Sri Bala Tripurasundari Sahasranama Stotram 2

तॆलुगु
स्तोत्रनिधि
श्री बाला स्तोत्रालु
गमनिक
: ई स्तोत्रमु
(श्लोकालु मात्रमे)
श्री बाला स्तोत्रनिधि
” पारायण ग्रंथमुलो कूडा उन्नदि.
शौनक उवाच |
कैलासशिखरे रम्ये नानापुष्पोपशोभिते |
कल्पपादपमध्यस्थे गंधर्वगणसेविते ||

मणिमंडपमध्यस्थे नानारत्नोपशोभिते |
तं कदाचित् सुखासीनं भगवंतं जगद्गुरुम् ||

कपालखट्वांगधरं चंद्रार्धकृतशेखरम् |
त्रिशूलडमरुधरं महावृषभवाहनम् ||

जटाजूटधरं देवं वासुकिकंठभूषणम् |
विभूतिभूषणं देवं नीलकंठं त्रिलोचनम् ||

द्वीपिचर्मपरीधानं शुद्धस्फटिकसन्निभम् |
सहस्रादित्यसंकाशं गिरिजार्धांगभूषणम् ||

प्रणम्य शिरसा नाथं कारणं विश्वरूपिणम् |
कृतांजलिपुटो भूत्वा प्राह तं शिखिवाहनः ||

कार्तिकेय उवाच |
देवदेव महादेव सृष्टिस्थित्यंतकारक |
त्वं गतिः सर्वदेवानां त्वं गतिः सर्वदेहिनाम् ||

त्वं गतिः सर्वदेवानां सर्वेषां त्वं गतिर्विभो |
त्वमेव जगदाधारस्त्वमेव विश्वकारणम् ||

त्वमेव पूज्यः सर्वेषां त्वदन्यो नास्ति मे गतिः |
किं गुह्यं परमं लोके किमेकं सर्वसिद्धिदम् ||

किमेकं परमं सृष्टिः किं भौमैश्वर्यमोक्षदम् |
विना तीर्थेन तपसा विना वेदैर्विना मखैः ||

विना जाप्येन ध्यानेन कथं सिद्धिमवाप्नुयात् |
कस्मादुत्पद्यते सृष्टिः कस्मिंश्च विलयो भवेत् ||

कस्मादुत्तीर्यते देव संसारार्णवसंकटात् |
तदहं श्रोतुमिच्छामि कथयस्व महेश्वर ||

श्रीमहादेव उवाच |
साधु साधु त्वया पृष्टोऽस्म्यहं पार्वतीनंदन |
अस्ति गुह्यतमं पुत्र कथयिष्याम्यसंशयम् ||

सत्त्वं रजस्तमश्चैव ब्रह्मविष्णुशिवादयः |
ये चान्ये बहवो भूताः सर्वे प्रकृतिसंभवाः ||

सैव देवी पराशक्तिर्महात्रिपुरसुंदरी |
सैव संहरते विश्वं जगदेतच्चराचरम् ||

आधारं सर्वभूतानां सैव रोगार्तिहारिणी |
इच्छाशक्तिः क्रियारूपा ब्रह्मविष्णुशिवात्मिका ||

त्रिधा शक्तिस्वरूपेण सृष्टिस्थितिविनाशिनी |
सृजति ब्रह्मरूपेण विष्णुरूपेण रक्षति ||

हरते रुद्ररूपेण जगदेतच्चराचरम् |
यस्य योनौ जगत्सर्वमद्यापि वर्ततेऽखिलम् ||

यस्यां प्रलीयते चांते यस्यां च जायते पुनः |
यां समाराध्य त्रैलोक्ये संप्राप्तं पदमुत्तमम् |
तस्याः नामसहस्रं ते कथयामि शृणुष्व तत् ||

अस्य श्रीबालासहस्रनामस्तोत्रमंत्रस्य, भगवान् दक्षिणामुर्तिर्वामदेव ऋषिः, गायत्री छंदः, प्रकट गुप्त गुप्ततर संप्रदाय कुल कौलोत्तीर्णा निगर्भ रहस्यातिरहस्य परापररहस्या चिंत्य वर्तिनी बाला देवता, आं बीजं, ह्रीं शक्तिः, क्लीं कीलकं, श्रीबालाप्रीत्यर्थे पारायणे विनियोगः |
ध्यानं –
आधारे तरुणार्कबिंबसदृशं हेमप्रभं वाग्भवं
बीजं मान्मथमिंद्रगोपसदृशं हृत्पंकजे संस्थितम् |
चक्रं भालमयं शशांकरुचिरं बीजं तु तार्तीयकं
ये ध्यायंति पदत्रयं तव शिवे ते यांति सूक्ष्मां गतिम् ||

कल्याणी कमला काली कराळी कामरूपिणी |
कामाक्षा कामदा काम्या कामना कामचारिणी ||

कौमारी करुणामूर्तिः कलिकल्मषनाशिनी |
कात्यायनी कळाधारा कौमुदी कमलप्रिया ||

कीर्तिदा बुद्धिदा मेधा नीतिज्ञा नीतिवत्सला |
माहेश्वरी महामाया महातेजा महेश्वरी ||

कालरात्रिर्महारात्रिः कालिंदी कल्परूपिणी |
महाजिह्वा महालोला महादंष्ट्रा महाभुजा ||

महामोहांधकारघ्नी महामोक्षप्रदायिनी |
महादारिद्र्यराशिघ्नी महाशत्रुविमर्दिनी ||

महाशक्तिर्महाज्योतिर्महासुरविमर्दिनी |
महाकाया महाबीजा महापातकनाशिनी ||

महामखा मंत्रमयी मणिपुरनिवासिनी |
मानसी मानदा मान्या मनश्चक्षुरगोचरा ||

गणमाता च गायत्री गणगंधर्वसेविता |
गिरिजा गिरिशा साध्वी गिरिसूर्गिरिसंभवा ||

चंडेश्वरी चंद्ररूपा प्रचंडा चंडमालिनी |
चर्चिका चर्चिताकारा चंडिका चारुरूपिणी ||

यज्ञेश्वरी यज्ञरूपा जपयज्ञपरायणा |
यज्ञमाता यज्ञगोप्त्री यज्ञेशी यज्ञसंभवा ||

यज्ञसिद्धिः क्रियासिद्धिर्यज्ञांगी यज्ञरक्षका |
यज्ञप्रिया यज्ञरूपा याज्ञी यज्ञकृपालया ||

जालंधरी जगन्माता जातवेदा जगत्प्रिया |
जितेंद्रिया जितक्रोधा जननी जन्मदायिनी ||

गंगा गोदावरी गौरी गौतमी च शतह्रदा |
घुर्घुरा वेदगर्भा च रेविका करसंभवा ||

सिंधुर्मंदाकिनी क्षिप्रा यमुना च सरस्वती |
चंद्रभागा विपाशा च गंडकी विंध्यवासिनी ||

नर्मदा कन्हा कावेरी वेत्रवत्या च कौशिकी |
महोनतनया चैव अहल्या चंपकावती ||

अयोध्या मथुरा माया काशी कांची अवंतिका |
द्वारावती च तीर्थेशी महाकिल्बिषनाशिनी ||

पद्मिनी पद्ममध्यस्था पद्मकिंजल्कवासिनी |
पद्मवक्त्रा च पद्माक्षी पद्मस्था पद्मसंभवा ||

ह्रींकारी कुंडली धात्री हृत्पद्मस्था सुलोचना |
श्रींकारी भूषणा लक्ष्मीः क्लींकारी क्लेशनाशिनी ||

हरिप्रिया हरेर्मूर्तिर्हरिनेत्रकृतालया |
हरिवक्त्रोद्भवा शांता हरिवक्षःस्थलस्थिता ||

वैष्णवी विष्णुरूपा च विष्णुमातृस्वरूपिणी |
विष्णुमाया विशालाक्षी विशालनयनोज्ज्वला ||

विश्वेश्वरी च विश्वात्मा विश्वेशी विश्वरूपिणी |
शिवेश्वरी शिवाधारा शिवनाथा शिवप्रिया || [विश्वेश्वरी]

शिवमाता शिवाक्षी च शिवदा शिवरूपिणी |
भवेश्वरी भवाराध्या भवेशी भवनायिका ||

भवमाता भवागम्या भवकंटकनाशिनी |
भवप्रिया भवानंदा भवानी भवमोचिनी ||

गीतिर्वरेण्या सावित्री ब्रह्माणी ब्रह्मरूपिणी |
ब्रह्मेशी ब्रह्मदा ब्राह्मी ब्रह्माणी ब्रह्मवादिनी ||

दुर्गस्था दुर्गरूपा च दुर्गा दुर्गार्तिनाशिनी |
त्रयीदा ब्रह्मदा ब्राह्मी ब्रह्माणी ब्रह्मवादिनी ||

त्वक्स्था तथा च त्वग्रूपा त्वग्गा त्वगार्तिहारिणी |
स्वर्गमा निर्गमा दात्री दाया दोग्ध्री दुरापहा ||

दूरघ्नी च दुराराध्या दूरदुष्कृतिनाशिनी |
पंचस्था पंचमी पूर्णा पूर्णापीठनिवासिनी ||

सत्त्वस्था सत्त्वरूपा च सत्त्वदा सत्त्वसंभवा |
रजःस्था च रजोरूपा रजोगुणसमुद्भवा ||

तामसी च तमोरूपा तमसी तमसः प्रिया |
तमोगुणसमुद्भूता सात्त्विकी राजसी तमी ||

कळा काष्ठा निमेषा च स्वकृता तदनंतरा |
अर्धमासा च मासा च संवत्सरस्वरूपिणी ||

युगस्था युगरूपा च कल्पस्था कल्परूपिणी |
नानारत्नविचित्रांगी नानाभरणमंडिता ||

विश्वात्मिका विश्वमाता विश्वपाशा विधायिनी |
विश्वासकारिणी विश्वा विश्वशक्तिर्विचक्षणा ||

जपाकुसुमसंकाशा दाडिमीकुसुमोपमा |
चतुरंगा चतुर्बाहुश्चतुरा चारुहासिनी ||

सर्वेशी सर्वदा सर्वा सर्वज्ञा सर्वदायिनी |
सर्वेश्वरी सर्वविद्या शर्वाणी सर्वमंगळा ||

नलिनी नंदिनी नंदा आनंदानंदवर्धिनी |
व्यापिनी सर्वभूतेषु भवभारविनाशिनी ||

कुलीना कुलमध्यस्था कुलधर्मोपदेशिनी |
सर्वशृंगारवेषाढ्या पाशांकुशकरोद्यता ||

सूर्यकोटिसहस्राभा चंद्रकोटिनिभानना |
गणेशकोटिलावण्या विष्णुकोट्यरिमर्दिनी ||

दावाग्निकोटिज्वलिनी रुद्रकोट्युग्ररूपिणी |
समुद्रकोटिगंभीरा वायुकोटिमहाबला ||

आकाशकोटिविस्तारा यमकोटिभयंकरा |
मेरुकोटिसमुच्छ्राया गुणकोटिसमृद्धिदा ||

निष्कळंका निराधारा निर्गुणा गुणवर्जिता |
अशोका शोकरहिता तापत्रयविवर्जिता ||

विशिष्टा विश्वजननी विश्वमोहविधारिणी |
चित्रा विचित्रा चित्राशी हेतुगर्भा कुलेश्वरी ||

इच्छाशाक्तिः ज्ञानशक्तिः क्रियाशक्तिः शुचिस्मिता |
श्रुतिस्मृतिमयी सत्या श्रुतिरूपा श्रुतिप्रिया ||

श्रुतिप्रज्ञा महासत्या पंचतत्त्वोपरिस्थिता |
पार्वती हिमवत्पुत्री पाशस्था पाशरूपिणी ||

जयंती भद्रकाळी च अहल्या कुलनायिका |
भूतधात्री च भूतेशी भूतस्था भूतभाविनी ||

महाकुंडलिनीशक्तिर्महाविभववर्धिनी |
हंसाक्षी हंसरूपा च हंसस्था हंसरूपिणी ||

सोमसूर्याग्निमध्यस्था मणिपूरकवासिनी |
षट्पत्रांभोजमध्यस्था मणिपूरनिवासिनी ||

द्वादशारसरोजस्था सूर्यमंडलवासिनी |
अकलंका शशांकाभा षोडशारनिवासिनी ||

द्विपत्रदळमध्यस्था ललाटतलवासिनी |
डाकिनी शाकिनी चैव लाकिनी काकिनी तथा ||

राकिणी हाकिनी चैव षट्चक्रक्रमवासिनी |
सृष्टिस्थितिविनाशा च सृष्टिस्थित्यंतकारिणी ||

श्रीकंठा श्रीप्रिया कंठनादाख्या बिंदुमालिनी |
चतुःषष्टिकळाधारा मेरुदंडसमाश्रया ||

महाकाळी द्युतिर्मेधा स्वधा तुष्टिर्महाद्युतिः |
हिंगुला मंगळशिवा सुषुम्णामध्यगामिनी ||

परा घोरा करालाक्षी विजया जयशालिनी |
हृत्पद्मनिलया देवी भीमा भैरवनादिनी ||

आकाशलिंगसंभूता भुवनोद्यानवासिनी |
महासूक्ष्माऽभया काळी भीमरूपा महाबला ||

मेनकागर्भसंभूता तप्तकांचनसन्निभा |
अंतःस्था कूटबीजा च त्रिकूटाचलवासिनी ||

वर्णाक्षा वर्णरहिता पंचाशद्वर्णभेदिनी |
विद्याधरी लोकधात्री अप्सरा अप्सरःप्रिया ||

दक्षा दाक्षायणी दीक्षा दक्षयज्ञविनाशिनी |
यशस्विनी यशःपूर्णा यशोदागर्भसंभवा ||

देवकी देवमाता च राधिका कृष्णवल्लभा |
अरुंधती शचींद्राणी गांधारी गंधमोदिनी ||

ध्यानातीता ध्यानगम्या ध्याना ध्यानावधारिणी |
लंबोदरी च लंबोष्ठा जांबवती जलोदरी ||

महोदरी मुक्तकेशी मुक्तिकामार्थसिद्धिदा |
तपस्विनी तपोनिष्ठा चापर्णा पर्णभक्षिणी ||

बाणचापधरा वीरा पांचाली पंचमप्रिया |
गुह्या गभीरा गहना गुह्यतत्त्वा निरंजना ||

अशरीरा शरीरस्था संसारार्णवतारिणी |
अमृता निष्कळा भद्रा सकला कृष्णपिंगळा ||

चक्रेश्वरी चक्रहस्ता पाशचक्रनिवासिनी |
पद्मरागप्रतीकाशा निर्मलाकाशसन्निभा ||

ऊर्ध्वस्था ऊर्ध्वरूपा च ऊर्ध्वपद्मनिवासिनी |
कार्यकारणकर्त्री च पर्वाख्या रूपसंस्थिता ||

रसज्ञा रसमध्यस्था गंधज्ञा गंधरूपिणी |
परब्रह्मस्वरूपा च परब्रह्मनिवासिनी ||

शब्दब्रह्मस्वरूपा च शब्दस्था शब्दवर्जिता |
सिद्धिर्वृद्धिपरा वृद्धिः सत्कीर्तिर्दीप्तिसंस्थिता ||

स्वगुह्या शांभवीशक्तिस्तत्त्वज्ञा तत्त्वरूपिणी |
सरस्वती भूतमाता महाभूताधिपप्रिया ||

श्रुतिप्रज्ञादिमा सिद्धिः दक्षकन्याऽपराजिता |
कामसंदीपिनी कामा सदाकामा कुतूहला ||

भोगोपचारकुशला अमला ह्यमलानना |
भक्तानुकंपिनी मैत्री शरणागतवत्सला ||

सहस्रभुजा चिच्छक्तिः सहस्राक्षा शतानना |
सिद्धलक्ष्मीर्महालक्ष्मीर्वेदलक्ष्मीः सुलक्षणा ||

यज्ञसारा तपःसारा धर्मसारा जनेश्वरी |
विश्वोदरी विश्वसृष्टा विश्वाख्या विश्वतोमुखी ||

विश्वास्यश्रवणघ्राणा विश्वमाला परात्मिका |
तरुणादित्यसंकाशा करणानेकसंकुला ||

क्षोभिणी मोहिनी चैव स्तंभिनी जृंभिणी तथा |
रथिनी ध्वजिनी सेना सर्वमंत्रमयी त्रयी ||

ज्ञानमुद्रा महामुद्रा जपमुद्रा महोत्सवा |
जटाजूटधरा मुक्ता सूक्ष्मशांतिर्विभीषणा ||

द्वीपिचर्मपरीधाना चीरवल्कलधारिणी |
त्रिशूलडमरुधरा नरमालाविभूषिणी ||

अत्युग्ररूपिणी चोग्रा कल्पांतदहनोपमा |
त्रैलोक्यसाधिनी साध्या सिद्धसाधकवत्सला ||

सर्वविद्यामयी सारा असुरांबुधिधारिणी |
सुभगा सुमुखी सौम्या सुशूरा सोमभूषणा ||

शुद्धस्फटिकसंकशा महावृषभवाहिनी |
महिषी महिषारूढा महिषासुरघातिनी ||

दमिनी दामिनी दांता दया दोग्ध्री दुरापहा |
अग्निजिह्वा महाघोराऽघोरा घोरतरानना ||

नारायणी नारसिंही नृसिंहहृदयस्थिता |
योगेश्वरी योगरूपा योगमाला च योगिनी ||

खेचरी भूचरी खेला निर्वाणपदसंश्रया |
नागिनी नागकन्या च सुवेगा नागनायिका ||

विषज्वालावती दीप्ता कलाशतविभूषणा |
भीमवक्त्रा महावक्त्रा वक्त्राणां कोटिधारिणी ||

महदात्मा च धर्मज्ञा धर्मातिसुखदायिनी |
कृष्णमूर्तिर्महामूर्तिर्घोरमूर्तिर्वरानना ||

सर्वेंद्रियमनोन्मत्ता सर्वेंद्रियमनोमयी |
सर्वसंग्रामजयदा सर्वप्रहरणोद्यता ||

सर्वपीडोपशमनी सर्वारिष्टविनाशिनी |
सर्वैश्वर्यसमुत्पत्तिः सर्वग्रहविनाशिनी ||

भीतिघ्नी भक्तिगम्या च भक्तानामार्तिनाशिनी |
मातंगी मत्तमातंगी मातंगगणमंडिता ||

अमृतोदधिमध्यस्था कटिसूत्रैरलंकृता |
अमृतद्वीपमध्यस्था प्रबला वत्सलोज्ज्वला ||

मणिमंडपमध्यस्था रत्नसिंहासनस्थिता |
परमानंदमुदिता ईषत्प्रहसितानना ||

कुमुदा ललिता लोला लाक्षालोहितलोचना |
दिग्वासा देवदूती च देवदेवादिदेवता ||

सिंहोपरिसमारूढा हिमाचलनिवासिनी |
अट्टाट्टहासिनी घोरा घोरदैत्यविनाशिनी ||

अत्युग्रा रक्तवसना नागकेयूरमंडिता |
मुक्ताहारस्तनोपेता तुंगपीनपयोधरा ||

रक्तोत्पलदलाकारा मदाघूर्णितलोचना |
गंडमंडितताटंका गुंजाहारविभूषणा ||

संगीतरंगरसना वीणावाद्यकुतूहला |
समस्तदेवमूर्तिश्च ह्यसुरक्षयकारिणी ||

खड्गिनी शूलहस्ता च चक्रिणी चाक्षमालिनी |
पाशिनी चक्रिणी दांता वज्रिणी वज्रदंडिनी ||

आनंदोदधिमध्यस्था कटिसूत्रैरलंकृता |
नानाभरणदीप्तांगी नानामणिविभूषणा ||

जगदानंदसंभूतिश्चिंतामणिगुणाकरा |
त्रैलोक्यनमिता पूज्या चिन्मयाऽऽनंदरूपिणी ||

त्रैलोक्यनंदिनी देवी दुःखदुःस्वप्ननाशिनी |
घोराग्निदाहशमनी राजदैवादिशालिनी ||

महापराधराशिघ्नी महावैरिभयापहा |
रागादिदोषरहिता जरामरणवर्जिता ||

चंद्रमंडलमध्यस्था पीयूषार्णवसंभवा |
सर्वदेवैः स्तुता देवी सर्वसिद्धिनमस्कृता ||

अचिंत्यशक्तिरूपा च मणिमंत्रमहौषधी |
स्वस्तिः स्वस्तिमती बाला मलयाचलसंस्थिता ||

धात्री विधात्री संहारा रतिज्ञा रतिदायिनी |
रुद्राणी रुद्ररूपा च रौद्री रौद्रार्तिहारिणी ||

सर्वज्ञा चौरधर्मज्ञा रसज्ञा दीनवत्सला |
अनाहता त्रिनयना निर्भरा निर्वृतिः परा ||

परा घोरकरालाक्षी स्वमाता प्रियदायिनी |
मंत्रात्मिका मंत्रगम्या मंत्रमाता समंत्रिणी ||

शुद्धानंदा महाभद्रा निर्द्वंद्वा निर्गुणात्मिका |
धरणी धारिणी पृथ्वी धरा धात्री वसुंधरा ||

मेरुमंदिरमध्यस्था शिवा शंकरवल्लभा |
श्रीगतिः श्रीमती श्रेष्ठा श्रीकरी श्रीविभावनी ||

श्रीदा श्रीमा श्रीनिवासा श्रीमती श्रीमतां गतिः |
उमा शारंगिणी कृष्णा कुटिला कुटिलालका ||

त्रिलोचना त्रिलोकात्मा पुण्यदा पुण्यकीर्तिदा |
अमृता सत्यसंकल्पा सत्याशा ग्रंथिभेदिनी ||

परेशा परमा विद्या पराविद्या परात्परा |
सुंदरांगी सुवर्णाभा सुरासुरनमस्कृता ||

प्रजा प्रजावती धन्या धनधान्यसमृद्धिदा |
ईशानी भुवनेशानी भुवना भुवनेश्वरी ||

अनंताऽनंतमहिमा जगत्सारा जगद्भवा |
अचिंत्यशक्तिमहिमा चिंत्याचिंत्यस्वरूपिणी ||

ज्ञानगम्या ज्ञानमूर्तिर्ज्ञानदा ज्ञानशालिनी |
अमिता घोररूपा च सुधाधारा सुधावहा ||

भास्करी भासुरी भाती भास्वदुत्तानशायिनी |
अनसूया क्षमा लज्जा दुर्लभा भुवनांतिका ||

विश्ववंद्या विश्वबीजा विश्वधीर्विश्वसंस्थिता |
शीलस्था शीलरूपा च शीला शीलप्रदायिनी ||

बोधिनी बोधकुशला रोधिनी बाधिनी तथा |
विद्योतिनी विचित्रात्मा विद्युत्पटलसन्निभा ||

विश्वयोनिर्महायोनिः कर्मयोनिः प्रियंवदा |
रोगिणी रोगशमनी महारोगभयापहा ||

वरदा पुष्टिदा देवी मानदा मानवप्रिया |
कृष्णांगवाहिनी चैव कृष्णा कृष्णसहोदरी ||

शांभवी शंभुरूपा च तथैव शंभुसंभवा |
विश्वोदरी विश्वमाता योगमुद्रा च योगिनी ||

वागीश्वरी योगमुद्रा योगिनीकोटिसेविता |
कौलिकानंदकन्या च शृंगारपीठवासिनी ||

क्षेमंकरी सर्वरूपा दिव्यरूपा दिगंबरा |
धूम्रवक्त्रा धूम्रनेत्रा धूम्रकेशी च धूसरा ||

पिनाकी रुद्रवेताली महावेतालरूपिणी |
तपिनी तापिनी दक्षा विष्णुविद्या त्वनाथिता ||

अंकुरा जठरा तीव्रा अग्निजिह्वा भयापहा |
पशुघ्नी पशुरूपा च पशुदा पशुवाहिनी ||

पिता माता च भ्राता च पशुपाशविनाशिनी |
चंद्रमा चंद्ररेखा च चंद्रकांतिविभूषणा ||

कुंकुमांकितसर्वांगी सुधीर्बुद्बुदलोचना |
शुक्लांबरधरा देवी वीणापुस्तकधारिणी ||

श्वेतवस्त्रधरा देवी श्वेतपद्मासनस्थिता |
रक्तांबरा च रक्तांगी रक्तपद्मविलोचना ||

निष्ठुरा क्रूरहृदया अक्रूरा मितभाषिणी |
आकाशलिंगसंभूता भुवनोद्यानवासिनी ||

महासूक्ष्मा च कंकाळी भीमरूपा महाबला |
अनौपम्यगुणोपेता सदा मधुरभाषिणी ||

विरूपाक्षी सहस्राक्षी शताक्षी बहुलोचना |
दुस्तरी तारिणी तारा तरुणी ताररूपिणी ||

सुधाधारा च धर्मज्ञा धर्मयोगोपदेशिनी |
भगेश्वरी भगाराध्या भगिनी भगिनीप्रिया ||

भगविश्वा भगक्लिन्ना भगयोनिर्भगप्रदा |
भगेश्वरी भगरूपा भगगुह्या भगावहा ||

भगोदरी भगानंदा भगाढ्या भगमालिनी |
सर्वसंक्षोभिणीशक्तिः सर्वविद्राविणी तथा ||

मालिनी माधवी माध्वी मदरूपा मदोत्कटा |
भेरुंडा चंडिका ज्योत्स्ना विश्वचक्षुस्तपोवहा ||

सुप्रसन्ना महादूती यमदूती भयंकरी |
उन्मादिनी महारूपा दिव्यरूपा सुरार्चिता ||

चैतन्यरूपिणी नित्या नित्यक्लिन्ना मदोल्लसा |
मदिरानंदकैवल्या मदिराक्षी मदालसा ||

सिद्धेश्वरी सिद्धविद्या सिद्धाद्या सिद्धवंदिता |
सिद्धार्चिता सिद्धमाता सिद्धसर्वार्थसाधिका ||

मनोन्मनी गुणातीता परंज्योतिःस्वरूपिणी |
परेशी पारगा पारा पारसिद्धिः परा गतिः ||

विमला मोहिनीरूपा मधुपानपरायणा |
वेदवेदांगजननी सर्वशास्त्रविशारदा ||

सर्ववेदमयी विद्या सर्वशास्त्रमयी तथा |
सर्वज्ञानमयी देवी सर्वधर्ममयीश्वरी ||

सर्वयज्ञमयी यज्वा सर्वमंत्राधिकारिणी |
त्रैलोक्याकर्षिणी देवी सर्वाद्यानंदरूपिणी ||

सर्वसंपत्त्यधिष्ठात्री सर्वविद्राविणी परा |
सर्वसंक्षोभिणी देवी सर्वमंगळकारिणी ||

त्रैलोक्यरंजनी देवी सर्वस्तंभनकारिणी |
त्रैलोक्यजयिनी देवी सर्वोन्मादस्वरूपिणी ||

सर्वसम्मोहिनी देवी सर्ववश्यंकरी तथा |
सर्वार्थसाधिनी देवी सर्वसंपत्तिदायिनी ||

सर्वकामप्रदा देवी सर्वमंगळकारिणी |
सर्वसिद्धिप्रदा देवी सर्वदुःखविमोचिनी ||

सर्वमृत्युप्रशमनी सर्वविघ्नविनाशिनी |
सर्वांगसुंदरी माता सर्वसौभाग्यदायिनी ||

सर्वदा सर्वशक्तिश्च सर्वैश्वर्यफलप्रदा |
सर्वज्ञानमयी देवी सर्वव्याधिविनाशिनी ||

सर्वाधारा सर्वरूपा सर्वपापहरा तथा |
सर्वानंदमयी देवी सर्वरक्षास्वरूपिणी ||

सर्वलक्ष्मीमयी विद्या सर्वेप्सितफलप्रदा |
सर्वदुःखप्रशमनी परमानंददायिनी ||

त्रिकोणनिलया त्रीष्टा त्रिमता त्रितनुस्थिता |
त्रैविद्या चैव त्रिस्मारा त्रैलोक्यत्रिपुरेश्वरी ||

त्रिकोदरस्था त्रिविधा त्रिपुरा त्रिपुरात्मिका |
त्रिधात्री त्रिदशा त्र्यक्षा त्रिघ्नी त्रिपुरवाहिनी ||

त्रिपुराश्रीः स्वजननी बालात्रिपुरसुंदरी |
श्रीमत्त्रिपुरसुंदर्या मंत्रनामसहस्रकम् ||

गुह्याद्गुह्यतरं पुत्र तव प्रीत्या प्रकीर्तितम् |
गोपनीयं प्रयत्नेन पठनीयं प्रयत्नतः ||

नातः परतरं पुण्यं नातः परतरं शुभम् |
नातः परतरं स्तोत्रं नातः परतरा गतिः ||

स्तोत्रं सहस्रनामाख्यं मम वक्त्राद्विनिःसृतम् |
यः पठेत्परया भक्त्या शृणुयाद्वा समाहितः ||

मोक्षार्थी लभते मोक्षं सुखार्थी सुखमाप्नुयात् |
फलार्थी लभते कामान् धनार्थी लभते धनम् ||

विद्यार्थी लभते विद्यां यशोऽर्थी लभते यशः |
कन्यार्थी लभते कन्यां सुतार्थी लभते सुतम् ||

गुर्विणी लभते पुत्रं कन्या विंदति सत्पतिम् |
मूर्खोऽपि लभते शास्त्रं चौरोऽपि लभते गतिम् ||

संक्रांतावमावास्यायामष्टम्यां भौमवासरे |
पठेद्वा पाठयेद्वापि शृणुयाद्वा समाहितः ||

पौर्णमास्यां चतुर्दश्यां नवम्यां च विशेषतः |
स मुक्तः सर्वपापेभ्यः कामेश्वरसमो भवेत् ||

लक्ष्मीवान् सुतवांश्चैव वल्लभः सर्वयोषिताम् |
तस्या वश्यं भवेद्दास्ये त्रैलोक्यं सचराचरम् ||

रुद्रं दृष्ट्वा यथा देवा विष्णुं दृष्ट्वा च दानवाः |
पन्नगा गरुडं दृष्ट्वा सिंहं दृष्ट्वा यथा मृगाः ||

मंडूका भोगिनं दृष्ट्वा मार्जारं मूषको यथा |
कीटवत्प्रपलायंते तस्य वक्त्रावलोकनात् ||

अग्निचौरभयं तस्य कदाचिन्नैव संभवेत् |
पातका विविधाः संति मेरुमंदरसन्निभाः ||

भस्मसात्तत्क्षणं कुर्यात् तृणं वह्नियुतं यथा |
एकधा पठनादेव सर्पपापक्षयो भवेत् ||

दशधा पठनादेव वांछासिद्धिः प्रजायते |
नश्यंति सहसा रोगा दशधाऽऽवर्तनेन च ||

सहस्रं वा पठेद्यस्तु खेचरो जायते नरः |
सहस्रदशकं यस्तु पठेद्भक्तिपरायणः ||

सा तस्य जगतां धात्री प्रत्यक्षा भवति ध्रुवम् |
लक्षं पूर्णं यदा पुत्र स्तवराजं पठेत्सुधीः ||

भवपाशविनिर्मुक्तो मम तुल्यो न संशयः |
सर्वतीर्थेषु यत्पुण्यं सर्वयज्ञेषु यत्फलम् ||

सर्वदेवेषु यत्पुण्यं तत्फलं परिकीर्तितम् |
तत्फलं कोटिगुणितं सकृज्जप्त्वा लभेन्नरः ||

श्रुत्वा महाबलश्चाशु पुत्रवान् सर्वसंपदः |
देहांते परमं स्थानं यत्सुरैरपि दुर्लभम् ||

अद्वैतयोगिभिर्ज्ञेयं मार्गगैरपि दुर्लभम् |
स यास्यति न संदेहः स्तवराजप्रकीर्तनात् ||

यः सदा पठते भक्तो मुक्तिस्तस्य न संशयः ||

इति श्रीवामकेश्वरतंत्रे श्री बालात्रिपुरसुंदरी सहस्रनाम स्तोत्रम् |
गमनिक
: पैन इव्वबडिन स्तोत्रमु
(श्लोकालु मात्रमे)
, ई पुस्तकमुलो कूडा उन्नदि.
श्री बाला स्तोत्रनिधि
(नित्य पारायण ग्रंथमु)
मरिन्नि
श्री बाला स्तोत्रालु
चूडंडि. मरिन्नि
देवी स्तोत्रालु
चूडंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु