Sri Shiva Manasika Puja Stotram

तॆलुगु
स्तोत्रनिधि
श्री शिव स्तोत्रालु
अनुचितमनुलपितं मे त्वयि शंभो शिव तदागसश्शान्त्यै |
अर्चां कथमपि विहितामङ्गीकुरु सर्वमङ्गलोपेत ||

ध्यायामि कथमिव त्वां धीवर्त्मविदूर दिव्यमहिमानम् |
आवाहनं विभोस्ते देवाग्र्य भवेत्प्रभो कुतः स्थानात् ||

कियदासनं प्रकल्प्यं कृतासनस्येह सर्वतोऽपि सह |
पाद्यं कुतोऽर्घ्यमपि वा पाद्यं सर्वत्रपाणिपादस्य ||

आचमनं ते स्यादधिभगवन् ते सर्वतोमुखस्य कथम् |
मधुपर्को वा कथमिह मधुवैरिणि दर्शितप्रसादस्य ||

स्नानेन किं विधेयं सलिलकृतेनेह नित्यशुद्धस्य |
वस्त्रेणापि न कार्यं देवाधिपते दिगंबरस्येह ||

स्फुरति हि सर्पाभरणं सर्वाङ्गे सर्वमङ्गलाकार |
अतिवर्णाश्रमिणस्तेऽस्त्युपवीतेनेह कश्चिदुत्कर्षः ||

गन्धवती हि तनुस्ते गन्धाः किं नेश पौनरुक्ताय |
पुष्कलफलदातारं पुष्करकुसुमेन पूजयामि त्वाम् ||

शमधनमूलधनं त्वां सकलेश्वर भवसि धूपितः केन |
दीपः कथं शिखावान् दीप्येत पुरः स्वयंप्रकाशस्य ||

अमृतात्मकमपि भगवन्नशनं किन्नाम नित्यतृप्तस्य |
त्वय्याम्रेडितमेतत्तांबूलं यदिह सुमुखरागाय ||

उपहारीभूयादिदमुमेश यन्मे विचेष्टितमशेषम् |
नीराजयामि तमिमं नानात्मानं सहाखिलैः करणैः ||

सुमनश्शेखर भव ते सुमनोऽञ्जलिरेष को भवेच्छंभो |
छत्रं द्युमन् द्युमार्धन् चामरमपि किं जितश्रमस्य तव ||

नृत्यं प्रथतां कथमिव नाथ तवाग्रे महानटस्येह |
गीतं किं पुरवैरिन् गीतागममूलदेशिकस्य पुरः ||

वाद्यं डमरु भृतस्ते वादयितुं ते पुरोऽस्ति का शक्तिः |
अपरिच्छिन्नस्य भवेदखिलेश्वर कः प्रदक्षिणविधिस्ते ||

स्युस्ते नमांसि कथमिव शङ्कर परितोऽपि विद्यमानस्य |
वाचामगोचरे त्वयि वाक्प्रसरो मे कथं सुसंभवतु ||

नित्यानन्दाय नमो निर्मलविज्ञानविग्रहाय नमः |
निरवधिकरुणाय नमो निरवधिविभवाय तेजसेऽस्तु नमः ||

सरसिजविपक्षचूडः सगरतनूजन्मसुकृतमूर्धाऽसौ |
दृक्कूलङ्कषकरुणो दृष्टिपथे मेऽस्तु धवलिमा कोऽपि ||

जगदाधारशरासं जगदुत्पादप्रवीणयन्तारम् |
जगदवनकर्मठशरं जगदुद्धारं श्रयामि चित्सारम् ||

कुवलयसहयुध्वगलैः कुलगिरिकूटस्थकवचितार्धाङ्गैः |
कलुषविदूरैश्चेतः कबलितमेतत्कृपारसैः किञ्चित् ||

वसनवतेकत्कृत्त्या वासवते रजतशैलशिखरेण |
वलयवते भोगभृता वनितार्धाङ्गाय वस्तुनेऽस्तु नमः ||

सरसिजकुवलय-जागरसंवेशन जागरूकलोचनतः |
सकृदपि नाहं जाने सुतरान्तं भाष्यकारमञ्जीरात् ||

आपाटलजूटाना-मानीलच्छायकन्धरा-सीम्नाम् |
आपाण्डुविग्रहाणामाद्रुहिणं किङ्करा वयं महसाम् ||

मुषितस्मरावलेपे मुनितनयायुर्वदान्यपदपद्मे |
महसि मनो रमतां मे मनसि दयापूरमेदुरापाङ्गे ||

शर्मणि जगतां गिरिजानर्मणि सप्रेमहृदयपरिपाके |
ब्रह्मणि विनमद्रक्षणकर्मणि तस्मिन्नुदेतु भक्तिर्मे ||

कस्मिन्नपि समये मम कण्ठच्छायाविधूतकालाभ्रम् |
अस्तु पुरो वस्तु किमप्यर्धाङ्गेदरमुन्मिषन्निटलम् ||

जटिलाय मौलिभागे जलधर नीलाय कन्धराभोगे |
धवलाय वपुषि निखिले धाम्नेस्स्यान्मानसे नमोवाकः ||

अकरविराजत्सुमृगै-रवृषतुरङ्गै-रमौलिधृतगङ्गैः |
अकृतमनोभवभङ्गैरलमन्यैर्जगति दैवतं मन्यैः ||

कस्मै वच्मि दशां मे कस्येदृग्घृदयमस्ति शक्तिर्वा |
कस्य बलं चोद्धर्तुं क्लेशात्त्वामन्तरा दयासिन्धो ||

याचे ह्यनभिनवं ते चन्द्रकलोत्तंस किञ्चिदपि वस्तु |
मह्यं प्रदेहि भगवन् मदीयमेव स्वरूपमानन्दम् ||

भगवन्बालतया वाऽभक्त्या वाऽप्यापदाकुलतया वा |
मोहाविष्टतया वा माऽस्तु च ते मनसि यद्दुरुक्तं मे ||

यदि विश्वाधिकता ते यदि निगमागमपुराणयाथार्थ्यम् |
यदि वा भक्तेषु दया तदिह महेशाशु पूर्णकामस्स्याम् ||

इति शिवानन्दावधूतरचित शिवमानसिकपूजास्तोत्रम् |
मरिन्नि
श्री शिव स्तोत्रालु
चूडंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु