इ॒ति |
यथर्त्वेवाग्नेरर्चिर्वर्ण॑विशे॒षाः |
नीलार्चिश्च पीतका”र्चिश्चे॒ति |
अथ वायोरेकादशपुरुषस्यैकादश॑स्त्रीक॒स्य |
प्रभ्राजमाना व्य॑वदा॒ताः || ३४ || १-९- ||

याश्च वासु॑किवै॒द्युताः |
रजताः परु॑षाः श्या॒माः |
कपिला अ॑तिलो॒हिताः |
ऊर्ध्वा अवप॑तन्ता॒श्च |
वैद्युत इ॑त्येका॒दश |
नैनं वैद्युतो॑ हिन॒स्ति |
य ए॑वं वे॒द |
स होवाच व्यासः पा॑राश॒र्यः |
विद्युद्वधमेवाहं मृत्युमै”च्छमि॒ति |
न त्वका॑मग्ं ह॒न्ति || ३५ || १-९- ||

य ए॑वं वे॒द |
अथ ग॑न्धर्व॒गणाः |
स्वान॒भ्राट् |
अङ्घा॑रि॒र्बंभा॑रिः |
हस्त॒स्सुह॑स्तः |
कृशा॑नुर्वि॒श्वाव॑सुः |
मूर्धन्वान्थ्सू”र्यव॒र्चाः |
कृतिरित्येकादश ग॑न्धर्व॒गणाः |
देवाश्च म॑हादे॒वाः |
रश्मयश्च देवा॑ गर॒गिरः || ३६ || १-९- ||

नैनं गरो॑ हिन॒स्ति |
य ए॑वं वे॒द |
गौ॒रीमि॑माय सलि॒लानि॒ तक्ष॑ती |
एक॑पदी द्वि॒पदी॒ सा चतु॑ष्पदी |
अ॒ष्टापदी॒ नव॑पदी बभू॒वुषी” |
सहस्राक्षरा परमे व्यो॑मन्नि॒ति |
वाचो॑ विशे॒षणम् |
अथ निगद॑व्याख्या॒ताः |
ताननुक्र॑मिष्या॒मः |
व॒राहव॑स्सवत॒पसः || ३७ || १-९- ||

वि॒द्युन्म॑हसो॒ धूप॑यः |
श्वापयो गृहमेधा”श्चेत्ये॒ते |
ये॒ चेमेऽशि॑मिवि॒द्विषः |
पर्जन्यास्सप्त पृथिवीमभिव॑र्ष॒न्ति |
वृष्टि॑भिरि॒ति |
एतयैव विभक्तिवि॑परी॒ताः |
स॒प्तभि॒र्वातै॑रुदी॒रिताः |
अमूँल्लोकानभिव॑र्ष॒न्ति |
तेषा॑मेषा॒ भव॑ति |
स॒मा॒नमे॒तदुद॑कम् || ३८ || १-९- ||

उ॒च्चैत्य॑व॒चाह॑भिः |
भूमि॑o प॒र्जन्या॒ जिन्व॑न्ति |
दिवं जिन्वन्त्यग्न॑य इ॒ति |
यदक्ष॑रं भू॒तकृ॑तम् |
विश्वे॑ देवा उ॒पास॑ते |
म॒हर्षि॑मस्य गो॒प्तारम्” |
ज॒मद॑ग्नि॒मकु॑र्वत |
ज॒मद॑ग्नि॒राप्या॑यते |
छन्दो॑भिश्चतुरुत्त॒रैः |
राज्ञ॒स्सोम॑स्य तृ॒प्तास॑: || ३९ || १-९- ||

ब्रह्म॑णा वी॒र्या॑वता |
शि॒वा न॑: प्र॒दिशो॒ दिश॑: |
तच्छ॒oयोरावृ॑णीमहे |
गा॒तुं य॒ज्ञाय॑ |
गा॒तुं य॒ज्ञप॑तये |
दैवी”स्व॒स्तिर॑स्तु नः |
स्व॒स्तिर्मानु॑षेभ्यः |
ऊ॒र्ध्वं जि॑गातु भेष॒जम् |
शन्नो॑ अस्तु द्वि॒पदे” |
शम् चतु॑ष्पदे |
सोमपा ३ असोमपा ३ इति निगद॑व्याख्या॒ताः || ४० || १-९- ||

स॒ह॒स्र॒वृदि॑यं भू॒मिः |
प॒रं व्यो॑म स॒हस्र॑वृत् |
अ॒श्विना॑ भुज्यू॑ नास॒त्या |
वि॒श्वस्य॑ जग॒तस्प॑ती |
जाया भूमिः प॑तिर्व्यो॒म |
मि॒थुन॑न्ता अ॒तुर्य॑थुः |
पुत्रो बृहस्प॑ती रु॒द्रः |
स॒रमा॑ इति॑ स्त्रीपु॒मम् |
शु॒क्रं वा॑म॒न्यद्य॑ज॒तं वा॑म॒न्यत् |
विषु॑रूपे॒ अह॑नी॒ द्यौरि॑व स्थः || ४१ || १-१०- ||

विश्वा॒ हि मा॒या अव॑थः स्वधावन्तौ |
भ॒द्रा वा”o पूषणावि॒ह रा॒तिर॑स्तु |
वासा”त्यौ चि॒त्रौ जग॑तो नि॒धानौ” |
द्यावा॑भूमी च॒रथ॑: स॒ग्॒o सखा॑यौ |
ताव॒श्विना॑ रा॒सभा”श्वा॒ हव॑o मे |
शु॒भ॒स्प॒ती॒ आ॒गतग्॑o सू॒र्यया॑ स॒ह |
त्युग्रो॑ह भु॒ज्युम॑श्विनोदमे॒घे |
र॒यिन्न कश्चि॑न्ममृ॒वां २ अवा॑हाः |
तमू॑हथुर्नौ॒भिरा”त्म॒न्वती॑भिः |
अ॒न्त॒रि॒क्ष॒प्रुड्भि॒रपो॑दकाभिः || ४२ || १-१०- ||

ति॒स्रः क्षप॒स्त्रिरहा॑ऽति॒व्रज॑द्भिः |
नास॑त्या भु॒ज्युमू॑हथुः पत॒ङ्गैः |
स॒मु॒द्रस्य॒ धन्व॑न्ना॒र्द्रस्य॑ पा॒रे |
त्रि॒भीरथै”श्श॒तप॑द्भि॒: षड॑श्वै॒: |
स॒वि॒तार॒o वित॑न्वन्तम् |
अनु॑बध्नाति शाम्ब॒रः |
आपपूरुषम्ब॑रश्चै॒व |
स॒विता॑ऽरेप॒सो॑ भवत् |
त्यग्ं सुतृप्तं वि॑दित्वै॒व |
ब॒हुसो॑म गि॒रं व॑शी || ४३ || १-१०- ||

अन्वेति तुग्रो व॑क्रिया॒न्तम् |
आयसूयान्त्सोम॑तृप्सु॒षु |
स संग्रामस्तमो”द्योऽत्यो॒तः |
वाचो गाः पि॑पाति॒ तत् |
स तद्गोभिस्स्त्वा”ऽत्येत्य॒न्ये |
र॒क्षसा॑ऽनन्वि॒ताश्च॑ ये |
अ॒न्वेति॒ परि॑वृत्या॒ऽस्तः |
ए॒वमे॒तौ स्थो॑ अश्विना |
ते ए॒ते द्यु॑:पृथि॒व्योः |
अह॑रह॒र्गर्भ॑न्दधाथे || ४४ || १-१०- ||

तयो॑रे॒तौ व॒त्साव॑होरा॒त्रे |
पृ॒थि॒व्या अह॑: |
दि॒वो रात्रि॑: |
ता अवि॑सृष्ठौ |
दम्प॑ती ए॒व भ॑वतः |
तयो॑रे॒तौ व॒त्सौ |
अ॒ग्निश्चा॑दित्य॒श्च॑ |
रा॒त्रेर्व॒त्सः |
श्वे॒त आ॑दि॒त्यः |
अह्नो॒ऽग्निः || ४५ || १-१०- ||

ता॒म्रो अ॑रु॒णः |
ता अवि॑सृष्टौ |
दम्प॑ती ए॒व भ॑वतः |
तयो॑रे॒तौ व॒त्सौ |
वृ॒त्रश्च॑ वैद्यु॒तश्च॑ |
अ॒ग्नेर्वृ॒त्रः |
वै॒द्युत॑ आदि॒त्यस्य॑ |
ता अवि॑सृष्टौ |
दम्प॑ती ए॒व भ॑वतः |
तयो॑रे॒तौ व॒त्सौ || ४६ || १-१०- ||

उ॒ष्मा च॑ नीहा॒रश्च॑ |
वृ॒त्रस्यो॒ष्मा |
वै॒द्यु॒तस्य॑ नीहा॒रः |
तौ तावे॒व प्रति॑पद्येते |
सेयग्ं रात्री॑ ग॒र्भिणी॑ पु॒त्रेण॒ संव॑सति |
तस्या॒ वा ए॒तदु॒ल्बणम्” |
यद्रात्रौ॑ र॒श्मय॑: |
यथा॒ गोर्ग॒र्भिण्या॑ उ॒ल्बणम्” |
ए॒वमे॒तस्या॑ उ॒ल्बणम्” |
प्रजयिष्णुः प्रजया च पशुभि॑श्च भ॒वति |
य ए॑वं वे॒द |
एतमुद्यन्तमपिय॑न्तं चे॒ति |
आदित्यः पुण्य॑स्य व॒त्सः |
अथ पवि॑त्राङ्गि॒रसः || ४७ || १-१०- ||

प॒वित्र॑वन्त॒: परि॒वाज॒मास॑ते |
पि॒तैषा”o प्र॒त्नो अ॒भिर॑क्षति व्र॒तम् |
म॒हस्स॑मुद्रं वरु॑णस्ति॒रोद॑धे |
धीरा॑ इच्छेकु॒र्धरु॑णेष्वा॒रभम्” |
प॒वि॑त्रं ते॒ वित॑त॒o ब्रह्म॑ण॒स्पते” |
प्रभु॒र्गात्रा॑णि॒ पर्ये॑षि वि॒श्वत॑: |
अत॑प्ततनू॒र्न तदा॒मो अ॑श्नुते |
शृ॒तास॒ इद्वह॑न्त॒स्तत्समा॑शत |
ब्र॒ह्मा दे॒वाना”म् |
अस॑तस्स॒द्ये तत॑क्षुः || ४८ || १-११- ||

ऋष॑यस्स॒प्तात्रि॑श्च॒ यत् |
सर्वेऽत्रयो अ॑गस्त्य॒श्च |
नक्ष॑त्रै॒श्शंकृ॑तोऽवसन् |
अथ॑ सवितु॒: श्यावाश्व॒स्याऽवर्ति॑कामस्य |
अ॒मी य ऋक्षा॒ निहि॑तास उ॒च्चा |
नक्त॒o ददृ॑श्रे॒ कुहा॑चि॒द्दिवे॑युः |
अद॑ब्धानि॒ वरु॑णस्य व्र॒तानि॑ |
वि॒चा॒कश॑च्च॒न्द्रमा॒ नक्ष॑त्रमेति |
तत्स॑वि॒तुर्वरे”ण्यम् |
भर्गो॑ दे॒वस्य॑ धीमहि || ४९ || १-११- ||

धियो॒ यो न॑: प्रचो॒दया”त् |
तत्स॑वि॒तुर्वृ॑णीमहे |
व॒यन्दे॒वस्य॒ भोज॑नम् |
श्रेष्ठग्॑oसर्व॒धात॑मम् |
तुर॒o भग॑स्य धीमहि |
अपा॑गूहत सविता॒ तृभीन्॑ |
सर्वा”न्दि॒वो अन्ध॑सः |
नक्त॒न्यान्य॑भवन्दृ॒शे |
अस्थ्य॒स्थ्ना संभ॑विष्यामः |
नाम॒ नामै॒व ना॒म मे” || ५० || १-११- ||

नपुग्‍ंस॑क॒o पुमा॒ग्॒‍ंस्त्र्य॑स्मि |
स्थाव॑रोऽस्म्यथ॒ जङ्ग॑मः |
य॒जेऽयक्षि॒ यष्टा॒हे च॑ |
मया॑ भू॒तान्य॑यक्षत |
प॒शवो॑ मम॑ भूता॒नि |
अनूबन्ध्योऽस्म्य॑हं वि॒भुः |
स्त्रिय॑स्स॒तीः |
ता उ॑ मे पु॒ग्॒‍ंस आ॑हुः |
पश्य॑दक्ष॒ण्वान्नविचे॑तद॒न्धः |
क॒विर्यः पु॒त्रस्स इ॒मा चि॑केत || ५१ || १-११- ||

यस्ता वि॑जा॒नाथ्स॑वि॒तुः पि॒ता स॑त् |
अ॒न्धो मणिम॑विन्दत् |
तम॑नङ्गुलि॒राव॑यत् |
अ॒ग्री॒वः प्रत्य॑मुञ्चत् |
तमजि॑ह्वा अ॒सश्च॑त |
ऊर्ध्वमूलम॑वाक्छा॒खम् |
वृ॒क्षं यो॑ वेद॒ सम्प्र॑ति |
न स जातु जन॑: श्रद्द॒ध्यात् |
मृ॒त्युर्मा॑ मार॒यादि॑तिः |
हसितग्‍ं रुदि॑तङ्गी॒तम् || ५२ || १-११- ||

वीणा॑पणव॒लासि॑तम् |
मृ॒तञ्जी॒वं च॑ यत्कि॒oचित् |
अ॒ङ्गानि॑ स्नेव॒ विद्धि॑ तत् |
अतृ॑ष्य॒ग्ग्॒स्तृष्य॑ ध्यायत् |
अ॒स्माज्जा॒ता मे॑ मिथू॒ चरन्॑ |
पुत्रो निरृत्या॑ वैदे॒हः |
अ॒चेता॑ यश्च॒ चेत॑नः |
स॒ तं मणिम॑विन्दत् |
सो॑ऽनङ्गुलि॒राव॑यत् |
सो॒ऽग्री॒वः प्रत्य॑मुञ्चत् || ५३ || १-११- ||

सोऽजि॑ह्वो अ॒सश्च॑त |
नैतमृषिं विदित्वा नग॑रं प्र॒विशेत् |
य॑दि प्र॒विशेत् |
मि॒थौ चरि॑त्वा प्र॒विशेत् |
तथ्सम्भव॑स्य व्र॒तम् |
आ॒तम॑ग्ने र॒थन्ति॑ष्ठ |
एका”श्वमेक॒योज॑नम् |
एकचक्र॑मेक॒धुरम् |
वा॒तध्रा॑जिग॒तिं वि॑भो |
न॒ रि॒ष्यति॑ न व्य॒थते || ५४ || १-११- ||

ना॒स्याक्षो॑ यातु॒ सज्ज॑ति |
यच्छ्वेता”न्रोहि॑ताग्‍ंश्चा॒ग्नेः |
र॒थे यु॑क्त्वाऽधि॒तिष्ठ॑ति |
एकया च दशभिश्च॑ स्वभू॒ते |
द्वाभ्यामिष्टये विग्॑‍ंशत्या॒ च |
तिसृभिश्च वहसे त्रिग्॑‍ंशता॒ च |
नियुद्भिर्वायविहिता॑ विमु॒ञ्च || ५५ || १-११- ||

आत॑नुष्व॒ प्रत॑नुष्व |
उ॒द्धमाऽऽध॑म॒ सन्ध॑म |
आदित्ये चन्द्र॑वर्णा॒नाम् |
गर्भ॒माधे॑हि॒ यः पुमान्॑ |
इ॒तस्सि॒क्तग्‍ं सूर्य॑गतम् |
च॒न्द्रम॑से॒ रस॑ङ्कृधि |
वारादञ्जन॑याग्रे॒ऽग्निम् |
य एको॑ रुद्र॒ उच्य॑ते |
अ॒स॒oख्या॒तास्स॑हस्रा॒णि |
स्म॒र्यते॑ न च॒ दृश्य॑ते || ५६ || १-१२- ||

ए॒वमे॒तन्नि॑बोधत |
आम॒न्द्रैरि॑न्द्र॒ हरि॑भिः |
या॒हि म॒यूर॑रोमभिः |
मा त्वा केचिन्नियेमुरि॑न्न पा॒शिनः |
द॒ध॒न्वेव॒ ता इ॑हि |
मा म॒न्द्रैरि॑न्द्र॒ हरि॑भिः |
या॒मि म॒यूर॑रोमभिः |
मा मा केचिन्न्येमुरि॑न्न पा॒शिनः |
नि॒ध॒न्वेव॒ तां २ इ॑मि |
अणुभिश्च म॑हद्भि॒श्च || ५७ || १-१२- ||

नि॒घृष्वै॑रस॒मायु॑तैः |
कालैर्हरित्व॑माप॒न्नैः |
इन्द्राया॑हि स॒हस्र॑युक् |
अ॒ग्निर्वि॒भ्राष्टि॑वसनः |
वा॒युश्श्वेत॑सिकद्रु॒कः |
स॒oव॒थ्स॒रो वि॑षू॒वर्णै॑: |
नित्या॒स्तेऽनुच॑रास्त॒व |
सुब्रह्मण्योग्‍ं सुब्रह्मण्योग्‍ं सु॑ब्रह्म॒ण्योम् |
इन्द्रागच्छ हरिव आगच्छ मे॑धाति॒थेः |
मेष वृषणश्व॑स्य मे॒ने || ५८ || १-१२- ||

गौरावस्कन्दिन्नहल्या॑यै जा॒र |
कौशिकब्राह्मण गौतम॑ब्रुवा॒ण |
अ॒रु॒णाश्वा॑ इ॒हाग॑ताः |
वस॑वः पृथिवि॒क्षित॑: |
अ॒ष्टौ दि॒ग्वास॑सो॒ऽग्नय॑: |
अग्निश्च जातवेदा”श्चेत्ये॒ते |
ताम्राश्वा”स्ताम्र॒रथाः |
ताम्रवर्णा”स्तथा॒ऽसिताः |
दण्डहस्ता”: खाद॒ग्दतः |
इतो रुद्रा”: परा॒ङ्गताः || ५९ || १-१२- ||

उक्तग्ग्‍ स्थानं प्रमाणञ्च॑ पुर॒ इत |
बृह॒स्पति॑श्च सवि॒ता च॑ |
वि॒श्वरू॑पैरि॒हाग॑ताम् |
रथे॑नोदक॒वर्त्म॑ना |
अ॒प्सुषा॑ इति॒ तद्द्व॑योः |
उक्तो वेषो॑ वासा॒ग्॒‍ंसि च |
कालावयवानामित॑: प्रती॒च्या |
वासात्या॑ इत्य॒श्विनोः |
कोऽन्तरिक्षे शब्दङ्क॑रोती॒ति |
वासिष्ठौ रौहिणो मीमाग्॑‍ंसाञ्च॒क्रे |
तस्यै॒षा भव॑ति |
वा॒श्रेव॑ वि॒द्युदिति॑ |
ब्रह्म॑ण उ॒दर॑णमसि |
ब्रह्म॑ण उदी॒रण॑मसि |
ब्रह्म॑ण आ॒स्तर॑णमसि |
ब्रह्म॑ण उप॒स्तर॑णमसि || ६० || १-१२- ||

अ॒ष्टयो॑नीम॒ष्टपु॑त्राम् |
अ॒ष्टप॑त्नीमि॒मां मही”म् |
अ॒हं वेद॒ न मे॑ मृत्युः |
नचामृ॑त्युर॒घाऽह॑रत् |
अ॒ष्टयो”न्य॒ष्टपु॑त्रम् |
अ॒ष्टप॑दि॒दम॒न्तरि॑क्षम् |
अ॒हं वेद॒ न मे॑ मृत्युः |
नचामृ॑त्युर॒घाऽह॑रत् |
अ॒ष्टयो॑नीम॒ष्टपु॑त्राम् |
अ॒ष्टप॑त्नीम॒मून्दिवम्” || ६१ || १-१३- ||

अ॒हं वेद॒ न मे॑ मृत्युः |
नचामृ॑त्युर॒घाऽऽह॑रत् |
सु॒त्रामा॑णं म॒हीमू॒षु |
अदि॑ति॒र्द्यौरदि॑तिर॒न्तरि॑क्षम् |
अदि॑तिर्मा॒ता स पि॒ता स पु॒त्रः |
विश्वे॑ दे॒वा अदि॑ति॒: पञ्च॒जना”: |
अदि॑तिर्जा॒तमदि॑ति॒र्जनि॑त्वम् |
अ॒ष्टौ पु॒त्रासो॒ अदि॑तेः |
ये जा॒तास्त॒न्व॑: परि॑ |
दे॒वां २ उप॑प्रैत्स॒प्तभि॑: || ६२ || १-१३- ||

प॒रा॒ मा॒र्ता॒ण्डमास्य॑त् |
स॒प्तभि॑: पु॒त्रैरदि॑तिः |
उप॒प्रैत्पू॒र्व्य॑o युगम्” |
प्र॒जायै॑ मृ॒त्यवे त॑त् |
प॒रा॒ मा॒र्ता॒ण्डमाभ॑र॒दिति॑ |
ताननुक्र॑मिष्या॒मः |
मि॒त्रश्च॒ वरु॑णश्च |
धा॒ता चा”र्या॒मा च॑ |
अग्‍ंश॑श्च॒ भग॑श्च |
इन्द्रश्च विवस्वाग्॑‍ंश्चेत्ये॒ते |
हि॒र॒ण्य॒ग॒र्भो ह॒ग्॒‍ंसश्शु॑चि॒षत् |
ब्रह्म॑जज्ञा॒नम् तदित्प॒दमिति॑ |
ग॒र्भः प्रा॑जाप॒त्यः |
अथ॒ पुरु॑षः स॒प्तपुरु॑षः || ६३ || १-१३- ||

योऽसौ॑ त॒पन्नु॒देति॑ |
स सर्वे॑षां भू॒ताना”o प्रा॒णाना॒दायो॒देति॑ |
मा मे” प्र॒जया॒ मा प॑शू॒नाम् |
मा मम॑ प्रा॒णाना॒दायोद॑गाः |
अ॒सौ यो”ऽस्त॒मेति॑ |
स सर्वे॑षां भू॒ताना”o प्रा॒णाना॒दाया॒स्तमेति॑ |
मा मे” प्र॒जया॒ मा प॑शू॒नाम् |
मा मम॑ प्रा॒णाना॒दायाऽस्त॑ङ्गाः |
अ॒सौ य आ॒पूर्य॑ति |
स सर्वे॑षां भू॒ताना”o प्रा॒णैरा॒पूर्य॑ति || ६४ || १-१४- ||

मा मे” प्र॒जया॒ मा प॑शू॒नाम् |
मा मम॑ प्रा॒णैरा॒पूरि॑ष्ठाः |
अ॒सौ यो॑ऽप॒क्षीय॑ति |
स सर्वे॑षां भू॒ताना”o प्रा॒णैरप॑क्षीयति |
मा मे” प्र॒जया॒ मा प॑शू॒नाम् |
मा मम॑ प्रा॒णैरप॑क्षेष्ठाः |
अ॒मूनि॒ नक्ष॑त्राणि |
सर्वे॑षां भू॒ताना”o प्रा॒णैरप॑प्रसर्पन्ति॒ चोथ्स॑र्पन्ति च |
मा मे” प्र॒जया॒ मा प॑शू॒नाम् |
मा मम॑ प्रा॒णैरप॑प्रसृपत॒ मोथ्सृ॑पत || ६५ || १-१४- ||

इ॒मे मासा”श्चार्धमा॒साश्च॑ |
सर्वे॑षां भू॒ताना”o प्रा॒णैरप॑प्रसर्पन्ति॒ चोथ्स॑र्पन्ति च |
मा मे” प्र॒जया॒ मा प॑शू॒नाम् |
मा मम॑ प्रा॒णैरप॑प्रसृपत॒ मोथ्सृ॑पत |
इ॒म ऋ॒तव॑: |
सर्वे॑षां भू॒ताना”o प्रा॒णैरप॑प्रसर्पन्ति॒ चोथ्स॑र्पन्ति च |
मा मे” प्र॒जया॒ मा प॑शू॒नाम् |
मा मम॑ प्रा॒णैरप॑प्रसृपत॒ मोथ्सृ॑पत |
अ॒यग्‍ं स॑oवथ्स॒रः |
सर्वे॑षां भू॒ताना”o प्रा॒णैरप॑प्रसर्पति॒ चोथ्स॑र्पति च || ६६ || १-१४- ||

मा मे” प्र॒जया॒ मा प॑शू॒नाम् |
मा मम॑ प्रा॒णैरप॑प्रसृप॒ मोथ्सृ॑प |
इ॒दमह॑: |
सर्वे॑षां भू॒ताना”o प्रा॒णैरप॑प्रसर्पति॒ चोथ्स॑र्पति च |
मा मे” प्र॒जया॒ मा प॑शू॒नाम् |
मा मम॑ प्रा॒णैरप॑प्रसृप॒ मोथ्सृ॑प |
इ॒यग्‍ंरात्रि॑: |
सर्वे॑षां भू॒ताना”o प्रा॒णैरप॑प्रसर्पति॒ चोथ्स॑र्पति च |
मा मे” प्र॒जया॒ मा प॑शू॒नाम् |
मा मम॑ प्रा॒णैरप॑प्रसृप॒ मोथ्सृ॑प |
ॐ भूर्भुव॒स्स्व॑: |
एतद्वो मिथुनं मानो मिथु॑नग्‍ं री॒ढ्वम् || ६७ || १-१४- ||

अथादित्यस्याष्टपु॑रुष॒स्य |
वसूनामादित्यानाग्‍ स्थाने स्वतेज॑सा भा॒नि |
रुद्राणामादित्यानाग्‍ स्थाने स्वतेज॑सा भा॒नि |
आदित्यानामादित्यानाग्‍ स्थाने स्वतेज॑सा भा॒नि |
सताग्॑‍ंसत्या॒नाम् |
आदित्यानाग्‍ स्थाने स्वतेज॑सा भा॒नि |
अभिधून्वता॑मभि॒घ्नताम् |
वातव॑तां म॒रुताम् |
आदित्यानाग्‍ स्थाने स्वतेज॑सा भा॒नि |
ऋभूणामादित्यानाग्‍ स्थाने स्वतेज॑सा भा॒नि |
विश्वेषा”न्देवा॒नाम् |
आदित्यानाग्‍ स्थाने स्वतेज॑सा भा॒नि |
संवथ्सर॑स्य स॒वितुः |
आदित्यस्य स्थाने स्वतेज॑सा भा॒नि |
ॐ भूर्भुव॒स्स्व॑: |
रश्मयो वो मिथुनं मा नो मिथु॑नग्‍ं री॒ढ्वम् || ६८ || १-१५- ||

आरोगस्य स्थाने स्वतेज॑सा भा॒नि |
भ्राजस्य स्थाने स्वतेज॑सा भा॒नि |
पटरस्य स्थाने स्वतेज॑सा भा॒नि |
पतङ्गस्य स्थाने स्वतेज॑सा भा॒नि |
स्वर्णरस्य स्थाने स्वतेज॑सा भा॒नि |
ज्योतिषीमतस्य स्थाने स्वतेज॑सा भा॒नि |
विभासस्य स्थाने स्वतेज॑सा भा॒नि |
कश्यपस्य स्थाने स्वतेज॑सा भा॒नि |
ॐ भूर्भुव॒स्स्व॑: |
आपो वो मिथुनं मा नो मिथु॑नग्‍ं री॒ढ्वम् || ६९ || १-१६- ||

अथ वायोरेकादशपुरुषस्यैकादश॑स्त्रीक॒स्य |
प्रभ्राजमानानाग्‍ं रुद्राणाग् स्थाने स्वतेज॑सा भा॒नि |
व्यवदातानाग्‍ं रुद्राणाग् स्थाने स्वतेज॑सा भा॒नि |
वासुकिवैद्युतानाग्‍ं रुद्राणाग् स्थाने स्वतेज॑सा भा॒नि |
रजतानाग्‍ं रुद्राणाग् स्थाने स्वतेज॑सा भा॒नि |
परुषाणाग्‍ं रुद्राणाग् स्थाने स्वतेज॑सा भा॒नि |
श्यामानाग्‍ं रुद्राणाग् स्थाने स्वतेज॑सा भा॒नि |
कपिलानाग्‍ं रुद्राणाग् स्थाने स्वतेज॑सा भा॒नि |
अतिलोहितानाग्‍ं रुद्राणाग् स्थाने स्वतेज॑सा भा॒नि |
ऊर्ध्वानाग्‍ं रुद्राणाग् स्थाने स्वतेज॑सा भा॒नि || ७० || १-१७- ||

अवपतन्तानाग्‍ं रुद्राणाग् स्थाने स्वतेज॑सा भा॒नि |
वैद्युतानाग्‍ं रुद्राणाग् स्थाने स्वतेज॑सा भा॒नि |
प्रभ्राजमानीनाग्‍ं रुद्राणीनाग् स्थाने स्वतेज॑सा भा॒नि |
व्यवदातीनाग्‍ं रुद्राणीनाग् स्थाने स्वतेज॑सा भा॒नि |
वासुकिवैद्युतीनाग्‍ं रुद्राणीनाग् स्थाने स्वतेज॑सा भा॒नि |
रजतानाग्‍ं रुद्राणीनाग् स्थाने स्वतेज॑सा भा॒नि |
परुषाणाग्‍ं रुद्राणीनाग् स्थाने स्वतेज॑सा भा॒नि |
श्यामानाग्‍ं रुद्राणीनाग् स्थाने स्वतेज॑सा भा॒नि |
कपिलानाग्‍ं रुद्राणीनाग् स्थाने स्वतेज॑सा भा॒नि |
अतिलोहितीनाग्‍ं रुद्राणीनाग् स्थाने स्वतेज॑सा भा॒नि |
ऊर्ध्वानाग्‍ं रुद्राणीनाग् स्थाने स्वतेज॑सा भा॒नि |
अवपतन्तीनाग्‍ं रुद्राणीनाग् स्थाने स्वतेज॑सा भा॒नि |
वैद्युतीनाग्‍ं रुद्राणीनाग् स्थाने स्वतेज॑सा भा॒नि |
ॐ भूर्भुव॒स्स्व॑: |
रूपाणि वो मिथुनं मा नो मिथु॑नग्‍ं री॒ढ्वम् || ७१ || १-१७- ||

अथाग्ने॑रष्टपु॑रुष॒स्य |
अग्नेः पूर्वदिश्यस्य स्थाने स्वतेज॑सा भा॒नि |
जातवेदस उपदिश्यस्य स्थाने स्वतेज॑सा भा॒नि |
सहोजसो दक्षिणदिश्यस्य स्थाने स्वतेज॑सा भा॒नि |
अजिराप्रभव उपदिश्यस्य स्थाने स्वतेज॑सा भा॒नि |
वैश्वानरस्यापरदिश्यस्य स्थाने स्वतेज॑सा भा॒नि |
नर्यापस उपदिश्यस्य स्थाने स्वतेज॑सा भा॒नि |
पङ्क्तिराधस उदग्दिश्यस्य स्थाने स्वतेज॑सा भा॒नि |
विसर्पिण उपदिश्यस्य स्थाने स्वतेज॑सा भा॒नि |
ॐ भूर्भुव॒स्स्व॑: |
दिशो वो मिथुनं मा नो मिथु॑नग्‍ं री॒ढ्वम् || ७२ || १-१८- ||

दक्षिणपूर्वस्यान्दिशि विस॑र्पी न॒रकः |
तस्मान्नः प॑रिपा॒हि |
दक्षिणास्यान्दिश्यविस॑र्पी न॒रकः |
तस्मान्नः प॑रिपा॒हि |
उत्तरपूर्वस्यान्दिशि विषा॑दी न॒रकः |
तस्मान्नः प॑रिपा॒हि |
उत्तरापरस्यान्दिश्यविषा॑दी न॒रकः |
तस्मान्नः प॑रिपा॒हि |
आयस्मिन्थ्सप्त वासवा इन्द्रियाणि शतक्रत॑वित्ये॒ते || ७३ || १-१९- ||

इ॒न्द्र॒घो॒षा वो॒ वसु॑भिः पु॒रस्ता॒दुप॑दधताम् |
मनो॑जवसो वः पि॒तृभि॑र्दक्षिण॒त उप॑दधताम् |
प्रचे॑ता वो रु॒द्रैः प॒श्चादुप॑दधताम् |
वि॒श्वक॑र्मा व आदि॒त्यैरु॑त्तर॒त उप॑दधताम् |
त्वष्टा॑ वो रू॒पैरु॒परि॑ष्टा॒दुप॑दधताम् |
संज्ञानं वः प॑श्चादि॒ति |
आ॒दि॒त्यस्सर्वो॒ऽग्निः पृ॑थि॒व्याम् |
वा॒युर॒न्तरि॑क्षे |
सूर्यो॑ दि॒वि |
च॒न्द्रमा॑ दि॒क्षु |
नक्ष॑त्राणि॒ स्वलो॒के |
ए॒वा ह्ये॑व |
ए॒वा ह्य॑ग्ने |
ए॒वा हि वा॑यो |
ए॒वा ही”न्द्र |
ए॒वा हि पू॑षन् |
ए॒वा हि दे॑वाः || ७४ || १-२०- ||

आप॑मापाम॒पः सर्वा”: |
अ॒स्माद॒स्मादि॒तोऽमुत॑: |
अ॒ग्निर्वा॒युश्च॒ सूर्य॑श्च |
स॒ह स॑ञ्चस्क॒रर्द्धि॑या |
वा॒य्वश्वा॑ रश्मि॒पत॑यः |
मरी”च्यात्मानो॒ अद्रु॑हः |
दे॒वीर्भु॑वन॒सूव॑रीः |
पु॒त्र॒व॒त्त्वाय॑ मे सुत |
महानाम्नीर्म॑हामा॒नाः |
म॒ह॒सो म॑हस॒स्स्व॑: || ७५ || १-२१- ||

दे॒वीः प॑र्जन्य॒सूव॑रीः |
पु॒त्र॒व॒त्त्वाय॑ मे सुत |
अ॒पाऽश्न्यु॑ष्णिम॒पारक्ष॑: |
अ॒पाऽश्न्यु॑ष्णिम॒पारघम्” |
अपा”घ्रा॒मप॑चा॒ऽवर्तिम्” |
अप॑दे॒वीरि॒तो हि॑त |
वज्र॑न्दे॒वीरजी॑ताग्‍ंश्च |
भुव॑नन्देव॒सूव॑रीः |
आ॒दि॒त्यानदि॑तिन्दे॒वीम् |
योनि॑नोर्ध्वमु॒दीष॑त || ७६ || १-२१- ||

भ॒द्रं कर्णे॑भिः शृणु॒याम॑ देवाः |
भ॒द्रं प॑श्येमा॒क्षभि॒र्यज॑त्राः |
स्थि॒रैरङ्गै”स्तुष्टु॒वाग्ं स॑स्त॒नूभि॑: |
व्यशे॑म दे॒वहि॑त॒o यदायु॑: |
स्व॒स्ति न॒ इन्द्रो॑ वृ॒द्धश्र॑वाः |
स्व॒स्ति न॑: पू॒षा वि॒श्ववे॑दाः |
स्व॒स्ति न॒स्तार्क्ष्यो॒ अरि॑ष्टनेमिः |
स्व॒स्ति नो॒ बृह॒स्पति॑र्दधातु ||

के॒तवो॒ अरु॑णासश्च |
ऋ॒ष॒यो वात॑रश॒नाः |
प्र॒ति॒ष्ठाग्‍ं श॒तधा॑ हि |
स॒माहि॑तासो सहस्र॒धाय॑सम् |
शि॒वा न॒श्शन्त॑मा भवन्तु |
दि॒व्या आप॒ ओष॑धयः |
सु॒मृ॒डी॒का सर॑स्वति |
मा ते॒ व्यो॑म स॒oदृशि॑ || ७७ || १-२१- ||

यो॑ऽपां पुष्प॒o वेद॑ |
पुष्प॑वान् प्र॒जावा”न् पशु॒मान् भ॑वति |
च॒न्द्रमा॒ वा अ॒पां पुष्पम्” |
पुष्प॑वान् प्र॒जावा”न् पशु॒मान् भ॑वति |
य ए॒वं वेद॑ |
यो॑ऽपामा॒यत॑न॒o वेद॑ |
आ॒यत॑नवान् भवति |
अ॒ग्निर्वा अ॒पामा॒यत॑नम् |
आ॒यत॑नवान् भवति |
यो”ऽग्नेरा॒यत॑न॒o वेद॑ || ७८ || १-२२- ||

आ॒यत॑नवान् भवति |
आपो॒ वा अ॒ग्नेरा॒यत॑नम् |
आ॒यत॑नवान् भवति |
य ए॒वं वेद॑ |
यो॑ऽपामा॒यत॑न॒o वेद॑ |
आ॒यत॑नवान् भवति |
वा॒युर्वा अ॒पामा॒यत॑नम् |
आ॒यत॑नवान् भवति |
यो वा॒योरा॒यत॑न॒o वेद॑ |
आ॒यत॑नवान् भवति || ७९ || १-२२- ||

आपो॒ वै वा॒योरा॒यत॑नम् |
आ॒यत॑नवान् भवति |
य ए॒वं वेद॑ |
यो॑ऽपामा॒यत॑न॒o वेद॑ |
आ॒यत॑नवान् भवति |
अ॒सौ वै तप॑न्न॒पामा॒यत॑नम् |
आ॒यत॑नवान् भवति |
यो॑ऽमुष्य॒ तप॑त आ॒यत॑न॒o वेद॑ |
आ॒यत॑नवान् भवति |
आपो॒ वा अ॒मुष्य॒ तप॑त आ॒यत॑नम् || ८० || १-२२- ||

आ॒यत॑नवान् भवति |
य ए॒वं वेद॑ |
यो॑ऽपामा॒यत॑न॒o वेद॑ |
आ॒यत॑नवान् भवति |
च॒न्द्रमा॒ वा अ॒पामा॒यत॑नम् |
आ॒यत॑नवान् भवति |
यश्च॒न्द्रम॑स आ॒यत॑न॒o वेद॑ |
आ॒यत॑नवान् भवति |
आपो॒ वै च॒न्द्रम॑स आ॒यत॑नम्|
आ॒यत॑नवान् भवति || ८१ || १-२२- ||

य ए॒वं वेद॑ |
यो॑ऽपामा॒यत॑न॒o वेद॑ |
आ॒यत॑नवान् भवति |
नक्ष॑त्राणि॒ वा अ॒पामा॒यत॑नम् |
आ॒यत॑नवान् भवति |
यो नक्ष॑त्राणामा॒यत॑न॒o वेद॑ |
आ॒यत॑नवान् भवति |
आपो॒ वै नक्ष॑त्राणामा॒यत॑नम् |
आ॒यत॑नवान् भवति |
य ए॒वं वेद॑ || ८२ || १-२२- ||

यो॑ऽपामा॒यत॑न॒o वेद॑ |
आ॒यत॑नवान् भवति |
प॒र्जन्यो॒ वा अ॒पामा॒यत॑नम् |
आ॒यत॑नवान् भवति |
यः प॒र्जन्य॑स्या॒यत॑न॒o वेद॑ |
आ॒यत॑नवान् भवति |
आपो॒ वै प॒र्जन्य॑स्या॒ऽऽयत॑नम् |
आ॒यत॑नवान् भवति |
य ए॒वं वेद॑ |
यो॑ऽपामा॒यत॑न॒o वेद॑ || ८३ || १-२२- ||

आ॒यत॑नवान् भवति |
स॒oव॒थ्स॒रो वा अ॒पामा॒यत॑नम् |
आ॒यत॑नवान् भवति |
यस्स॑oवथ्स॒रस्या॒यत॑न॒o वेद॑ |
आ॒यत॑नवान् भवति |
आपो॒ वै स॑oवथ्स॒रस्या॒ऽऽयत॑नम् |
आ॒यत॑नवान् भवति |
य ए॒वं वेद॑ |
यो”ऽप्सु नाव॒o प्रति॑ष्ठिता॒o वेद॑ |
प्रत्ये॒व ति॑ष्ठति || ८४ || १-२२- ||

इ॒मे वै लो॒का अ॒प्सु प्रति॑ष्ठिताः |
तदे॒षाऽभ्यनू”क्ता |
अ॒पाग्‍ं रस॒मुद॑यग्‍ं सन् |
सूर्ये॑ शु॒क्रग्‍ं स॒माभृ॑तम् |
अ॒पाग्‍ं रस॑स्य॒ यो रस॑: |
तं वो॑ गृह्णाम्युत्त॒ममिति॑ |
इ॒मे वै लो॒का अ॒पाग्‍ं रस॑: |
ते॑ऽमुष्मि॑न्नादि॒त्ये स॒माभृ॑ताः |
जा॒नु॒द॒घ्नीमु॑त्तरवे॒दीङ्खा॒त्वा |
अ॒पां पू॑रयि॒त्वा गु॑ल्फद॒घ्नम् || ८५ || १-२२- ||

पुष्करपर्णैः पुष्करदण्डैः पुष्करैश्च॑ सग्ग्‍स्ती॒र्य |
तस्मि॑न्विहा॒यसे |
अ॒ग्निं प्र॒णीयो॑पसमा॒धाय॑ |
ब्र॒ह्म॒वा॒दिनो॑ वदन्ति |
कस्मा”त्प्रणी॒तेऽयम॒ग्निश्ची॒यते” |
साप्र॑णी॒तेऽयम॒प्सु ह्यय॑ञ्ची॒यते” |
अ॒सौ भुव॑ने॒ऽप्यना॑हिताग्निरे॒ताः |
तम॒भित॑ ए॒ता अ॒बीष्ट॑का॒ उप॑दधाति |
अ॒ग्नि॒हो॒त्रे द॑र्शपूर्णमा॒सयो”: |
प॒शु॒ब॒न्धे चा॑तुर्मा॒स्येषु॑ || ८६ || १-२२- ||

अथो॑ आहुः |
सर्वे॑षु यज्ञक्र॒तुष्विति॑ |
ए॒तद्ध॑ स्म॒ वा आ॑हुश्शण्डि॒लाः |
कम॒ग्निञ्चि॑नुते |
स॒त्रि॒यम॒ग्निञ्चि॑न्वा॒नः |
स॒oव॒थ्स॒रं प्र॒त्यक्षे॑ण |
कम॒ग्निञ्चि॑नुते |
सा॒वि॒त्रम॒ग्निञ्चि॑न्वा॒नः |
अ॒मुमा॑दि॒त्यं प्र॒त्यक्षे॑ण |
कम॒ग्निञ्चि॑नुते || ८७ || १-२२- ||

ना॒चि॒के॒तम॒ग्निञ्चि॑न्वा॒नः |
प्रा॒णान्प्र॒त्यक्षे॑ण |
कम॒ग्निञ्चि॑नुते |
चा॒तु॒र्हो॒त्रि॒यम॒ग्निञ्चि॑न्वा॒नः |
ब्रह्म॑ प्र॒त्यक्षे॑ण |
कम॒ग्निञ्चि॑नुते |
वै॒श्व॒सृ॒जम॒ग्निञ्चि॑न्वा॒नः |
शरी॑रं प्र॒त्यक्षे॑ण |
कम॒ग्निञ्चि॑नुते |
उ॒पा॒नु॒वा॒क्य॑मा॒शुम॒ग्निञ्चि॑न्वा॒नः || ८८ || १-२२- ||

इ॒माँल्लो॒कान्प्र॒त्यक्षे॑ण |
कम॒ग्निञ्चि॑नुते |
इ॒ममा॑रुणकेतुकम॒ग्निञ्चि॑न्वा॒नः इति॑ |
य ए॒वासौ |
इ॒तश्चा॒मुत॑श्चाऽव्यतीपा॒ती |
तमिति॑ |
यो”ऽग्नेर्मि॑थू॒या वेद॑ |
मि॒थु॒न॒वान्भ॑वति |
आपो॒ वा अ॒ग्नेर्मि॑थू॒याः |
मि॒थु॒न॒वान्भ॑वति |
य ए॒वं वेद॑ || ८९ || १-२२- ||

आपो॒ वा इ॒दमा॑सन्थ्सलि॒लमे॒व |
स प्र॒जाप॑ति॒रेक॑: पुष्करप॒र्णे सम॑भवत् |
तस्यान्त॒र्मन॑सि काम॒स्सम॑वर्तत |
इ॒दग्‍ं सृ॑जेय॒मिति॑ |
तस्मा॒द्यत्पुरु॑षो॒ मन॑साऽभि॒गच्छ॑ति |
तद्वा॒चा व॑दति |
तत्कर्म॑णा करोति |
तदे॒षाऽभ्यनू”क्ता |
काम॒स्तदग्रे॒ सम॑वर्त॒ताधि॑ |
मन॑सो॒ रेत॑: प्रथ॒मं यदासी”त् || ९० || १-२३- ||

स॒तो बन्धु॒मस॑ति॒ नि॑रविन्दन् |
हृ॒दि प्र॒तीष्या॑ क॒वयो॑ मनी॒षेति॑ |
उपै॑न॒न्तदुप॑नमति |
यत्का॑मो॒ भव॑ति |
य ए॒वं वेद॑ |
स तपो॑ऽतप्यत |
स तप॑स्त॒प्त्वा |
शरी॑रमधूनुत |
तस्य॒ यन्मा॒ग्॒‍ंसमासी”त् |
ततो॑ऽरु॒णाः के॒तवो॒ वात॑रश॒ना ऋष॑य॒ उद॑तिष्ठन् || ९१ || १-२३- ||

ये नखा”: |
ते वै॑खान॒साः |
ये वाला”: |
ते वा॑लखि॒ल्याः |
यो रस॑: |
सो॑ऽपाम् |
अ॒न्त॒र॒तः कू॒र्मं भू॒तग्‍ं सर्प॑न्तम् |
तम॑ब्रवीत् |
मम॒ वैत्वङ्मा॒ग्॒‍ंसा |
सम॑भूत् || ९२ || १-२३- ||

नेत्य॑ब्रवीत् |
पूर्व॑मे॒वाहमि॒हास॒मिति॑ |
तत्पुरु॑षस्य पुरुष॒त्वम् |
स स॒हस्र॑शीर्षा॒ पुरु॑षः |
स॒ह॒स्रा॒क्षस्स॒हस्र॑पात् |
भू॒त्वोद॑तिष्ठत् |
तम॑ब्रवीत् |
त्वं वै पूर्वग्॑‍ं सम॑भूः |
त्वमि॒दं पूर्व॑: कुरु॒ष्वेति॑ |
स इ॒त आ॒दायाप॑: || ९३ || १-२३- ||

अ॒ञ्ज॒लिना॑ पु॒रस्ता॑दु॒पाद॑धात् |
ए॒वाह्ये॒वेति॑ |
तत॑ आदि॒त्य उद॑तिष्ठत् |
सा प्राची॒ दिक् |
अथा॑रु॒णः के॒तुर्द॑क्षिण॒त उ॒पाद॑धात् |
ए॒वाह्यग्न॒ इति॑ |
ततो॒ वा अ॒ग्निरुद॑तिष्ठत् |
सा द॑क्षि॒णा दिक् |
अथा॑रु॒णः के॒तुः प॒श्चादु॒पाद॑धात् |
ए॒वाहि वायो॒ इति॑ || ९४ || १-२३- ||

ततो॑ वा॒युरुद॑तिष्ठत् |
सा प्र॒तीची॒ दिक् |
अथा॑रु॒णः के॒तुरु॑त्तर॒त उ॒पाद॑धात् |
ए॒वाहीन्द्रेति॑ |
ततो॒ वा इन्द्र॒ उद॑तिष्ठत् |
सोदी॑ची॒ दिक् |
अथा॑रु॒णः के॒तुर्मध्य॑ उ॒पाद॑धात् |
ए॒वाहि पूष॒न्निति॑ |
ततो॒ वै पू॒षोद॑तिष्ठत् |
सेयन्दिक् || ९५ || १-२३- ||

अथा॑रु॒णः के॒तुरु॒परि॑ष्टादु॒पाद॑धात् |
ए॒वाहि दे॒वा इति॑ |
ततो॑ देवमनु॒ष्याः पि॒तर॑: |
ग॒न्ध॒र्वा॒प्स॒रस॒श्चोद॑तिष्ठन् |
सोर्ध्वा दिक् |
या वि॒प्रुषो॑ वि॒परा॑पतन् |
ताभ्योऽसु॑रा॒ रक्षाग्॑‍ंसि पिशा॒चाश्चोद॑तिष्ठन् |
तस्मा॒त्ते परा॑भवन् |
वि॒प्रुड्भ्यो॒ हि ते सम॑भवन् |
तदे॒षाऽभ्यनू”क्ता || ९६ || १-२३- ||

आपो॑ ह॒ यद्बृ॑ह॒तीर्गर्भा॒मायन्॑ |
दक्ष॒न्दधा॑ना ज॒नय॑न्तीस्स्वय॒oभुम् |
तत॑ इ॒मेऽद्ध्यसृ॑ज्यन्त॒ सर्गा”: |
अद्भ्यो॒ वा इ॒दग्‍ं सम॑भूत् |
तस्मा॑दि॒दग्‍ं सर्व॒o ब्रह्म॑ स्वय॒oभ्विति॑ |
तस्मा॑दि॒दग्‍ं सर्व॒ग्॒‍ं शिथि॑लमि॒वाद्ध्रुव॑मिवाभवत् |
प्र॒जाप॑ति॒र्वाव तत् |
आ॒त्मना॒त्मान॑o वि॒धाय॑ |
तदे॒वानु॒प्रावि॑शत् |
तदे॒षाऽभ्यनू”क्ता || ९७ || १-२३- ||

वि॒धाय॑ लो॒कान्वि॒धाय॑ भू॒तानि॑ |
वि॒धाय॒ सर्वा”: प्र॒दिशो॒ दिश॑श्च |
प्र॒जाप॑तिः प्रथम॒जा ऋ॒तस्य॑ |
आ॒त्मना॒त्मान॑म॒भिसंवि॑वे॒शेति॑ |
सर्व॑मे॒वेदमा॒प्त्वा |
सर्व॑मव॒रुद्ध्य॑ |
तदे॒वानु॒प्रवि॑शति |
य ए॒वं वेद॑ || ९८ || १-२३- ||

चतु॑ष्टय्य॒ आपो॑ गृह्णाति |
च॒त्वारि॒ वा अ॒पाग्‍ं रू॒पाणि॑ |
मेघो॑ वि॒द्युत् |
स्त॒न॒यि॒त्नुर्वृ॒ष्टिः |
तान्ये॒वाव॑रुन्धे |
आ॒तप॑ति॒ वर्ष्या॑ गृह्णाति |
ताः पु॒रस्ता॒दुप॑दधाति |
ए॒ता वै ब्र॑ह्मवर्च॒स्या आप॑: |
मु॒ख॒त ए॒व ब्र॑ह्मवर्च॒समव॑रुन्धे |
तस्मा”न्मुख॒तो ब्र॑ह्मवर्च॒सित॑रः || ९९ || १-२४- ||

कूप्या॑ गृह्णाति |
ता द॑क्षिण॒त उप॑दधाति |
ए॒ता वै ते॑ज॒स्विनी॒राप॑: |
तेज॑ ए॒वास्य॑ दक्षिण॒तो द॑धाति |
तस्मा॒द्दक्षि॒णोऽर्ध॑स्तेज॒स्वित॑रः |
स्था॒व॒रा गृ॑ह्णाति |
ताः प॒श्चादुप॑दधाति |
प्रति॑ष्ठिता॒ वै स्था॑व॒राः |
प॒श्चादे॒व प्रति॑तिष्ठति |
वह॑न्तीर्गृह्णाति || १०० || १-२४- ||

ता उ॑त्तर॒त उप॑दधाति |
ओज॑सा॒ वा ए॒ता वह॑न्तीरि॒वोद्ग॑तीरि॒व आकूज॑तीरि॒व धाव॑न्तीः |
ओज॑ ए॒वास्यो”त्तर॒तो द॑धाति |
तस्मा॒दुत्त॒रोऽर्ध॑ ओज॒स्वित॑रः |
स॒oभा॒र्या गृ॑ह्णाति |
ता मध्य॒ उप॑दधाति |
इ॒यं वै स॑oभा॒र्याः |
अ॒स्यामे॒व प्रति॑तिष्ठति |
प॒ल्व॒ल्या गृ॑ह्णाति |
ता उ॒परि॑ष्टादु॒पाद॑धाति || १०१ || १-२४- ||

अ॒सौ वै प॑ल्व॒ल्याः |
अ॒मुष्या॑मे॒व प्रति॑तिष्ठति |
दि॒क्षूप॑दधाति |
दि॒क्षु वा आप॑: |
अन्न॒o वा आप॑: |
अ॒द्भ्यो वा अन्न॑ञ्जायते |
यदे॒वाद्भ्योऽन्न॒ञ्जाय॑ते |
तदव॑रुन्धे |
तं वा ए॒तम॑रु॒णाः के॒तवो॒ वात॑रश॒ना ऋष॑योऽचिन्वन् |
तस्मा॑दारुणके॒तुक॑: || १०२ || १-२४- ||

तदे॒षाऽभ्यनू”क्ता |
के॒तवो॒ अरु॑णासश्च |
ऋ॒ष॒यो वात॑रश॒नाः |
प्र॒ति॒ष्ठाग्‍ं श॒तधा॑हि |
स॒माहि॑तासो सहस्र॒धाय॑स॒मिति॑ |
श॒तश॑श्चै॒व स॒हस्र॑शश्च॒ प्रति॑तिष्ठति |
य ए॒तम॒ग्निञ्चि॑नुते |
य उ॑चैनमे॒वं वेद॑ || १०३ || १-२४- ||

जा॒नु॒द॒घ्नीमु॑त्तरवे॒दीङ्खा॒त्वा |
अ॒पां पू॑रयति |
अ॒पाग्‍ं स॑र्व॒त्वाय॑ |
पु॒ष्क॒र॒प॒र्णग्‍ं रु॒क्मं पुरु॑ष॒मित्युप॑दधाति |
तपो॒ वै पु॑ष्करप॒र्णम् |
स॒त्यग्‍ं रु॒क्मः |
अ॒मृत॒o पुरु॑षः |
ए॒ताव॒द्वावा”स्ति |
याव॑दे॒तत् |
याव॑दे॒वास्ति॑ || १०४ || १-२५- ||

तदव॑रुन्धे |
कू॒र्ममुप॑दधाति |
अ॒पामे॒व मेध॒मव॑रुन्धे |
अथो” स्व॒र्गस्य॑ लो॒कस्य॒ सम॑ष्ट्यै |
आप॑मापाम॒पस्सर्वा”: |
अ॒स्माद॒स्मादि॒तोऽमुत॑: |
अ॒ग्निर्वा॒युश्च॒ सूर्य॑श्च |
स॒हस॑ञ्चस्क॒रर्द्धि॑या॒ इति॑ |
वा॒य्वश्वा॑ रश्मि॒पत॑यः |
लो॒कं पृ॑णच्छि॒द्रं पृ॑ण || १०५ || १-२५- ||

यास्ति॒स्रः प॑रम॒जाः |
इ॒न्द्र॒घो॒षा वो॒ वसु॑भिरे॒वाह्ये॒वेति॑ |
पञ्च॒चित॑य॒ उपद॑धाति |
पाङ्क्तो॒ऽग्निः |
याव॑ने॒वाग्निः |
तञ्चि॑नुते |
लो॒कंपृ॑णया द्वि॒तीया॒मुप॑दधाति |
पञ्च॑पदा॒ वै वि॒राट् |
तस्या॒ वा इ॒यं पाद॑: |
अ॒न्तरि॑क्ष॒o पाद॑: |
द्यौः पाद॑: |
दिश॒: पाद॑: |
प॒रोर॑जा॒: पाद॑: |
वि॒राज्ये॒व प्रति॑तिष्ठति |
य ए॒तम॒ग्निञ्चि॑नु॒ते |
य उ॑चैनमे॒वं वेद॑ || १०६ || १-२५- ||

अ॒ग्निं प्र॒णीयो॑पसमा॒धाय॑ |
तम॒भित॑ ए॒ता अ॒बीष्ट॑का॒ उप॑दधाति |
अ॒ग्नि॒हो॒त्रे द॑र्शपूर्णमा॒सयो”: |
प॒शु॒ब॒न्धे चा॑तुर्मा॒स्येषु॑ |
अथो॑ आहुः |
सर्वे॑षु यज्ञक्र॒तुष्विति॑ |
अथ॑ हस्माहारु॒णस्स्वा॑य॒oभुव॑: |
सा॒वि॒त्रः सर्वो॒ऽग्निरित्यन॑नुषङ्गं मन्यामहे |
नाना॒ वा ए॒तेषा”o वी॒र्या॑णि |
कम॒ग्निञ्चि॑नुते || १०७ || १-२६- ||

स॒त्रि॒यम॒ग्निञ्चि॑न्वा॒नः |
कम॒ग्निञ्चि॑नुते |
सा॒वि॒त्रम॒ग्निञ्चि॑न्वा॒नः |
कम॒ग्निञ्चि॑नुते |
ना॒चि॒के॒तम॒ग्निञ्चि॑न्वा॒नः |
कम॒ग्निञ्चि॑नुते |
चा॒तु॒र्हो॒त्रि॒यम॒ग्निञ्चि॑न्वा॒नः |
कम॒ग्निञ्चि॑नुते |
वै॒श्व॒सृ॒जम॒ग्निञ्चि॑न्वा॒नः |
कम॒ग्निञ्चि॑नुते || १०८ || १-२६- ||

उ॒पा॒नु॒वा॒क्य॑मा॒शुम॒ग्निञ्चि॑न्वा॒नः |
कम॒ग्निञ्चि॑नुते |
इ॒ममा॑रुणकेतुकम॒ग्निञ्चि॑न्वा॒न इति॑ |
वृषा॒ वा अ॒ग्निः |
वृषा॑णो॒ सग्ग्‍स्फा॑लयेत् |
ह॒न्येता”स्य य॒ज्ञः |
तस्मा॒न्नानु॒षज्य॑: |
सोत्त॑रवे॒दिषु॑ क्र॒तुषु॑ चिन्वीत |
उ॒त्त॒र॒वे॒द्याग्‍ं ह्य॑ग्निश्ची॒यते” |
प्र॒जाका॑मश्चिन्वीत || १०९ || १-२६- ||

प्रा॒जा॒प॒त्यो वा ए॒षो”ऽग्निः |
प्रा॒जा॒प॒त्याः प्र॒जाः |
प्र॒जावा”न्भवति |
य ए॒वं वेद॑ |
प॒शुका॑मश्चिन्वीत |
स॒oज्ञान॒o वा ए॒तत्प॑शू॒नाम् |
यदाप॑: |
प॒शू॒नामे॒व स॒oज्ञाने॒ऽग्निञ्चि॑नुते |
प॒शु॒मान्भ॑वति |
य ए॒वं वेद॑ || ११० || १-२६- ||

वृष्टि॑कामश्चिन्वीत |
आपो॒ वै वृष्टि॑: |
प॒र्जन्यो॒ वर्षु॑को भवति |
य ए॒वं वेद॑ |
आ॒म॒या॒वी चि॑न्वीत |
आपो॒ वै भे॑ष॒जम् |
भे॒ष॒जमे॒वास्मै॑ करोति |
सर्व॒मायु॑रेति |
अ॒भि॒चरग्ग्॑‍श्चिन्वीत |
वज्रो॒ वा आप॑: || १११ || १-२६- ||

वज्र॑मे॒व भ्रातृ॑व्येभ्य॒: प्रह॑रति |
स्तृ॒णु॒त ए॑नम् |
तेज॑स्कामो॒ यश॑स्कामः |
ब्र॒ह्म॒व॒र्च॒सका॑मस्स्व॒र्गका॑मश्चिन्वीत |
ए॒ताव॒द्वा वा”स्ति |
याव॑दे॒तत् |
याव॑दे॒वास्ति॑ |
तदव॑रुन्धे |
तस्यै॒तद्व्र॒तम् |
वर्ष॑ति॒ न धा॑वेत् || ११२ || १-२६- ||

अ॒मृत॒o वा आप॑: |
अ॒मृत॒स्यान॑न्तरित्यै |
नाप्सु मूत्र॑पुरी॒षङ्कु॑र्यात् |
न निष्ठी॑वेत् |
न वि॒वस॑नस्स्नायात् |
गुह्यो॒ वा ए॒षो”ऽग्निः |
ए॒तस्या॒ग्नेरन॑तिदाहाय |
न पु॑ष्करप॒र्णानि॒ हिर॑ण्य॒o वाऽधि॒तिष्ठे”त् |
ए॒तस्या॒ग्नेरन॑भ्यारोहाय |
न कूर्म॒स्याश्नी॑यात् |
नोद॒कस्या॒घातु॑का॒न्येन॑मोद॒कानि॑ भवन्ति |
अ॒घातु॑का॒ आप॑: |
य ए॒तम॒ग्निञ्चि॑नु॒ते |
य उ॑चैनमे॒वं वेद॑ || ११३ || १-२६- ||

इ॒मानु॑क॒o भुव॑ना सीषधेम |
इन्द्र॑श्च॒ विश्वे॑ च दे॒वाः |
य॒ज्ञञ्च॑ नस्त॒न्वञ्च॑ प्र॒जाञ्च॑ |
आ॒दि॒त्यैरिन्द्र॑स्स॒ह सी॑षधातु |
आ॒दि॒त्यैरिन्द्र॒स्सग॑णो म॒रुद्भि॑: |
अ॒स्माक॑o भूत्ववि॒ता त॒नूना”म् |
आप्ल॑वस्व॒ प्रप्ल॑वस्व |
आ॒ण्डी भ॑व ज॒ मा मु॒हुः |
सुखादीन्दु॑:खनि॒धनाम् |
प्रति॑मुञ्चस्व॒ स्वां पु॒रम् || ११४ || १-२७- ||

मरी॑चयस्स्वायंभु॒वाः |
ये श॑री॒राण्य॑कल्पयन् |
ते ते॑ दे॒हङ्क॑ल्पयन्तु |
मा च॑ ते॒ ख्या स्म॑ तीरिषत् |
उत्ति॑ष्ठत॒ मा स्व॑प्त |
अ॒ग्निमि॑च्छध्व॒o भार॑ताः |
राज्ञ॒स्सोम॑स्य तृ॒प्तास॑: |
सूर्ये॑ण स॒युजो॑षसः |
युवा॑ सु॒वासा”: |
अ॒ष्टाच॑क्रा॒ नव॑द्वारा || ११५ || १-२७- ||

दे॒वाना॒o पूर॑यो॒ध्या |
तस्याग्॑‍ं हिरण्म॑यः को॒शः |
स्व॒र्गो लो॒को ज्योति॒षाऽऽवृ॑तः |
यो वै ता”o ब्रह्म॑णो वे॒द |
अ॒मृते॑नाऽऽवृ॒तां पु॑रीम् |
तस्मै” ब्रह्म च॑ ब्रह्मा॒ च |
आ॒युः कीर्ति॑o प्र॒जान्द॑दुः |
वि॒भ्राज॑माना॒ग्॒‍ं हरि॑णीम् |
य॒शसा॑ संप॒रीवृ॑ताम् |
पुरग्॑‍ं हिरण्म॑यीं ब्र॒ह्मा || ११६ || १-२७- ||

वि॒वेशा॑ऽप॒राजि॑ता |
पराङेत्य॑ज्याम॒यी |
पराङेत्य॑नाश॒की |
इ॒ह चा॑मुत्र॑ चान्वे॒ति |
वि॒द्वान्दे॑वासु॒रानु॑भ॒यान् |
यत्कु॑मा॒री म॒न्द्रय॑ते |
य॒द्यो॒षद्यत्प॑ति॒व्रता” |
अरि॑ष्ट॒o यत्किञ्च॑ क्रि॒यते” |
अ॒ग्निस्तदनु॑वेधति |
अ॒शृता॑सश्शृ॑तास॒श्च || ११७ || १-२७- ||

य॒ज्वानो॒ येऽप्य॑य॒ज्वन॑: |
स्व॑र्यन्तो॒ नापे”क्षन्ते |
इन्द्र॑म॒ग्निञ्च॑ ये वि॒दुः |
सिक॑ता इव स॒oयन्ति॑ |
र॒श्मिभि॑स्समु॒दीरि॑ताः |
अ॒स्माल्लो॒काद॑मुष्मा॒च्च |
ऋ॒षिभि॑रदात्पृ॒श्निभि॑ |
अपे॑त॒ वीत॒ वि च॑ सर्प॒तात॑: |
येऽत्र॒ स्थ पु॑रा॒णा ये च॒ नूत॑नाः |
अहो॑भिर॒द्भिर॒क्तुभि॒र्व्य॑क्तम् || ११८ || १-२७- ||

य॒मो द॑दात्वव॒सान॑मस्मै |
नृ मु॑णन्तु नृ पा॒त्वर्य॑: |
अ॒कृ॒ष्टा ये च॒ कृष्ट॑जाः |
कु॒मारी॑षु क॒नीनी॑षु |
जा॒रिणी॑षु च॒ ये हि॒ताः |
रेत॑: पीता॒ आण्ड॑पीताः |
अङ्गा॑रेषु च॒ ये हु॒ताः |
उ॒भया”न् पुत्र॑पौत्र॒कान् |
यु॒वे॒ऽहं य॒मराज॑गान् |
श॒तमिन्नु श॒रद॑: || ११९ || १-२७- ||

अदो॒ यद्ब्रह्म॑ विल॒बम् |
पि॒तृ॒णाञ्च॑ य॒मस्य॑ च |
वरु॑ण॒स्याश्वि॑नोर॒ग्नेः |
म॒रुता”ञ्च वि॒हाय॑साम् |
का॒म॒प्र॒यव॑णं मे अस्तु |
स ह्ये॑वास्मि॑ स॒नात॑नः |
इति नाको ब्रह्मिश्रवो॑ रायो॒ धनम् |
पु॒त्रानापो॑ दे॒वीरि॒हाहि॑ता || १२० || १-२७- ||

विशी”र्ष्णी॒o गृध्र॑शीर्ष्णीञ्च |
अपेतो॑ निरृ॒तिग्‍ं ह॑थः |
परिबाधग्ग् श्वे॑तकु॒क्षम् |
नि॒जङ्घग्॑‍ं शब॒लोद॑रम् |
स॒ तान्वा॒च्याय॑या स॒ह |
अग्ने॒ नाश॑य स॒oदृश॑: |
ई॒र्ष्या॒सू॒ये बु॑भु॒क्षाम् |
म॒न्युं कृ॒त्याञ्च॑ दीधिरे |
रथे॑न किग्‍ंशु॒काव॑ता |
अग्ने॒ नाश॑य स॒oदृश॑: || १२१ || १-२८- ||

प॒र्जन्या॑य॒ प्रगा॑यत |
दि॒वस्पु॒त्राय॑ मी॒ढुषे” |
स नो॑ य॒वस॑मिच्छतु |
इ॒दं वच॑: प॒र्जन्या॑य स्व॒राजे” |
हृ॒दो अ॒स्त्वन्त॑र॒न्तद्यु॑योत |
म॒यो॒भूर्वातो॑ वि॒श्वकृ॑ष्टयस्सन्त्व॒स्मे |
सु॒पि॒प्प॒ला ओष॑धीर्दे॒वगो॑पाः |
यो गर्भ॒मोष॑धीनाम् |
गवा”ङ्कृ॒णोत्यर्व॑ताम् |
प॒र्जन्य॑: पुरु॒षीणा”म् || १२२ || १-२९- ||

पुन॑र्मामैत्त्विन्द्रि॒यम् |
पुन॒रायु॒: पुन॒र्भग॑: |
पुन॒र्ब्राह्म॑णमैतु मा |
पुन॒र्द्रवि॑णमैतु मा |
यन्मे॒ऽद्य रेत॑: पृथि॒वीमस्कान्॑ |
यदोष॑धीर॒प्यस॑र॒द्यदाप॑: |
इ॒दन्तत्पुन॒राद॑दे |
दी॒र्घा॒यु॒त्त्वाय॒ वर्च॑से |
यन्मे॒ रेत॒: प्रसि॑च्यते |
यन्म॒ आजा॑यते॒ पुन॑: |
तेन॑ माम॒मृत॑ङ्कुरु |
तेन॑ सुप्र॒जस॑ङ्कुरु || १२३ || १-३०- ||

अ॒द्भ्यस्तिरो॒धाऽजा॑यत |
तव॑ वैश्रव॒णस्स॑दा |
तिरो॑धेहि सप॒त्नान्न॑: |
ये अपो॒ऽश्नन्ति॑ केच॒न |
त्वा॒ष्ट्रीं मा॒यां वै”श्रव॒णः |
रथग्॑‍ं सहस्र॒वन्धु॑रम् |
पु॒रु॒श्च॒क्रग्‍ं सह॑स्राश्वम् |
आस्था॒याया॑हि नो ब॒लिम् |
यस्मै॑ भू॒तानि॑ ब॒लिमाव॑हन्ति |
धन॒ङ्गावो॒ हस्ति॒हिर॑ण्य॒मश्वान्॑ || १२४ || १-३१- ||

असा॑म सुम॒तौ य॒ज्ञिय॑स्य |
श्रिय॒o बिभ्र॒तोऽन्न॑मुखीं वि॒राज”म् |
सु॒द॒र्श॒ने च॑ क्रो॒ञ्चे च॑ |
मै॒ना॒गे च॑ म॒हागि॑रौ |
स॒तद्वा॒ट्टार॑गम॒न्ता |
स॒ग्॒‍ंहार्य॒न्नग॑र॒o तव॑ |
इति मन्त्रा”: |
कल्पो॑ऽत ऊ॒र्ध्वम् |
यदि॒ बलि॒ग्॒‍ं हरे”त् |
हि॒र॒ण्य॒ना॒भये॑ वितु॒दये॑ कौबे॒राया॒यं ब॑लिः || १२५ || १-३१- ||

सर्वभूतधिपतये न॑म इ॒ति |
अथ बलिग्‍ं हृत्वोप॑तिष्ठे॒त |
क्ष॒त्त्रं क्ष॒त्त्रं वै”श्रव॒णः |
ब्राह्मणा॑ वय॒ग्ग्॒‍स्मः |
नम॑स्ते अस्तु॒ मा मा॑ हिग्‍ंसीः |
अस्मात्प्रविश्यान्न॑मद्धी॒ति |
अथ तमग्निमा॑दधी॒त |
यस्मिन्नेतत्कर्म प्र॑युञ्जी॒त |
ति॒रोधा॒ भूः |
ति॒रोधा॒ भुव॑: || १२६ || १-३१- ||

ति॒रोधा॒स्स्व॑: |
ति॒रोधा॒ भूर्भुव॒स्स्व॑: |
सर्वेषां लोकानामाधिपत्ये॑ सीदे॒ति |
अथ तमग्नि॑मिन्धी॒त |
यस्मिन्नेतत्कर्म प्र॑युञ्जी॒त |
ति॒रोधा॒ भूस्स्वाहा” |
ति॒रोधा॒ भुव॒स्स्वाहा” |
ति॒रोधा॒ स्व॑स्स्वाहा” |
ति॒रोधा॒ भूर्भुव॒स्स्व॑स्स्वाहा” |
यस्मिन्नस्य काले सर्वा आहुतीर्हुता॑ भवे॒युः || १२७ || १-३१- ||

अपि ब्राह्मण॑मुखी॒नाः |
तस्मिन्नह्नः काले प्र॑युञ्जी॒त |
पर॑स्सु॒प्तज॑नाद्वे॒पि |
मास्म प्रमाद्यन्त॑माध्या॒पयेत् |
सर्वार्था”: सिद्ध्य॒न्ते |
य ए॑वं वे॒द |
क्षुध्यन्निद॑मजा॒नताम् |
सर्वार्था न॑ सिद्ध्य॒न्ते |
यस्ते॑ वि॒घातु॑को भ्रा॒ता |
ममान्तर्हृ॑दये॒ श्रितः || १२८ || १-३१- ||

तस्मा॑ इ॒ममग्र॒पिण्ड॑ञ्जुहोमि |
स मे”ऽर्था॒न्मा विव॑धीत् |
मयि॒ स्वाहा” |
रा॒जा॒धि॒रा॒जाय॑ प्रसह्यसा॒हिने” |
नमो॑ व॒यं वै”श्रव॒णाय॑ कुर्महे |
स मे॒ कामा॒न्काम॒कामा॑य॒ मह्यम्” |
का॒मे॒श्व॒रो वै”श्रव॒णो द॑दातु |
कु॒बे॒राय॑ वैश्रव॒णाय॑ |
म॒हा॒रा॒जाय॒ नम॑: |
के॒तवो॒ अरु॑णासश्च |
ऋ॒ष॒यो वात॑रश॒नाः |
प्र॒ति॒ष्ठाग्‍ं श॒तधा॑ हि |
स॒माहि॑तासो सहस्र॒धाय॑सम् |
शि॒वा न॒श्शन्त॑मा भवन्तु |
दि॒व्या आप॒ ओष॑धयः |
सु॒मृ॒डी॒का सर॑स्वति |
मा ते॒ व्यो॑म स॒oदृशि॑ || १२९ || १-३१- ||

संवत्सरमेत॑द्व्रत॒ञ्चरेत् |
द्वौ॑ वा मा॒सौ |
नियमस्स॑मासे॒न |
तस्मिन्नियम॑विशे॒षाः |
त्रिषवणमुदको॑पस्प॒र्शी |
चतुर्थकालपान॑भक्त॒स्स्यात् |
अहरहर्वा भैक्ष॑मश्नी॒यात् |
औदुम्बरीभिः समिद्भिरग्नि॑o परि॒चरेत् |
पुनर्मा मैत्त्विन्द्रियमित्येतेनाऽनु॑वाके॒न |
उद्धृतपरिपूताभिरद्भिः कार्य॑ङ्कुर्वी॒त || १३० || १-३२- ||

अ॑सञ्च॒यवान् |
अग्नये वायवे॑ सूर्या॒य |
ब्रह्मणे प्र॑जाप॒तये |
चन्द्रमसे न॑क्षत्रे॒भ्यः |
ऋतुभ्यस्संव॑थ्सरा॒य |
वरुणायारुणायेति व्र॑तहो॒माः |
प्र॒व॒र्ग्यव॑दादे॒शः |
अरुणाः का”ण्डऋ॒षयः |
अरण्ये॑ऽधीयी॒रन् |
भद्रं कर्णेभिरिति द्वे॑ जपि॒त्वा || १३१ || १-३२- ||

महानाम्नीभिरुदकग्‍ं स॑ग्ग्‍स्प॒र्श्य |
तमाचा”र्यो द॒द्यात् |
शिवा नश्शन्तमेत्योशधी॑राल॒भते |
सुमृडीके॑ति भू॒मिम् |
एवम॑पव॒र्गे |
धे॑नुर्द॒क्षिणा |
कग्‍ंसं वास॑श्च क्षौ॒मम् |
अन्य॑द्वाशु॒क्लम् |
य॑थाश॒क्ति वा |
एवग्ग्‍ स्वाध्याय॑धर्मे॒ण |
अरण्ये॑ऽधीयी॒त |
तपस्वी पुण्यो भवति तपस्वी पु॑ण्यो भ॒वति || १३२ || १-३२- ||

भ॒द्रं कर्णे॑भिः शृणु॒याम॑ देवाः |
भ॒द्रं प॑श्येमा॒क्षभि॒र्यज॑त्राः |
स्थि॒रैरङ्गै”स्तुष्टु॒वाग्ंस॑स्त॒नूभि॑: |
व्यशे॑म दे॒वहि॑त॒o यदायु॑: |
स्व॒स्ति न॒ इन्द्रो॑ वृ॒द्धश्र॑वाः |
स्व॒स्ति न॑: पू॒षा वि॒श्ववे॑दाः |
स्व॒स्ति न॒स्तार्क्ष्यो॒ अरि॑ष्टनेमिः |
स्व॒स्ति नो॒ बृह॒स्पति॑र्दधातु ||

ॐ शान्ति॒: शान्ति॒: शान्ति॑: ||