Sri Sita Rama Kalyana Sarga (Bala Kandam)

तॆलुगु
स्तोत्रनिधि
श्री राम स्तोत्रालु
गमनिक
: ई स्तोत्रमु
(श्लोकालु मात्रमे)
श्रीराम स्तोत्रनिधि
” पुस्तकमुलो कूडा उन्नदि.
यस्मिंस्तु दिवसे राजा चक्रे गोदानमुत्तमम् |
तस्मिंस्तु दिवसे वीरो युधाजित्समुपेयिवान् ||

पुत्रः केकयराजस्य साक्षाद्भरतमातुलः |
दृष्ट्वा पृष्ट्वा च कुशलं राजानमिदमब्रवीत् ||

केकयाधिपती राजा स्नेहात् कुशलमब्रवीत् |
येषां कुशलकामोऽसि तेषां संप्रत्यनामयम् ||

स्वस्रीयं मम राजेंद्र द्रष्टुकामो महीपतिः |
तदर्थमुपयातोऽहमयोध्यां रघुनंदन ||

श्रुत्वा त्वहमयोध्यायां विवाहार्थं तवात्मजान् |
मिथिलामुपयातांस्तु त्वया सह महीपते ||

त्वरयाऽभ्युपयातोऽहं द्रष्टुकामः स्वसुः सुतम् |
अथ राजा दशरथः प्रियातिथिमुपस्थितम् |
दृष्ट्वा परमसत्कारैः पूजनार्हमपूजयत् ||

ततस्तामुषितो रात्रिं सह पुत्रैर्महात्मभिः |
प्रभाते पुनरुत्थाय कृत्वा कर्माणि कर्मवित् |
ऋषींस्तदा पुरस्कृत्य यज्ञवाटमुपागमत् ||

युक्ते मुहूर्ते विजये सर्वाभरणभूषितैः |
भ्रातृभिः सहितो रामः कृतकौतुकमंगलः ||

वसिष्ठं पुरतः कृत्वा महर्षीनपरानपि |
पितुः समीपमाश्रित्य तस्थौ भ्रातृभिरावृतः |
वसिष्ठो भगवानेत्य वैदेहमिदमब्रवीत् ||

राजा दशरथो राजन् कृतकौतुकमंगलैः |
पुत्रैर्नरवर श्रेष्ठ दातारमभिकांक्षते ||

दातृप्रतिग्रहीतृभ्यां सर्वार्थाः प्रभवंति हि |
स्वधर्मं प्रतिपद्यस्व कृत्वा वैवाह्यमुत्तमम् ||

इत्युक्तः परमोदारो वसिष्ठेन महात्मना |
प्रत्युवाच महातेजा वाक्यं परमधर्मवित् ||

कः स्थितः प्रतिहारो मे कस्याज्ञा संप्रतीक्ष्यते |
स्वगृहे को विचारोऽस्ति यथा राज्यमिदं तव ||

कृतकौतुकसर्वस्वा वेदिमूलमुपागताः |
मम कन्या मुनिश्रेष्ठ दीप्ता वह्नेरिवार्चिषः ||

सज्जोऽहं त्वत्प्रतीक्षोऽस्मि वेद्यामस्यां प्रतिष्ठितः |
अविघ्नं कुरुतां राजा किमर्थमवलंबते ||

तद्वाक्यं जनकेनोक्तं श्रुत्वा दशरथस्तदा |
प्रवेशयामास सुतान् सर्वानृषिगणानपि ||

ततो राजा विदेहानां वसिष्ठमिदमब्रवीत् |
कारयस्व ऋषे सर्वामृषिभिः सह धार्मिक |
रामस्य लोकरामस्य क्रियां वैवाहिकीं प्रभो ||

तथेत्युक्त्वा तु जनकं वसिष्ठो भगवानृषिः |
विश्वामित्रं पुरस्कृत्य शतानंदं च धार्मिकम् ||

प्रपामध्ये तु विधिवद्वेदिं कृत्वा महातपाः |
अलंचकार तां वेदिं गंधपुष्पैः समन्ततः ||

सुवर्णपालिकाभिश्च छिद्रकुंभैश्च सांकुरैः |
अंकुराढ्यैः शरावैश्च धूपपात्रैः सधूपकैः ||

शंखपात्रैः स्रुवैः स्रुग्भिः पात्रैरर्घ्याभिपूरितैः |
लाजपूर्णैश्च पात्रीभिरक्षतैरभिसंस्कृतैः ||

दर्भैः समैः समास्तीर्य विधिवन्मंत्रपूर्वकम् |
अग्निमाधाय वेद्यां तु विधिमंत्रपुरस्कृतम् ||

जुहावाग्नौ महातेजा वसिष्ठो भगवानृषिः |
ततः सीतां समानीय सर्वाभरणभूषिताम् |
समक्षमग्नेः संस्थाप्य राघवाभिमुखे तदा |
अब्रवीज्जनको राजा कौसल्यानंदवर्धनम् ||

इयं सीता मम सुता सहधर्मचरी तव |
प्रतीच्छ चैनां भद्रं ते पाणिं गृह्णीष्व पाणिना ||

पतिव्रता महाभागा छायेवानुगता सदा |
इत्युक्त्वा प्राक्षिपद्राजा मंत्रपूतं जलं तदा ||

साधुसाध्विति देवानामृषीणां वदतां तदा |
देवदुंदुभिनिर्घोषः पुष्पवर्षो महानभूत् ||

एवं दत्वा तदा सीतां मंत्रोदकपुरस्कृताम् |
अब्रवीज्जनको राजा हर्षेणाभिपरिप्लुतः ||

लक्ष्मणागच्छ भद्रं ते ऊर्मिलामुद्यतां मया |
प्रतीच्छ पाणिं गृह्णीष्व मा भूत्कालस्य पर्ययः ||

तमेवमुक्त्वा जनको भरतं चाभ्यभाषत |
गृहाण पाणिं मांडव्याः पाणिना रघुनंदन ||

शत्रुघ्नं चापि धर्मात्मा अब्रवीज्जनकेश्वरः |
श्रुतकीर्त्या महाबाहो पाणिं गृह्णीष्व पाणिना ||

सर्वे भवंतः सौम्याश्च सर्वे सुचरितव्रताः |
पत्नीभिः संतु काकुत्स्था मा भूत्कालस्य पर्ययः ||

जनकस्य वचः श्रुत्वा पाणीन्पाणिभिरस्पृशन् |
चत्वारस्ते चतसृणां वसिष्ठस्य मते स्थिताः ||

अग्निं प्रदक्षिणीकृत्य वेदिं राजानमेव च |
ऋषींश्चैव महात्मानः सभार्या रघुसत्तमाः |
यथोक्तेन तथा चक्रुर्विवाहं विधिपूर्वकम् ||

[काकुत्स्थैश्च गृहीतेषु ललितेषु च पाणिषु|]

पुष्पवृष्टिर्महत्यासीदंतरिक्षात्सुभास्वरा |
दिव्यदुंदुभिनिर्घोषैर्गीतवादित्रनिःस्वनैः ||

ननृतुश्चाप्सरस्संघा गंधर्वाश्च जगुः कलम् |
विवाहे रघुमुख्यानां तदद्भुतमदृश्यत ||

ईदृशे वर्तमाने तु तूर्योद्घुष्टनिनादिते |
त्रिरग्निं ते परिक्रम्य ऊहुर्भार्या महौजसः ||

अथोपकार्यां जग्मुस्ते सभार्या रघुनंदनाः |
राजाऽप्यनुययौ पश्यन्सर्षिसंघः सबांधवः ||

इत्यार्षे श्रीमद्रामायणे वाल्मीकीये आदिकाव्ये बालकांडे त्रिसप्ततितमः सर्गः |
गमनिक
: पैन इव्वबडिन स्तोत्रमु
(श्लोकालु मात्रमे)
, ई क्रिंदि पुस्तकमुलो कूडा उन्नदि.
श्री राम स्तोत्रनिधि
(नित्य पारायण ग्रंथमु)
मरिन्नि
श्री राम स्तोत्रालु
चूडंडि. मरिन्नि
श्री हनुमान् स्तोत्रालु
पठिंचंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु