Sri Gayatri Panjara Stotram

तॆलुगु
स्तोत्रनिधि
श्री गायत्री स्तोत्रालु
गमनिक
: ई स्तोत्रमु
(श्लोकालु मात्रमे)
श्री गायत्री स्तोत्रनिधि
” पुस्तकमुलो कूडा उन्नदि.
भगवंतं देवदेवं ब्रह्माणं परमेष्ठिनम् |
विधातारं विश्वसृजं पद्मयोनिं प्रजापतिम् ||

शुद्धस्फटिकसंकाशं महेंद्रशिखरोपमम् |
बद्धपिंगजटाजूटं तडित्कनककुंडलम् ||

शरच्चंद्राभवदनं स्फुरदिंदीवरेक्षणम् |
हिरण्मयं विश्वरूपमुपवीताजिनावृतम् ||

मौक्तिकाभाक्षवलयस्तंत्रीलयसमन्वितः |
कर्पूरोद्धूळिततनुं स्रष्टारं नेत्रगोचरम् ||

विनयेनोपसंगम्य शिरसा प्रणिपत्य च |
नारदः परिपप्रच्छ देवर्षिगणमध्यगः ||

नारद उवाच |
भगवन् देवदेवेश सर्वज्ञ करुणानिधे |
श्रोतुमिच्छामि तत्तत्वं भोगमोक्षैकसाधनम् ||

ऐश्वर्यस्य समग्रस्य फलदं द्वंद्ववर्जितम् |
ब्रह्महत्यादिपापघ्नं पापाद्यरिभयापहम् ||

यदेकं निष्कळं सूक्ष्मं निरंजनमनामयम् |
यत्ते प्रियतमं लोके तन्मे ब्रूहि पितर्मम ||

ब्रह्मोवाच |
शृणु नारद वक्ष्यामि ब्रह्ममूलं सनातनम् |
सृष्ट्यादौ मन्मुखे क्षिप्तं देवदेवेन विष्णुना ||

प्रपंचबीजमित्याहुरुत्पत्तिस्थितिहेतुकम् |
पुरा मया तु कथितं कश्यपाय सुधीमते ||

सावित्रीपंजरं नाम रहस्यं निगमत्रये |
ऋष्यादिकं च दिग्वर्णं सांगावरणकं क्रमात् ||

वाहनायुधमंत्रास्त्रमूर्तिध्यानसमन्वितम् |
स्तोत्रं शृणु प्रवक्ष्यामि तव स्नेहाच्च नारद ||

ब्रह्मनिष्ठाय देयं स्याददेयं यस्य कस्यचित् |
आचम्य नियतः पश्चादात्मध्यानपुरःसरम् ||

ओमित्यादौ विचिंत्याथ व्योमहेमाब्जसंस्थितम् |
धर्मकंदगतज्ञानादैश्वर्याष्टदळान्वितम् ||

वैराग्यकर्णिकाधीनां प्रणवग्रहमध्यगाम् |
ब्रह्मवेदिसमायुक्तां चैतन्यपुरमध्यगाम् ||

तत्त्वहंससमाकीर्णां शब्दपीठे सुसंस्थिताम् |
नादबिंदुकळातीतां गोपुरैरपि संवृताम् ||

विद्याऽविद्याऽमृतत्वादि प्रकारैरपिसंवृताम् |
निगमार्गळसंछन्नां निर्गुणद्वारवाटिकाम् ||

चतुर्वर्गफलोपेतां महाकल्पवनैर्वृताम् |
सांद्रानंदसुधासिंधुनिगमद्वारवाटिकाम् ||

ध्यानधारणयोगादि तृणगुल्मलतावृताम् |
सदसच्चित्स्वरूपाख्य मृगपक्षिसमाकुलाम् ||

विद्याऽविद्याविचाराख्यलोकालोकाचलावृताम् |
पंचीकरणपंचोत्थभूततत्त्वनिवेदिताम् ||

अविकारसमाश्लिष्टनिजध्यानगुणावृताम् |
वेदोपनिषदर्थाख्य देवर्षिगणसेविताम् ||

इतिहासग्रहगणैः सदारैरभिवंदिताम् |
गाथाप्सरोभिर्यक्षैश्च गणकिन्नरसेविताम् ||

नारसिंहमुखैश्चापि पुरुषैः कल्पचारणैः |
कृतगानविनोदादिकथालापनतत्पराम् ||

तदित्यवाङ्मनोगम्यतेजोरूपधरां पराम् |
जगतः प्रसवित्रीं तां सवितुः सृष्टिकारिणीम् ||

वरेण्यमित्यन्नमयीं पुरुषार्थफलप्रदाम् |
अविद्यावर्णवर्ज्यां च तेजोवद्भर्गसंज्ञिकाम् ||

देवस्य सच्चिदानंद परब्रह्मरसात्मिकाम् |
धीमह्यहं स वै तद्वद्ब्रह्माद्वैतस्वरूपिणीम् ||

धियो यो नस्तु सविता प्रचोदयादुपासिताम् |
परोऽसौ सविता साक्षाद्देवोनिर्हरणाय च ||

परोरजस इत्यादि परब्रह्मात्मसावदोम् |
आपो ज्योतिरिति द्वाभ्यां पांचभौतिकसंज्ञिकाम् ||

रसोऽमृतं ब्रह्मपदैस्तां नित्यां तापिनीं पराम् |
भूर्भुवःसुवरित्येतैर्निगमत्वप्रकाशिकाम् ||

महर्जनस्तपःसत्यलोकोपरिसुसंस्थिताम् |
तादृगस्या विराड्रूपं रहस्यं प्रवदाम्यहम् ||

व्योमकेशाकुलाकाश द्योकिरीटविराजिताम् |
तटिद्भ्रुकुटिनाक्रांतविधिविष्णुशिवार्चिताम् ||

गुरुभार्गवकर्णांतां सोमसूर्याग्निलोचनाम् |
इडापिंगळसौषुम्ण वामनासापुटान्विताम् ||

संध्याद्विरोष्ठपुटितां लसद्वाग्भवजिह्विकाम् |
संध्यासौ द्युमणेः कंठलसद्बाहुसमन्विताम् ||

पर्जन्यहृदयासक्तवसुसुस्तनमंडलाम् |
आकाशोदरवित्रस्तनाभ्यवांतरदेशिकाम् ||

प्राजापत्याख्यजघनामिंद्राणीकटिसंज्ञिकाम् |
ऊरू मलयमेरुभ्यां शोभमानां सुरद्विषम् ||

जानुनी जह्नुकुशिकौ वैश्वदेवलसद्भुजाम् |
अयनद्वयजंघाद्यसुराद्यपितृसंज्ञिकाम् ||

पदांघ्रिनखरोमाळिभूतलद्रुमलांछिताम् |
ग्रहराश्यर्क्षदेवर्षिमूर्तिं च परसंज्ञिकाम् ||

तिथिमासर्तुवर्षाख्यसुकेतुनिमिषात्मिकाम् |
अहोरात्रार्धमासाख्यामार्यां चंद्रमसात्मिकाम् ||

मायाकल्पितवैचित्र्यसंध्याच्छादनसंवृताम् |
ज्वलत्कालानलप्रख्यां तडित्कोटिसमप्रभाम् ||

कोटिसूर्यप्रतीकाशां चंद्रकोटिसुशीतलाम् |
सुधामंडलमध्यस्थां सांद्रानंदामृतात्मिकाम् ||

वागतीतां मनोरम्यां वरदां वेदमातरम् |
चराचरमयीं नित्यां ब्रह्माक्षरसमन्विताम् ||

ध्यात्वा स्वात्मन्यभेदेन ब्रह्मपंजरमारभेत् |
पंजरस्य ऋषिश्चाहं छंदो विकृतिरुच्यते ||

देवता च परो हंसः परब्रह्माधिदेवता |
प्रणवो बीजशक्तिः स्यादों कीलकमुदाहृतम् ||

तत्तत्त्वं धीमहि क्षेत्रं धियोऽस्त्रं यः परं पदम् |
मंत्रमापो ज्योतिरिति योनिर्हंसः सवेधकम् ||

विनियोगस्तु सिद्ध्यर्थं पुरुषार्थचतुष्टये |
ततस्तैरंगषट्कं स्यात्तैरेव व्यापकत्रयम् ||

पूर्वोक्तदेवतां ध्यायेत्साकारगुणसंयुताम् |
पंचवक्त्रां दशभुजां त्रिपंचनयनैर्युताम् ||

मुक्ताविद्रुमसौवर्णामोषधीशसमाननाम् |
वाणीं परां रमां मायां चामरैर्दर्पणैर्युताम् ||

षडंगदेवतामंत्रै रूपाद्यवयवात्मिकाम् |
मृगेंद्रवृषपक्षींद्रमृगहंसासनस्थिताम् ||

अर्धेंदुबद्धमुकुटकिरीटमणिकुंडलाम् |
रत्नताटंकमांगळ्यपरग्रैवेयनूपुराम् ||

अंगुळीयककेयूरकंकणाद्यैरलंकृताम् |
दिव्यस्रग्वस्त्रसंछन्नरविमंडलमध्यगाम् ||

वराऽभयाब्जयुगळां शंखचक्रगदांकुशाम् |
शुभ्रं कपालं दधतीं वहंतीमक्षमालिकाम् ||

गायत्रीं वरदां देवीं सावित्रीं वेदमातरम् |
आदित्यपथगां देवीं स्मरेद्ब्रह्मस्वरूपिणीम् ||

विचित्रमंत्रजननीं स्मरेद्विद्यां सरस्वतीम् |
त्रिपदा ऋङ्मयी पूर्वा मुखी ब्रह्मास्त्रसंज्ञिका ||

चतुर्विंशतितत्त्वाख्या पातु प्राचीं दिशं मम |
चतुष्पादा यजुर्ब्रह्मदंडाख्या पातु दक्षिणा ||

षट्त्रिंशत्तत्त्वयुक्ता सा पातु मे दक्षिणां दिशम् |
प्रत्यङ्मुखी पंचपदी पंचाशत्तत्त्वरूपिणी ||

पातु प्रतीचीमनिशं सामब्रह्मशिरोंकिता |
सौम्या ब्रह्मस्वरूपाख्या साथर्वांगिरसात्मिका ||

उदीचीं षट्पदा पातु चतुःषष्टिकळात्मिका |
पंचाशत्तत्त्वरचिता भवपादा शताक्षरी ||

व्योमाख्या पातु मे चोर्ध्वं दिशं वेदांगसंस्थिता |
विद्युन्निभा ब्रह्मसंज्ञा मृगारूढा चतुर्भुजा ||

चापेषुचर्मासिधरा पातु मे पावकीं दिशम् |
ब्राह्मी कुमारी गायत्री रक्तांगी हंसवाहिनी ||

बिभ्रत्कमंडल्वक्षस्रक्स्रुवान्मे पातु नैरृतीम् |
चतुर्भुजा वेदमाता शुक्लांगी वृषवाहिनी ||

वराऽभयकपालाक्षस्रग्विणी पातु मारुतीम् |
श्यामा सरस्वती वृद्धा वैष्णवी गरुडासना ||

शंखाराब्जाभयकरा पातु शैवीं दिशं मम |
चतुर्भुजा वेदमाता गौरांगी सिंहवाहना ||

वराभयाब्जयुगळैर्भुजैः पात्वधरां दिशम् |
तत्तत्पार्श्वस्थिताः स्वस्ववाहनायुधभूषणाः ||

स्वस्वदिक्षु स्थिताः पांतु ग्रहशक्त्यंगदेवताः |
मंत्राधिदेवतारूपा मुद्राधिष्ठानदेवताः ||

व्यापकत्वेन पात्वस्मानापहृत्तलमस्तकी |
तत्पदं मे शिरः पातु फालं मे सवितुःपदम् ||

वरेण्यं मे दृशौ पातु श्रुतिं भर्गः सदा मम |
घ्राणं देवस्य मे पातु पातु धीमहि मे मुखम् ||

जिह्वां मम धियः पातु कंठं मे पातु यःपदम् |
नः पदं पातु मे स्कंधौ भुजौ पातु प्रचोदयात् ||

करौ मे च परः पातु पादौ मे रजसोऽवतु |
सा मे नाभिं सदा पातु कटिं वै पातुमेवदोम् ||

ओमापः सक्थिनी पातु गुह्यं ज्योतिः सदा मम |
ऊरू मम रसः पातु जानुनी अमृतं मम ||

जंघे ब्रह्मपदं पातु गुल्फौ भूः पातु मे सदा |
पादौ मम भुवः पातु सुवः पात्वखिलं वपुः ||

रोमाणि मे महः पातु लोमकं पातु मे जनः |
प्राणांश्च धातुतत्त्वानि तदीशः पातु मे तपः ||

सत्यं पातु ममायूंषि हंसो वृद्धिं च पातु मे |
शुचिषत्पातु मे शुक्रं वसुः पातु श्रियं मम ||

मतिं पात्वंतरिक्षसद्धोता दानं च पातु मे |
वेदिषत्पातु मे विद्यामतिथिः पातु मे गृहम् ||

धर्मं दुरोणसत्पातु नृषत्पातु वधूं मम |
वरसत्पातु मे मायाऽमृतसत्पातु मे सुतान् ||

व्योमसत्पातु मे बंधून् भ्रातॄनब्जश्च पातु मे |
पशून्मे पातु गोजाश्च ऋतजाः पातु मे भुवम् ||

सर्वं मे अद्रिजा पातु यानं मे पात्वृतं सदा |
मम सर्वं बृहत्पातु विभुरों पातु सर्वदा ||

अनुक्तमथ यत्स्थानं शरीरांतर्बहिश्च यत् |
तत्सर्वं पातु मे नित्यं हंसः सोऽहमहर्निशम् ||

इदं तु कथितं सम्यङ्मया ते ब्रह्मपंजरम् |
संध्ययोः प्रत्यहं भक्त्या जपकाले विशेषतः ||

धारयेद्द्विजवर्यो यः श्रावयेद्वा समाहितः |
स विष्णुः स शिवः सोऽहं सोऽक्षरः स विराट् स्वराट् ||

शताक्षरात्मकं देव्या नामाष्टाविंशतिः शतम् |
शृणु वक्ष्यामि तत्सर्वमति गुह्यं सनातनम् ||

भूतिदा भुवना वाणी वसुधा सुमना मही |
तुर्या शोभा द्विजप्रीता कामधुक् भक्तसिद्धिदा ||

विश्वा च विजया वेद्या संध्या ब्राह्मी सरस्वती |
हरिणी जननी नंदा सविसर्गा तपस्विनी ||

पयस्विनी सती त्यागा चैंदवी सत्यवी रसा |
शैवी लास्यप्रिया तुष्टा जप्या सत्या सती ध्रुवा ||

भक्तवश्या च गायत्री भीमा विष्णुप्रिया जया |
विश्वा तुर्या परा रेच्या निर्घृणी यमिनी भवा ||

गोवेद्या च जरिष्ठा च स्कंदिनी धीर्मतिर्हिमा |
अनंता रविमध्यस्था सावित्री ब्राह्मणी त्रयी ||

अपर्णा चंडिका ध्येया मनुश्रेष्ठा च सात्विकी |
भीषणा योगिनी पक्षी नदी प्रज्ञा च चोदिनी ||

धनिनी यामिनी पद्मा रोहिणी रमणी ऋषिः |
ब्रह्मिष्ठा भक्तिगम्या च कामदा बलदा वसुः ||

आद्या वर्णमयी हृद्या लक्ष्मीः शांता रमाऽच्युता |
सेनामुखी साममयी बहुळा दोषवर्जिता ||

सर्वकामदुघा सोमोद्भवाऽहंकारवर्जिता |
तत्परा सुखदा सिद्धिः वेद्या पूज्या प्रसादिनी ||

विप्रप्रसादिनी पूज्या विश्ववंद्या विनोदिनी |
द्विपदा च चतुष्पादा त्रिपदा चैव षट्पदा ||

अष्टापदी नवपदी सा सहस्राक्षरात्मिका |
अमोघफलदाऽनादिः सर्वा सर्वांगसुंदरी ||

शर्वाणी वैष्णवी चंद्रचूडा त्रिणयना क्षमा |
विश्वमाता त्रयीसारा त्रिकालज्ञानरूपिणी ||

चंद्रमंडलमध्यस्था भक्तपापविनाशिनी |
वरदा छंदसां माता ब्राह्मण्यपददायिनी ||

य इदं परमं गुह्यं सावित्रीमंत्रपंजरम् |
नामाष्टविंशतिशतं शृणुयाच्छ्रावयेत्पठेत् ||

मर्त्यानाममृतत्त्वाय भीतानामभयाय च |
मोक्षाय च मुमुक्षूणां श्रीकामानां श्रिये सदा ||

विजयाय युयुत्सूनां व्याधितानामरोगकृत् |
वश्याय वश्यकामानां विद्यायै वेदकामिनाम् ||

द्रविणाय दरिद्राणां पापिनां पापशांतये |
वादिनां वादविजये कवीनां कविताप्रदम् ||

अन्नाय क्षुधितानां च स्वर्गाय स्वर्गमिच्छताम् |
पशुभ्यः पशुकामानां पुत्रेभ्यः पुत्रकांक्षिणाम् ||

क्लेशिनां शोकशांत्यर्थं नृणां शत्रुभयाय च |
राजवश्याय द्रष्टव्यं पंजरं नृपसेविनाम् ||

भक्त्यर्थं विष्णुभक्तानां विष्णोः सर्वांतरात्मनि |
नायकं विधिसृष्टानां शांतये भवति ध्रुवम् ||

निःस्पृहाणां नृणां मुक्तिः शाश्वती भवती ध्रुवम् |
जप्यं त्रिवर्गसंयुक्तं गृहस्थेन विशेषतः ||

मुनीनां ज्ञानसिद्ध्यर्थं यतीनां मोक्षसिद्धये |
उद्यंतं चंद्रकिरणमुपस्थाय कृतांजलिः ||

कानने वा स्वभवने तिष्ठंछुद्धो जपेदिदम् |
सर्वान्कामानवाप्नोति तथैव शिवसन्निधौ ||

मम प्रीतिकरं दिव्यं विष्णुभक्तिविवर्धनम् |
ज्वरार्तानां कुशाग्रेण मार्जयेत्कुष्ठरोगिणाम् ||

मृगमंगं यथालिंगं कवचेन तु साधकः |
मंडलेन विशुद्ध्येत सर्वरोगैर्न संशयः ||

मृतप्रजा च या नारी जन्मवंध्या तथैव च |
कन्यादिवंध्या या नारी तासामंगं प्रमार्जयेत् ||

तास्ताः संवत्सरादर्वाग्ध्रियेयुर्गर्भमुत्तमम् |
पतिविद्वेषिणी या स्त्री अंगं तस्याः प्रमार्जयेत् ||

तमेव भजते सा स्त्री पतिं कामवशं नयेत् |
अश्वत्थे राजवश्यार्थं बिल्वमूले सुरूपभाक् ||

पालाशमूले विद्यार्थी तेजस्व्यभिमुखो रवेः |
कन्यार्थी चंडिकागेहे जपेच्छत्रुभयाय च ||

श्रीकामो विष्णुगेहे च उद्याने स्त्रीर्वशी भवेत् |
आरोग्यार्थे स्वगेहे च मोक्षार्थी शैलमस्तके ||

सर्वकामो विष्णुगेहे मोक्षार्थी यत्र कुत्रचित् |
जपारंभे तु हृदयं जपांते कवचं पठेत् ||

किमत्र बहुनोक्तेन शृणु नारद तत्त्वतः |
यं यं चिंतयते नित्यं तं तं प्राप्नोति निश्चितम् ||

इति श्रीमद्वसिष्ठसंहितायां ब्रह्मनारदसंवादे श्री गायत्री पंजर स्तोत्रम् |
गमनिक
: पैन इव्वबडिन स्तोत्रमु
(श्लोकालु मात्रमे)
, ई क्रिंदि पुस्तकमुलो कूडा उन्नदि.
श्री गायत्री स्तोत्रनिधि
(नित्य पारायण ग्रंथमु)
मरिन्नि
श्री गायत्री स्तोत्रालु
चूडंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु