Sri Varaha Kavacham

तॆलुगु
स्तोत्रनिधि
श्री विष्णु स्तोत्रालु
आद्यं रंगमिति प्रोक्तं विमानं रंगसंज्ञितम् |
श्रीमुष्णं वेंकटाद्रिं च सालग्रामं च नैमिशम् ||

तोयाद्रिं पुष्करं चैव नरनारायणाश्रमम् |
अष्टौ मे मूर्तयः संति स्वयंव्यक्ता महीतले ||

श्रीसूत उवाच |
श्रीरुद्रमुखनिर्णीतमुरारिगुणसत्कथा |
संतुष्टा पार्वती प्राह शंकरं लोकशंकरम् ||

श्रीपार्वत्युवाच |
श्रीमुष्णेशस्य माहात्म्यं वराहस्य महात्मनः |
श्रुत्वा तृप्तिर्न मे जाता मनः कौतूहलायते |
श्रोतुं तद्देवमाहात्म्यं तस्माद्वर्णय मे पुनः ||

श्रीशंकर उवाच |
शृणु देवि प्रवक्ष्यामि श्रीमुष्णेशस्य वैभवम् |
यस्य श्रवणमात्रेण महापापैः प्रमुच्यते |
सर्वेषामेव तीर्थानां तीर्थराजोऽभिधीयते ||

नित्यपुष्करिणी नाम्नी श्रीमुष्णे या च वर्तते |
जाता श्रमापहा पुण्या वराहश्रमवारिणा ||

विष्णोरंगुष्ठसंस्पर्शात् पुण्यदा खलु जाह्नवी |
विष्णोः सर्वांगसंभूता नित्यपुष्करिणी शुभा ||

महानदी सहस्रेण नित्यदा संगता शुभा |
सकृत् स्नात्वा विमुक्ताघः सद्यो याति हरेः पदम् ||

तस्या आग्नेयभागे तु अश्वत्थच्छाययोदके |
स्नानं कृत्वा पिप्पलस्य कृत्वा चापि प्रदक्षिणम् ||

दृष्ट्वा श्वेतवराहं च मासमेकं नयेद्यदि |
कालमृत्युं विनिर्जित्य श्रिया परमया युतः ||

आधिव्याधिविनिर्मुक्तो ग्रहपीडाविवर्जितः |
भुक्त्वा भोगाननेकांश्च मोक्षमंते व्रजेत् ध्रुवम् ||

अश्वत्थमूलेऽर्कवारे नित्यपुष्करिणीतटे |
वराहकवचं जप्त्वा शतवारं जितेंद्रियः ||

क्षयापस्मारकुष्ठाद्यैः महारोगैः प्रमुच्यते |
वराहकवचं यस्तु प्रत्यहं पठते यदि ||

शत्रुपीडाविनिर्मुक्तो भूपतित्वमवाप्नुयात् |
लिखित्वा धारयेद्यस्तु बाहुमूले गलेऽथ वा ||

भूतप्रेतपिशाचाद्याः यक्षगंधर्वराक्षसाः |
शत्रवो घोरकर्माणो ये चान्ये विषजंतवः |
नष्टदर्पा विनश्यंति विद्रवंति दिशो दश ||

श्रीपार्वत्युवाच |
तद्ब्रूहि कवचं मह्यं येन गुप्तो जगत्त्रये |
संचरेद्देववन्मर्त्यः सर्वशत्रुविभीषणः |
येनाप्नोति च साम्राज्यं तन्मे ब्रूहि सदाशिव ||

श्रीशंकर उवाच |
शृणु कल्याणि वक्ष्यामि वाराहकवचं शुभम् |
येन गुप्तो लभेन्मर्त्यो विजयं सर्वसंपदम् ||

अंगरक्षाकरं पुण्यं महापातकनाशनम् |
सर्वरोगप्रशमनं सर्वदुर्ग्रहनाशनम् ||

विषाभिचारकृत्यादिशत्रुपीडानिवारणम् |
नोक्तं कस्यापि पूर्वं हि गोप्याद्गोप्यतरं यतः ||

वराहेण पुरा प्रोक्तं मह्यं च परमेष्ठिने |
युद्धेषु जयदं देवि शत्रुपीडानिवारणम् ||

वराहकवचाद्गुप्तो नाऽशुभं लभते नरः |
वराहकवचस्यास्य ऋषिर्ब्रह्मा प्रकीर्तितः ||

छंदोऽनुष्टुप् तथा देवो वराहो भूपरिग्रहः |
प्रक्षाल्य पादौ पाणी च सम्यगाचम्य वारिणा ||

कृतस्वांगकरन्यासः सपवित्र उदङ्मुखः |
ॐ भूर्भवः सुवरिति नमो भूपतयेऽपि च ||

नमो भगवते पश्चात् वराहाय नमस्तथा |
एवं षडंगं न्यासं च न्यसेदंगुलिषु क्रमात् ||

नमः श्वेतवराहाय महाकोलाय भूपते |
यज्ञांगाय शुभांगाय सर्वज्ञाय परात्मने ||

स्रवतुंडाय धीराय परब्रह्मस्वरूपिणे |
वक्रदंष्ट्राय नित्याय नमोऽंतैर्नामभिः क्रमात् ||

अंगुळीषु न्यसेद्विद्वान् करपृष्ठतलेष्वपि |
ध्यात्वा श्वेतवराहं च पश्चान्मंत्रमुदीरयेत् ||

ॐ | श्वेतं वराहवपुषं क्षितिमुद्धरंतं
शंघारिसर्ववरदाऽभययुक्तबाहुम् |
ध्यायेन्निजैश्च तनुभिः सकलैरुपेतं
पूर्णं विभुं सकलवांछितसिद्धयेऽजम् ||

वराहः पूर्वतः पातु दक्षिणे दंडकांतकः |
हिरण्याक्षहरः पातु पश्चिमे गदया युतः ||

उत्तरे भूमिहृत् पातु अधस्ताद्वायुवाहनः |
ऊर्ध्वं पातु हृषीकेशो दिग्विदिक्षु गदाधरः ||

प्रातः पातु प्रजानाथः कल्पकृत् संगमेऽवतु |
मध्याह्ने वज्रकेशस्तु सायाह्ने सर्वपूजितः ||

प्रदोषे पातु पद्माक्षो रात्रौ राजीवलोचनः |
निशींद्रगर्वहा पातु पातूषः परमेश्वरः ||

अटव्यामग्रजः पातु गमने गरुडासनः |
स्थले पातु महातेजाः जले पात्ववनीपतिः ||

गृहे पातु गृहाध्यक्षः पद्मनाभः पुरोऽवतु |
झिल्लिकावरदः पातु स्वग्रामे करुणाकरः ||

रणाग्रे दैत्यहा पातु विषमे पातु चक्रभृत् |
रोगेषु वैद्यराजस्तु कोलो व्याधिषु रक्षतु ||

तापत्रयात् तपोमूर्तिः कर्मपाशाच्च विश्वकृत् |
क्लेशकालेषु सर्वेषु पातु पद्मापतिर्विभुः ||

हिरण्यगर्भसंस्तुत्यः पादौ पातु निरंतरम् |
गुल्फौ गुणाकरः पातु जंघे पातु जनार्दनः ||

जानू च जयकृत् पातु पातूरू पुरुषोत्तमः |
रक्ताक्षो जघने पातु कटिं विश्वंभरोऽवतु ||

पार्श्वे पातु सुराध्यक्षः पातु कुक्षिं परात्परः |
नाभिं ब्रह्मपिता पातु हृदयं हृदयेश्वरः ||

महादंष्ट्रः स्तनौ पातु कंठं पातु विमुक्तिदः |
प्रभंजनपतिर्बाहू करौ कामपिताऽवतु ||

हस्तौ हंसपतिः पातु पातु सर्वांगुलीर्हरिः |
सर्वांगश्चिबुकं पातु पात्वोष्ठौ कालनेमिहा ||

मुखं तु मधुहा पातु दंतान् दामोदरोऽवतु |
नासिकामव्ययः पातु नेत्रे सूर्येंदुलोचनः ||

फालं कर्मफलाध्यक्षः पातु कर्णौ महारथः |
शेषशायी शिरः पातु केशान् पातु निरामयः ||

सर्वांगं पातु सर्वेशः सदा पातु सतीश्वरः |
इतीदं कवचं पुण्यं वराहस्य महात्मनः ||

यः पठेत् शृणुयाद्वापि तस्य मृत्युर्विनश्यति |
तं नमस्यंति भूतानि भीताः सांजलिपाणयः ||

राजदस्युभयं नास्ति राज्यभ्रंशो न जायते |
यन्नामस्मरणाद्भीताः भूतवेताळराक्षसाः ||

महारोगाश्च नश्यंति सत्यं सत्यं वदाम्यहम् |
कंठे तु कवचं बद्ध्वा वंध्या पुत्रवती भवेत् ||

शत्रुसैन्यक्षयप्राप्तिः दुःखप्रशमनं तथा |
उत्पातदुर्निमित्तादिसूचितारिष्टनाशनम् ||

ब्रह्मविद्याप्रबोधं च लभते नात्र संशयः |
धृत्वेदं कवचं पुण्यं मांधाता परवीरहा ||

जित्वा तु शांबरीं मायां दैत्येंद्रानवधीत् क्षणात् |
कवचेनावृतो भूत्वा देवेंद्रोऽपि सुरारिहा ||

भूम्योपदिष्टकवचधारणान्नरकोऽपि च |
सर्वावध्यो जयी भूत्वा महतीं कीर्तिमाप्तवान् ||

अश्वत्थमूलेऽर्कवारे नित्य पुष्करिणीतटे |
वराहकवचं जप्त्वा शतवारं पठेद्यदि ||

अपूर्वराज्यसंप्राप्तिं नष्टस्य पुनरागमम् |
लभते नात्र संदेहः सत्यमेतन्मयोदितम् ||

जप्त्वा वराहमंत्रं तु लक्षमेकं निरंतरम् |
दशांशं तर्पणं होमं पायसेन घृतेन च ||

कुर्वन् त्रिकालसंध्यासु कवचेनावृतो यदि |
भूमंडलाधिपत्यं च लभते नात्र संशयः ||

इदमुक्तं मया देवि गोपनीयं दुरात्मनाम् |
वराहकवचं पुण्यं संसारार्णवतारकम् ||

महापातककोटिघ्नं भुक्तिमुक्तिफलप्रदम् |
वाच्यं पुत्राय शिष्याय सद्वृताय सुधीमते ||

श्रीसूत उवाच |
इति पत्युर्वचः श्रुत्वा देवी संतुष्टमानसा |
विनायकगुहौ पुत्रौ प्रपेदे द्वौ सुरार्चितौ ||

कवचस्य प्रभावेन लोकमाता च पार्वती |
य इदं शृणुयान्नित्यं यो वा पठति नित्यशः |
स मुक्तः सर्वपापेभ्यो विष्णुलोके महीयते ||

इति श्री वराह कवचम् |
मरिन्नि
श्री विष्णु स्तोत्रालु
चूडंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु