ఉపనిషత్తులు
|| అథ గణేశపూర్వతాపిన్యుపనిషత్ ||
గణేశం ప్రమథాధీశం నిర్గుణం సగుణం విభుమ్ |
యోగినో యత్పదం యాంతి తం గౌరీనందనం భజే ||
ఓం నమో వరదాయ విఘ్నహర్త్రే || అథాతో బ్రహ్మోపనిషదం వ్యాఖ్యాస్యామః | బ్రహ్మా దేవానాం సవితుః కవీనామృషిర్విప్రాణాం మహిషో మృగాణామ్ | ధాతా వసూనాం సురభిః సృజానాం నమో బ్రహ్మణే'థర్వపుత్రాయ మీఢుషే || ధాతా దేవానాం ప్రథమం హి చేతో మనో వనానీవ మనసా'కల్పయద్యః | నమో బ్రహ్మణే బ్రహ్మపుత్రాయ తుభ్యం జ్యేష్ఠాయాథర్వపుత్రాయ ధన్వినే ||
ఓం ప్రజాపతిః ప్రజా అసృజత | తాః సృష్టా అబ్రువన్ కథమన్నాద్యా అభవన్నితి | స త్రేధా వ్యభజద్భూర్భువఃస్వరితి | స తపో'తప్యత | స బ్రహ్మా స విష్ణుః స శివః స ప్రజాపతిః సేంద్రః సో'గ్నిః సమభవత్ | స తూష్ణీం మనసా ధ్యాయన్ కథమిమే'న్నాద్యాః స్యురితి | సో'పశ్యదాత్మనా''త్మానం గజరూపధరం దేవం శశివర్ణం చతుర్భుజం యతో వా ఇమాని భూతాని జాయంతే యతో వాయంతి యత్రైవ యంతి చ | తదేతదక్షరం పరం బ్రహ్మ | ఏతస్మాజ్జాయతే ప్రాణో మనః సర్వేంద్రియాణి చ | ఖం వాయురాపో జ్యోతిః పృథివీ విశ్వస్య ధారిణీ | పురుష ఏవేదం విశ్వం తపో బ్రహ్మ పరామృతమితి ||
సో'స్తువత నమో బ్రహ్మణే నమో బ్రాహ్మణేభ్యో నమో వేదేభ్యో నమ ఋషిభ్యో నమః కుల్యేభ్యః ప్రకుల్యేభ్యో నమః సవిత్రే ప్రసవిత్రే నమో భోజ్యాయ ప్రకృష్టాయ కపర్దినే చక్రాయ చక్రధరాయాన్నాయాన్నపతయే శివాయ సదాశివాయ తుర్యాయ తురీయాయ భూర్భువఃస్వఃపతే రాయస్పతే వాజిపతే గోపతే ఋగ్యజుఃసామాథర్వాంగిరఃపతే నమో బ్రహ్మపుత్రాయేతి ||
సో'బ్రవీద్వరదో'స్మ్యహమితి | స ప్రజాపతిరబ్రవీత్కథమిమే'న్నాద్యాః స్యురితి | స హోవాచ బ్రహ్మపుత్రస్తపస్తేపే సిద్ధక్షేత్రే మహాయశాః | స సర్వస్య వక్తా సర్వస్య జ్ఞాతాసీతి | స హోవాచ తపస్యంతం సిద్ధారణ్యే భృగుపుత్రం పృచ్ఛధ్వమితి | తే ప్రత్యాయయుః | స హోవాచ కిమేతదితి | తే హోచుః కథం వయమన్నాద్యా భవామ ఇతి | స తూష్ణీం మనసా ధ్యాయన్ కథమిమే'న్నాద్యాః స్యురితి | స ఏతమానుష్టుభం మంత్రరాజమపశ్యత్ | యదిదం కించ సర్వమసృజత | తస్మాత్సర్వానుష్టుభమిత్యాచక్షతే యదిదం కించ | అనుష్టుభా వా ఇమాని భూతాని జాయంతే | అనుష్టుభా జాతాని జీవంత్యనుష్టుభం ప్రయంత్యభిసంవిశంతి | తస్యైషా భవతి అనుష్టుప్ప్రథమా భవత్యనుష్టుబుత్తమా భవతి | వాగ్వా అనుష్టుబ్వాచైవ ప్రయంతి వాచైవోద్యంతి | పరమా వా ఏషా ఛందసాం యదనుష్టుప్ | సర్వమనుష్టుప్ | ఏతం మంత్రరాజం యః పశ్యతి స పశ్యతి | స భుక్తిం ముక్తిం చ విందతి | తేన సర్వజ్ఞానం భవతి | తదేతన్నిదర్శనం భవతి ; ఏకో దేవః ప్రాపకో యో వసూనాం శ్రియా జుష్టః సర్వతోభద్ర ఏషః | మాయాదేవో బలగహనో బ్రహ్మారాతీస్తం దేవమీడే దక్షిణాస్యమ్ || ఆ తూ న ఇంద్ర క్షుమంతం చిత్రం గ్రాభం సంగృభాయ | మహాహస్తీ దక్షిణేన || ఇతి సహస్రకృత్వస్తుష్టావ ||
అథాపశ్యన్మహాదేవం శ్రియా జుష్టం మదోత్కటమ్ | సనకాదిమహాయోగివేదవిద్భిరుపాసితమ్ || ద్రుహిణాదిమదేవేశషట్పదాలివిరాజితమ్ | లసత్కర్ణం మహాదేవం గజరూపధరం శివమ్ || స హోవాచ వరదో'స్మీతి | స తూష్ణీం మనసా వవ్రే | స తథేతి హోవాచ | తదేష శ్లోకః ; స సంస్తుతో దైవతదేవసూనుః సుతం భృగోర్వాక్యమువాచ తుష్టః | అవేహి మాం భార్గవ వక్రతుండమనాథనాథం త్రిగుణాత్మకం శివమ్ ||
అథ తస్య షడంగాని ప్రాదుర్బభూవుః | స హోవాచ జపధ్వమానుష్టుభం మంత్రరాజ షట్పదం సషడక్షరమ్ | ఇతి యో జపతి స భూతిమాన్ భవతీతి యూయమన్నాద్యా భవేయురితి | తదేతన్నిదర్శనమ్ ; గణానాం త్వా గణనాథం సురేంద్రం కవిం కవీనామతిమేధవిగ్రహమ్ | జ్యేష్ఠరాజం వృషభం కేతుమేకం సా నః శృణ్వన్నూతిభిః సీద శాశ్వత్ ||
తే హోచుః కథమానుష్టుభం మంత్రరాజమభిజానీమ ఇతి | స ఏతమానుష్టుభం షట్పదం మంత్రరాజ కథయాంచక్రే | స సామ భవతి | ఋగ్వై గాయత్రీ యజురుష్ణిగనుష్టుప్ సామ | స ఆదిత్యో భవతి | ఋగ్వై వసుర్యజూ రుద్రాః సామాదిత్యా ఇతి | స షట్పదో భవతి | సామ వై షట్పదః | ససాగరాం సప్తద్వీపాం సపర్వతాం వసుంధరాం తత్సామ్నః ప్రథమం పాదం జానీయాద్రాయస్పోషస్య దాతేతి | తేన సప్తద్వీపాధిపో భవతి భూఃపతిత్వం చ గచ్ఛతి | యక్షగంధర్వాప్సరోగణసేవితమంతరిక్షం ద్వితీయం పాదం జానీయాన్నిధిదాతేతి | తేన ధనదాదికాష్ఠాపతిర్భవతి భువఃపతిత్వం చ గచ్ఛతి | వసురుద్రాదిత్యైః సర్వైర్దేవైః సేవితం దివం తత్సామ్నస్తృతీయం పాదం జానీయాదన్నదో మత ఇతి | తేన దేవాధిపత్యం స్వఃపతిత్వం చ గచ్ఛతి | ఋగ్యజుఃసామాథర్వాంగిరోగణసేవితం బ్రహ్మలోకం తుర్యం పాదం జానీయాద్రక్షోహణ ఇతి | తేన దేవాధిపత్యం బ్రహ్మాధిపత్యం చ గచ్ఛతి | వాసుదేవాదిచతుర్వ్యూహసేవితం విష్ణులోకం తత్సామ్నః పంచమం పాదం జానీయాద్బలగహన ఇతి | తేన సర్వదేవాధిపత్యం విష్ణులోకాధిపత్యం చ గచ్ఛతి | బ్రహ్మస్వరూపం నిరంజనం పరమవ్యోమ్నికం తత్సామ్నః షష్ఠం పాదం జానీయాత్ | తేన వక్రతుండాయ హుమితి యో జానీయాత్సో'మృతత్వం చ గచ్ఛతి | సత్యలోకాధిపత్యం చ గచ్ఛతి ||
ఋగ్యజుఃసామాథర్వాశ్చత్వారః పాదా భవంతి | రాయస్పోషస్య దాతా చేతి ప్రథమః పాదో భవతి ఋగ్వై ప్రథమః పాదః | నిధిదాతా'న్నదో మత ఇతి ద్వితీయః పాదః యజుర్వై ద్వితీయః పాదః | రక్షోహణో వో బలగహన ఇతి తృతీయః పాదః సామ వై తృతీయః పాదః | వక్రతుండాయ హుమితి చతుర్థః పాదః అథర్వశ్చతుర్థః పాదో'థర్వశ్చతుర్థః పాద ఇతి ||
ఇతి గణేశపూర్వతాపిన్యుపనిషత్సు ప్రథమోపనిషత్ ||
స హోవాచ ప్రజాపతిరగ్నిర్వై వేదా ఇదం సర్వం విశ్వాని భూతాని విరాట్ స్వరాట్ సమ్రాట్ తత్సామ్నః ప్రథమం పాదం జానీయాత్ | ఋగ్యజుఃసామాథర్వరూపః సూర్యో'ంతరాదిత్యే హిరణ్మయః పురుషస్తత్సామ్నో ద్వితీయం పాదం జానీయాత్ | య ఓషధీనాం ప్రభవితా తారాపతిః సోమస్తత్సామ్నస్తృతీయం పాదం జానీయాత్ | యో బ్రహ్మా తత్సామ్నశ్చతుర్థం పాదం జానీయాత్ | యో హరిస్తత్సామ్నః పంచమం పాదం జానీయాత్ | యః శివః స పరం బ్రహ్మ తత్సామ్నో'ంత్యం పాదం జానీయాత్ | యో జానీతే సో'మృతత్వం చ గచ్ఛతి పరం బ్రహ్మైవ భవతి | తస్మాదిదమానుష్టుభం సామ యత్ర క్వచిన్నాచష్టే | యది దాతుమపేక్షతే పుత్రాయ శుశ్రూషవే దాస్యత్యన్యస్మై శిష్యాయ వేతి ||
తస్య హి షడంగాని భవంతి ; ఓం హృదయాయ నమః, శిరసే స్వాహా, శిఖాయై వషట్, కవచాయ హుమ్ | నేత్రత్రయాయ వౌషట్, అస్త్రాయ ఫడితి ప్రథమం ప్రథమేన ద్వితీయం ద్వితీయేన తృతీయం తృతీయేన చతుర్థం చతుర్థేన పంచమం పంచమేన షష్ఠం షష్ఠేన ప్రత్యక్షరముభయతో మాయా లక్ష్మీశ్చ భవతి | మాయా వా ఏషా వైనాయకీ సర్వమిదం సృజతి సర్వమిదం రక్షతి సర్వమిదం సంహరతి తస్మాన్మాయామేతాం శక్తిం వేద | స మృత్యుం జయతి | స పాప్మానం తరతి | స మహతీం శ్రియమశ్నుతే | సో'భివాదీ షట్కర్మసంసిద్ధో భవత్యమృతత్వం చ గచ్ఛతి | మీమాంసంతే బ్రహ్మవాదినో హ్రస్వా వా దీర్ఘా వా ప్లుతా వేతి | యది హ్రస్వా భవతి సర్వపాప్మానం తరత్యమృతత్వం చ గచ్ఛతి | యది దీర్ఘా భవతి మహతీం శ్రియమాప్నుయాదమృతత్వం చ గచ్ఛతి | యది ప్లుతా భవతి జ్ఞానవాన్ భవత్యమృతత్వం చ గచ్ఛతి | తదేతదృషిణోక్తం నిదర్శనమ్ ; స ఈం పాహి య ఋజీషీ తరుద్రః స శ్రియం లక్ష్మీమౌపలాంబికాం గామ్ | షష్ఠీం చ యామింద్రసేనేత్యుత ఆహుస్తాం విద్యాం బ్రహ్మయోనిస్వరూపామ్ || తామిహాయుషే శరణం ప్రపద్యే | క్షీరోదార్ణవశాయినం కల్పద్రుమాధఃస్థితం వరదం వ్యోమరూపిణం ప్రచండదండదోర్దండం వక్రతుండస్వరూపిణం పార్శ్వాధఃస్థితకామధేనుం శివోమాతనయం విభుమ్ | రుక్మాంబరనిభాకాశం రక్తవర్ణం చతుర్భుజమ్ | కపర్దినం శివం శాంతం భక్తానామభయప్రదమ్ ||
ఉన్నతప్రపదాంగుష్ఠం గూఢగుల్ఫం సపార్ష్ణికమ్ | పీనజంఘం గూఢజానుం స్థూలోరుం ప్రోన్నమత్కటిమ్ ||
నిమ్ననాభిం కంబుకంఠం లంబోష్ఠం లంబనాసికమ్ | సిద్ధిబుద్ధ్యుభయాశ్లిష్టం ప్రసన్నవదనాంబుజమ్ ||
అథ ఛందోదైవతమ్ | అనుష్టుప్ఛందో భవతి ద్వాత్రింశదక్షరానుష్టుబ భవతి | అనుష్టుభా సర్వమిదం సృష్టమనుష్టుభా సర్వముపసంహృతమ్ | శివోమాయుతః పరమాత్మా వరదో దేవతా | తే హోచుః కథం శివోమాయుత ఇతి | స హోవాచ భృగుపుత్రః ప్రకృతిపురుషమయో హి స ధనద ఇతి ప్రకృతిర్మాయా పురుషః శివ ఇతి | సో'యం విశ్వాత్మా దేవతేతి | తదేతన్నిదర్శనమ్ ; ఇంద్రో మాయాభిః పురుహూత ఈడే శర్వో విశ్వం మాయయా స్విద్దధార | సో'జః శేతే మాయయా స్విద్గుహాయాం విశ్వం న్యస్తం విష్ణురేకో విజజ్ఞే || తదేతన్మాయా హంసమయీ దేవానామ్ ||
సర్వేషాం వా ఏతద్భూతానామాకాశః పరాయణమ్ | సర్వాణి హ వా ఇమాని భూతాన్యాకాశాదేవ జాయంతే జాతాని జీవంత్యాకాశం ప్రయంత్యభిసంవిశంతి | తస్మాదాకాశబీజం శివో విద్యాత్ | తదేతన్నిదర్శనమ్ ; హంసః శుచిషద్వసురంతరిక్షసద్ధోతా వేదిషదతిథిర్దురోణసత్ | నృషద్వరసదృతసద్వ్యోమసదబ్జా గోజా ఋతజా అద్రిజా ఋతం బృహదితి ||
అథాధిష్ఠానమ్ ; మధ్యే బిందుం త్రికోణం తదను ఋతుగణం వసుదలం ద్వాదశారం షోడశకర్ణికేతి | మధ్యే బీజాత్మకం దేవం యజేత్ | వామదక్షిణే సిద్ధిర్బుద్ధిః | అగ్రే కామదుఘా షట్కోణే సుముఖాదయః షడ్వినాయకాః | వసుదలే వక్రతుండాద్యష్టవినాయకాః | ద్వాదశారే బటుకో వామనో మహాదశకమహోదరౌ సుభద్రో మాలీ వరో రామ ఉమా శివః స్కందో నందీ | తద్బాహ్యే'ణిమాదిసిద్ధయః | షోడశారే దిక్పాలాః సాయుధా ఇతి ||
అథ ప్రసారః ; య ఏతేన చతుర్థీషు పక్షయోరుభయోరపి | లక్షం జుహుయాదపూపానాం తత్క్షణాద్ధనదో భవేత్ || సిద్ధౌదనం త్రిమాసం తు జుహ్వదగ్నావనన్యధీః | తావజ్జుహ్వత్పృథుకాన్హి సాక్షాద్వైశ్రవణో భవేత్ || ఉచ్చాటయేద్విభీతైశ్చ మారయేద్విషవృక్షజైః | వశ్యాయ పంకజైర్విద్వాంధనార్థీ మోదకైర్హునేత్ || ఏవం జ్ఞాత్వా కృతకర్మా భవతి కృతకర్మా భవతీతి ||
ఇతి గణేశపూర్వతాపిన్యుపనిషత్సు ద్వితీయోపనిషత్ ||
అథ హోవాచ భృగుపుత్రస్తంత్రం విజిజ్ఞాసితవ్యమితి | మూలే శూన్యం విజానీయాత్ | శూన్యం వై పరం బ్రహ్మ | తత్ర సతారం సమాయం సామ న్యసేత్త్రిరేఖం భవతి త్రయో హీమే లోకాస్త్రయో హీమే వేదాః | ఋగ్వై భూః సా మాయా భవతి | యజుర్వై భువః స శివో భవతి | సామ వై స్వః స హిరణ్యగర్భో భవతి | షట్కోణం భవతి షడ్ హీమే లోకాః షడ్ఢా ఋతవో భవంతి | తత్ర తారమాయారమామారవిశ్వేశధరణీక్రమాన్న్యసేత్ | అష్టపత్రం భవత్యష్టాక్షరా గాయత్రీ భవతి బ్రహ్మగాయత్రీం న్యసేత్ | ద్వాదశపత్ర భవతి ద్వాదశాదిత్యా భవంతి తే స్వరా భవంతి | స్వరాన్ జ్ఞాత్వాదిత్యలోకమశ్నుతే | షోడశపత్రం భవతి షోడశకలో వై పురుషో వర్ణో హ వై పురుషః స లోకాధిష్ఠితో భవత్యనుష్టుబ్ వై పురుషః ||
స హోవాచ భృగుపుత్ర ఏతమానుష్టుభం మంత్రరాజం సాంగం సప్రసృతికం సమాయం సాధిష్ఠానం సతంత్రం యో జానాతి స భూతిమాన్ భవతి సో'మృతత్వం చ గచ్ఛతి సో'మృతత్వం చ గచ్ఛతీతి ||
ఇతి గణేశపూర్వతాపిన్యుపనిషత్సు తృతీయోపనిషత్ ||
ఇత్యాథర్వణీయా గణేశపూర్వతాపిన్యుపనిషత్సమాప్తా ||
|| అథ గణేశోత్తరతాపిన్యుపనిషత్ ||
ఓం || ఓమిత్యేకాక్షరం బ్రహ్మేదం సర్వమ్ | తస్యోపవ్యాఖ్యానమ్ | సర్వం భూతం భవ్యం భవిష్యదితి సర్వమోంకార ఏవ | ఏతచ్చాన్యచ్చ త్రికాలాతీతం తదప్యోంకార ఏవ | సర్వం హ్యేతద్గణేశో'యమాత్మా బ్రహ్మేతి | సో'యమాత్మా చతుష్పాత్ | జాగరితస్థానో బహిఃప్రజ్ఞః సప్తాంగ ఏకోనవింశతిముఖః స్థూలభుగ్వైశ్వానరః ప్రథమః పాదః | స్వప్నస్థానో'ంతఃప్రజ్ఞః సప్తాంగ ఏకోనవింశతిముఖః ప్రవివిక్తభుక్ తైజసో ద్వితీయః పాదః | యత్ర సుప్తో న కంచన కామం కామయతే న కంచన స్వప్నం పశ్యతి తత్సుషుప్తమ్ | సుషుప్తిస్థాన ఏకీభూతః ప్రజ్ఞానఘన ఏవానందభుక్ చేతోముఖః ప్రాజ్ఞస్తృతీయః పాదః | ఏష సర్వేశ్వర ఏష సర్వజ్ఞ ఏషో'ంతర్యామ్యేష యోనిః సర్వస్య ప్రభవాప్యయౌ హి భూతానామ్ | నాంతఃప్రజ్ఞం న బహిఃప్రజ్ఞం నోభయతఃప్రజ్ఞం న ప్రజ్ఞం నాప్రజ్ఞం న ప్రజ్ఞానఘనమదృష్ట-మవ్యవహార్యమగ్రాహ్యమలక్షణ-మచింత్యమవ్యపదేశ్య-మైకాత్మ్యప్రత్యయసారం ప్రపంచోపశమం శివమద్వైతం చతుర్థం మన్యంతే స గణేశ ఆత్మా విజ్ఞేయః | సదోజ్జ్వలో విద్యాతత్కార్యహీనః స్వాత్మబంధరహితః సర్వదోషరహిత ఆనందరూపః సర్వాధిష్ఠానః సన్మాత్రో నిరస్తావిద్యాతమోమోహమేవేతి సంభావ్యాహమోం తత్సత్పరం బ్రహ్మ విఘ్నరాజశ్చిదాత్మకః సో'హమోం తద్వినాయకం పరం జ్యోతీ రసో'హమిత్యాత్మానమాదాయ మనసా బ్రహ్మణైకీకుర్యాత్ | వినాయకో'హమిత్యేతత్తత్త్వతః ప్రవదంతి యే | న తే సంసారిణో నూనం ప్రమోదో వై న సంశయః || ఇత్యుపనిషత్ | య ఏవం వేద స ముఖ్యో భవతీతి యాజ్ఞవల్క్య ఇతి యాజ్ఞవల్క్య ఇతి | ఏతదేవ పరం ధ్యానమేతదేవ పరం తపః | వినాయకస్య యజ్జ్ఞానం పూజనం భవమోచనమ్ || అశ్వమేధసహస్రాణి వాజపేయశతాని చ | ఏకస్య ధ్యానయోగస్య కలాం నార్హంతి షోడశీమ్ ||
ఇతి గణేశోత్తరతాపిన్యుపనిషత్సు ప్రథమోపనిషత్ ||
ఓం || స విష్ణుః స శివః స బ్రహ్మా సేంద్రః సేందుః స సూర్యః స వాయుః సో'గ్నిః స బ్రహ్మాయమాత్మనే సర్వదేవాయ ఆత్మనే భూతాయ ఆత్మన ఇతి మన్యంతే | ఓం సో'హం ఓం సో'హం ఓం సో'హమితి | ఓం బ్రహ్మన్ ఓం బ్రహ్మన్ ఓం బ్రహ్మన్నితి | ఓం శివం ఓం శివం ఓం శివమితి | తం గణేశం తం గణేశమిదం శ్రేష్ఠమ్ | ఓం గణానాం త్వా గణపతిః | సప్రియాణాం త్వా ప్రియపతిః | సనిధీనాం త్వా నిధిపతిః | ఓం తత్పురుషాయ విద్మహే వక్రతుండాయ ధీమహి | తన్నో దంతీ ప్రచోదయాత్ | ఓం తద్గణేశః | ఓం సద్గణేశః | ఓం పరం గణేశః | ఓం బ్రహ్మ గణేశః | గణనాకారో నాదః | ఏతత్సర్వో నాదః | సర్వాకారో నాదః | ఏతదాకారో నాదః | మహాన్నాదః | స గణేశో మహాన్ భవతి | సో'ణుర్భవతి | స వంద్యో భవతి | స ముఖ్యో భవతి | స పూజ్యో భవతి | రూపవాన్ భవతి | అరూపవాన్ భావతి | ద్వైతో భవతి | అద్వైతో భవతి | స్థావరస్వరూపవాన్ భవతి | జంగమస్వరూపవాన్ భవతి | సచేతనవిచేతనో భవతి | సర్వం భవతి | స గణేశో'వ్యక్తో యో'ణుర్యః శ్రేష్ఠః స వై వేగవత్తరః | అహ్రస్వాహ్రస్వశ్చ | అతిహ్రస్వాతిహ్రస్వాతిహ్రస్వశ్చ | అస్థూలాస్థూలాస్థూలశ్చ | ఓం న వాయుర్నాగ్నిర్నాకాశో నాపః పృథివీ న చ | న దృశ్యం న దృశ్యం న దృశ్యమ్ | న శీతం నోష్ణం న వర్షం చ | న పీతం న పీతం న పీతమ్ | న శ్వేతం న శ్వేతం న శ్వేతమ్ | న రక్తం న రక్తం న రక్తం | న కృష్ణం న కృష్ణం న కృష్ణమ్ | న రూపం న నామ న గుణమ్ | న ప్రాప్యం గణేశం మన్యంతే | స శుద్ధః స శుద్ధః స శుద్ధో గణేశః | స బ్రహ్మ స బ్రహ్మ స బ్రహ్మ గణేశః | స శివః స శివః స శివో గణేశః | ఇంద్రో గణేశో విష్ణుర్గణేశః సూర్యో గణేశ ఏతత్సర్వం గణేశః | స నిర్గుణః స నిరహంకారః స నిర్వికల్పః స నిరీహః స నిరాకార ఆనందరూపస్తేజోరూపమనిర్వాచ్యమప్రమేయః పురాతనో గణేశో నిగద్యతే | స ఆద్యః సో'క్షరః సో'నంతః సో'వ్యయో మహాన్పురుషః | తచ్ఛుద్ధం తచ్ఛబలం తతః ప్రకృతిమహత్తత్త్వాని జాయంతే | తతశ్చాహంకారాది పంచతన్మాత్రాణి జాయంతే | తతః పృథ్వ్యప్తేజోవాయ్వాకాశ పంచమహద్భూతాని జాయంతే | పృథివ్యా ఓషధయ ఓషధీభ్యో'న్నమన్నాద్రేతస్తతః పురుషస్తతః సర్వం తతః సర్వం తతః సర్వం తతః సర్వం జగత్ | సర్వాణి భూతాని జాయంతే | దేవా ను జాయంతే | తతశ్చ జీవంతి | దేవా ను జీవంతి | యజ్ఞా ను జీవంతి | సర్వం జీవతి | స గణేశ ఆత్మా విజ్ఞేయః | ఇత్యుపనిషత్ | య ఏవం వేద స ముఖ్యో భవతీతి యాజ్ఞవల్క్య ఇతి యాజ్ఞవల్క్య ఇతి ||
ఇతి గణేశోత్తరతాపిన్యుపనిషత్సు ద్వితీయోపనిషత్ ||
ఓం || గణేశో వై బ్రహ్మ తద్విద్యాత్ | యదిదం కించ సర్వం భూతం భవ్యం జాయమానం చ తత్సర్వమిత్యాచక్షతే | అస్మాన్నాతః పరం కించిత్ | యో వై వేద స వేద బ్రహ్మ బ్రహ్మైవోపాప్నోతి | తత్సర్వమిత్యాచక్షతే | బ్రహ్మవిష్ణ్వాదిగణానామీశభూతమిత్యాహ తద్గణేశ ఇతి | తత్పరమిత్యాహ యమేతే నాప్నువంతి పృథివీ సువర్చా యువతిః సజోషాః | యద్వై వాఙ్ నాక్రామతి మనసా సహ నాగ్నిర్న పృథ్వీ న తేజో న వాయుర్న వ్యోమ న జలమిత్యాహ | నేంద్రియం న శరీరం న నామ న రూపమ్ | న శుక్లం న రక్తం న పీతం న కృష్ణమితి | న జాగ్రన్న స్వప్నో న సుషుప్తిర్న వై తురీయా | తచ్ఛుద్ధమప్రాప్యమప్రాప్యం చ | అజ్ఞేయం చాజ్ఞేయం చ | వికల్పాసహిష్ణు తత్సశక్తికం గజవక్త్రం గజాకారం జగదేవావరుంధే | దివమనంతశీర్షైర్దిశమనంతకరైర్వ్యోమానంత-జఠరైర్మహీమనంతపాదైః స్వతేజసా బాహ్యాంతరీయాన్వ్యాప్య తిష్ఠతీత్యాహ | తద్వై పరం బ్రహ్మ గణేశ ఇత్యాత్మానం మన్యంతే | తద్వై సర్వతః పశ్యతి స్మ న కించిద్దదర్శ | తతో వై సో'హమభూత్ | నైకాకితా యుక్తేతి గుణాన్నిర్మమే | నామే రజః స వై బ్రహ్మా | ముఖాత్సత్త్వం స వై విష్ణుః | నయనాత్తమః స వై హరః | బ్రహ్మాణముపదిశతి స్మ బ్రహ్మన్ కురు సృష్టిమ్ | బ్రహ్మోవాచ నాహం వేద్మి | గణేశ ఉవాచ మద్దేహే బ్రహ్మాండాంతర్గతం విలోకయ తథావిధామేవ కురు సృష్టిమ్ | అథ బ్రహ్మా జన్మద్వారేణ బ్రహ్మాండాంతర్గతం విలోకయతి స్మ | సముద్రాన్ సరితః పర్వతాన్ వనాని మహీం దివం పాతాలం చ నరాన్ పశూన్మృగాన్నాగాన్ హయాన్ గోవ్రజాన్ సూర్యాచంద్రమసో నక్షత్రాణ్యగ్నీన్ వాయూందిశస్తతో వై సృష్టిమచీకరత్ | తతశ్చాత్మానమితి మన్యతే స్మ | న వై మత్తః పరం కించిదహమేవ సర్వస్యేశ ఇతి యావద్వదతి తావత్క్రూరా అజాయేరన్ | మహద్దేహా జిహ్వయా భువం లిహానా దంష్ట్రావ్యాప్తాకాశా మహచ్ఛబ్దా బ్రహ్మాణం హంతుముద్యుక్తాః | తాందృష్ట్వాబిభ్యత్తత్సంస్మార | తతశ్చాగ్రే కోటిసూర్యప్రతీకాశమానందరూపం గజవక్త్రం విలోకయతి స్మ | తుష్టావాథ గణేశ్వరమ్ | త్వం నిర్మాతా క్ష్మాభృతాం సరితాం సాగరాణాం స్థావరాణాం జంగమానాం చ | త్వత్తః పరతరం కించిన్నైవాస్తి జగతః ప్రభో | కర్తా సర్వస్య విశ్వస్య పాతసంహారకారకః |
భవానిదం జగత్సర్వం వ్యాప్యైవ పరితిష్ఠతి || ఇతి స్తుత్వా బ్రహ్మాణం తదువాచ బ్రహ్మంస్తపస్వ తపస్వేత్యుక్త్వా'ంతర్హితే తస్మిన్ బ్రహ్మా తపశ్చచార | కియత్స్వతీతేష్వనేహఃసు తపసి స్థితే బ్రహ్మణి పురో భూత్వోవాచ | ప్రసన్నో'హం ప్రసన్నో'హం వరాన్ వరయ | శ్రుత్వైవం వచోన్మీల్య నయనే యావత్పురః పశ్యతి తావద్గణేశం దదర్శ | స్తౌతి స్మ | త్వం బ్రహ్మా త్వం విష్ణుస్త్వం హరస్త్వం ప్రజాపతిస్త్వమింద్రస్త్వం సూర్యస్త్వం సోమస్త్వం గణేశః | త్వయా వ్యాప్తం చరాచరం త్వదృతే న హి కించన | తతశ్చ గణేశ ఉవాచ | త్వం చాహం చ న వై భిన్నౌ కురు సృష్టిం ప్రజాపతే | శక్తిం గృహాణ మద్దత్తాం జగత్సర్జనకర్మణి || తతో వై గృహీతాయాం శస్త్వా బ్రహ్మణః సృష్టిరజాయత | బ్రాహ్మణో వై ముఖాజ్జజ్ఞే బాహ్వోః క్షత్రమూర్వోర్వైశ్యః పద్భ్యాం శూద్రశ్చక్షుషో వై సూర్యో మనశ్చంద్రమా అగ్నిర్వై ముఖాత్ప్రాణాద్వాయుర్నాభేర్వ్యోమ శీర్ష్ణో ద్యౌః పద్భ్యాం భూమిర్దిశః శ్రోత్రాత్ | తథా లోకానకల్పయన్నితి | తతో వై సత్త్వమువాచ త్వం వై విష్ణుః పాహి పాహి జగత్సర్వమ్ | విష్ణురువాచ న మే శక్తిః | సోవాచ గృహాణేమాం విద్యామ్ | తతో వై సత్త్వం తామాదాయ జగత్పాతి స్మ | హరమువాచ కురు హర సంహారమ్ | జగద్ధరణాద్ధరో భవ | హరశ్చాత్మానమిత్యవైతి స్మ న వై మత్పరం కించిద్విశ్వస్యాదిరహం హర ఇతి గర్వం దధౌ యావత్తావద్వ్యాప్తం వ్యోమ గజవక్త్రైర్మహచ్ఛబ్దైర్హరం హర్తుముద్యుక్తైః | హరో వై విలోక్య రుదతి స్మ | రోదనాద్రుద్రసంజ్ఞః | తతస్తం పురుషం స్మృత్వా తుష్టావ త్వం బ్రహ్మా త్వం కర్తా త్వం ప్రధానం త్వం లోకాన్ సృజసి రక్షసి హరసి |
విశ్వాధారస్త్వమనాధారో'నాధేయో'నిర్దేశ్యో'ప్రతర్క్యో వ్యాప్యేదం సర్వం తిష్ఠసీతి స్తవనాద్వినాయకం దదర్శ | తతశ్చ తం ననామ | గణేశ ఉవాచ కురు హర హరణమ్ | తద్వై సంహర్తా'భూద్రుద్రః | య ఏవం వేద స గణేశో భవతి | ఇత్యుపనిషత్ ||
ఇతి గణేశోత్తరతాపిన్యుపనిషత్సు తృతీయోపనిషత్ ||
ఓం || గణేశో వై సదజాయత తద్వై పరం బ్రహ్మ | తద్విదాప్నోతి పరమ్ | తదేషాభ్యుక్తా యదనాదిభూతం యదనంతరూపం యద్విజ్ఞానరూపం యద్దేవాః సర్వే బ్రహ్మ జ్యేష్ఠముపాసతే న వై కార్యం కరణం న తత్సమశ్చాధికశ్చ దృశ్యః | సూర్యో'స్మాద్భీత ఉదేతి | వాతో'స్మాద్భీతః పవతే | అగ్నిర్వై భీతస్తిష్ఠతి | తచ్చిత్స్వరూపం నిర్వికారమద్వైతం చ | తన్మాయాశబలమజనీత్యాహ | అనేన యథా తమస్తతశ్చోమితి ధ్వనిరభూత్ | స వై గజాకారః | అనిర్వచనీయా సైవ మాయా జగద్బీజమిత్యాహ | సైవ ప్రకృతిరితి గణేశ ఇతి ప్రధానమితి చ మాయాశబలమితి చ | ఏతస్మాద్వై మహత్తత్త్వమజాయత | తతః కరాగ్రేణాహంకారం సృష్టవాన్ | స వై త్రివిధః సాత్త్వికో రాజసస్తామసశ్చేతి | సాత్త్వికీ జ్ఞానశక్తిః | రాజసీ క్రియాశక్తిః | తామసీ ద్రవ్యశక్తిః | తామస్యాః పంచతన్మాత్రా అజాయంత పంచభూతాన్యజాయంత | రాజస్యాః పంచ జ్ఞానేంద్రియాణి పంచ కర్మేంద్రియాణి పంచ వాయవశ్చాజాయంత | సాత్త్విక్యా దిశో వాయుః సూర్యో వరుణో'శ్వినావితి జ్ఞానేంద్రియదేవతా అగ్నిరింద్రో విష్ణుః ప్రజాపతిర్మిత్ర ఇతి కర్మేంద్రియదేవతాః | ఇదమాదిపురుషరూపమ్ | పరమాత్మనః సూక్ష్మశరీరమిదమేవోచ్యతే | అథ ద్వితీయమ్ | పంచతన్మాత్రాః పంచసూక్ష్మభూతాన్యుపాదాయ పంచీకరణే కృతే పంచమహాభూతాన్యజాయంత |
అవశిష్టానాం పంచపంచాశానాం కల్పారంభసమయే భూతవిభాగే చైతన్యప్రవేశాదహమిత్యభిమానః | తస్మాదాదిగణేశో భవానుచ్యతే | తతో వై భూతేభ్యశ్చతుర్దశ లోకా అజాయేరన్ | తదంతర్గతజీవరాశయః స్థూలశరీరైః సహ విరాడిత్యుచ్యతే | ఇతి ద్వితీయమ్ | రాజసో బ్రహ్మా సాత్త్వికో విష్ణుస్తామసో వై హరః | త్రయం మిలిత్వా పరస్పరమువాచ అహమేవ సర్వస్యేశ ఇతి | తతో వై పరస్పరమసహమానాశ్చోర్ధ్వం జగ్ముః | తత్ర న కించిద్దదృశుః | తతశ్చాధఃప్రదేశే దశదిక్షు భ్రమంతో న కించిత్పశ్యంతి స్మ | తతో వై ధ్యానస్థితా అభూవన్ | తతశ్చ హృద్దేశే మహాంతం పురుషం గజవక్త్రమసంఖ్యశీర్షమసంఖ్యపాదమనంతకరం తేజసా వ్యాప్తాఖిలలోకం బ్రహ్మమూర్ధానం దిక్శ్రవణం బ్రహ్మాండగండం చిద్వ్యోమతాలుకం సత్యజననం చ జగదుత్పత్త్యపాయోన్మేషనిమేషం సోమార్కాగ్నినేత్రం పర్వతేశరదం పుణ్యాపుణ్యోష్ఠం గ్రహోడుదశనం భారతీజిహ్వం శక్రఘ్రాణం కులగోత్రాంసం సోమేన కంఠం హరశిరోరుహం సరిన్నదభుజమురగాంగులికమృక్షనఖం శ్రీహృత్కామాకాశనాభికం సాగరోదరం మహీకటిదేశం సృష్టిలింగకం పర్వతేశోరుం దస్రజానుకం జఠరాంతఃస్థితయక్షగంధర్వరక్షఃకిన్నరమానుషం పాతాలజంఘకం మునిచరణం కాలాంగుష్ఠకం తారకాజాలలాంగులం దృష్ట్వా స్తువంతి స్మ | యతో వా ఇమాని భూతాని జాయంతే యతో'గ్నిః పృథివ్యప్తేజో వాయుర్యత్కరాగ్రాద్బ్రహ్మవిష్ణురుద్రా అజాయంత యతో వై సముద్రాః సరితః పర్వతాశ్చ యతో వై చరాచరమితి స్తవనాత్ప్రసన్నో భూత్వోవాచా'హం సర్వస్యేశో మత్తః సర్వాణి భూతాని మత్తః సర్వం చరాచరం భవంతో వై న మద్భిన్నా గుణా మే వై న సంశయః | గుణేశం మాం హృది సంచింత్య రాజస త్వం జగత్కురు సాత్త్విక త్వం పాలయ తామస త్వం హరేత్యుక్త్వాంతర్హితః | స వై గణేశః | సర్వాత్మా విజ్ఞేయః సర్వదేవాత్మా వై స ఏకః | య ఏవం వేద స గణేశో భవతి | ఇత్యుపనిషత్ |
ఇతి గణేశోత్తరతాపిన్యుపనిషత్సు చతుర్థోపనిషత్ ||
ఓం || దేవా హ వై రుద్రమబ్రువన్ కథమేతస్యోపాసనమ్ | స హోవాచ రుద్రో గణకో నిచృద్గాయత్రీ శ్రీగణపతేరేనం మంత్రరాజమన్యోన్యాభావాత్ప్రణవస్వరూపస్యాస్య పరమాత్మనో'ంగాని జానీతే స జానాతి సో'మృతత్వం చ గచ్ఛతి | యో'ధీతే స సర్వం తరతి | య ఏనం మంత్రరాజం గణపతేః సర్వదం నిత్యం జపతి సో'గ్నిం స్తంభయతి స ఉదకం స్తంభయతి స వాయుం స్తంభయతి స సూర్యం స్తంభయతి స సర్వాందేవాన్ స్తంభయతి స విషం స్తంభయతి స సర్వోపద్రవాన్ స్తంభయతి | ఇత్యుపనిషత్ | య ఏనం మంత్రరాజం నిత్యమధీతే స విఘ్నానాకర్షయతి దేవాన్యక్షాన్ రోగాన్ గ్రహాన్మనుష్యాన్ సర్వానాకర్షయతి | స భూర్లోకం జయతి స భువర్లోకం జయతి స స్వర్లోకం స మహర్లోకం స జనోలోకం స తపోలోకం స సత్యలోకం స సప్తలోకం స సర్వలోకం జయతి | సో'గ్నిష్టోమేన యజతే సో'త్యగ్నిష్టోమేన స ఉక్థ్యేన స షోడశీయేన స వాజపేయేన సో'తిరాత్రేణ సో'ప్తోర్యామేణ స సర్వైః క్రతుభిర్యజతే | య ఏనం మంత్రరాజం వైఘ్నరాజం నిత్యమధీతే స ఋచో'ధీతే స యజూంష్యధీతే స సామాన్యధీతే సో'థర్వణమధీతే సో'ంగిరసమధీతే స శాఖా అధీతే స పురాణాన్యధీతే స కల్పానధీతే స గాథా అధీతే స నారాశంసీరధీతే స ప్రణవమధీతే | య ఏనం మంత్రరాజం గాణేశం వేద స సర్వం వేద స సర్వం వేద | స వేదసమః స మునిసమః స నాగసమః స సూర్యసమః సో'గ్నిసమ ఇతి | ఉపనీతైకాధికశతం గృహస్థైకాధికశతం వానప్రస్థకాధికశతం రుద్రజాపకసమమ్ | యతీనామేకాధికశతమథర్వశిరఃశిఖాధ్యాపకసమమ్ |
రుద్రజాపకైకాధికశతమథర్వశిరఃశిఖాధ్యాపకైకాధికశతం గాణేశతాపనీయోపనిషదధ్యాపకసమమ్ | మంత్రరాజజాపకస్య యత్ర రవిసోమౌ న తపతో యత్ర వాయుర్నక్షత్రాణి న వాతి భాంతి యత్రాగ్నిర్మృత్యుర్న దహతి ప్రవిశతి యత్ర మోహో న దుఃఖం సదానందం పరానందం సమం శాశ్వతం సదాశివం పరం బ్రహ్మాదివందితం యోగిధ్యేయం పరమం పదం చిన్మాత్రం బ్రహ్మణస్పతిమేకాక్షరమేవం పరమాత్మానం బాహ్యాంతే లబ్ధాంశం హృది సమావేశ్య కించిజ్జప్త్వా తతో న జపో న మాలా నాసనం న ధ్యానావాహనాది | స్వయమవతీర్ణో హ్యయమాత్మా బ్రహ్మ సో'హమాత్మా చతుష్పాత్ | బహిఃప్రజ్ఞః ప్రవివిక్తభుక్ తైజసః | యత్ర సుప్తో న కంచన కామం కామయతే న కంచన స్వప్నం పశ్యతి తత్సుషుప్తమ్ | తత్రైకీభూతః ప్రజ్ఞానఘన ఏవానందభుక్ చేతోముఖః ప్రాజ్ఞః | ఏష సర్వేశ్వరః సర్వాంతర్యామీ ఏష యోనిః సర్వభూతానామ్ | న బహిఃప్రజ్ఞం నాంతఃప్రజ్ఞం నోభయతఃప్రజ్ఞం న ప్రజ్ఞానఘనమవ్యపదేశ్యమవ్యవహార్యమగ్రాహ్యమలక్షణమచింత్యమైకాత్మ్యప్రత్యయసారం ప్రపంచోపశమం శివమద్వైతమేవం చతుష్పాదం ధ్యాయన్ స ఏవాత్మా భవతి | స ఆత్మా విజ్ఞేయః సదోజ్జ్వలో'విద్యాతత్కార్యహీనః స్వాత్మబంధరహితో ద్వైతరహితో నిరస్తావిద్యాతమోమోహాహంకారప్రధానమహమేవ సర్వమితి సంభావ్య విఘ్నరాజబ్రహ్మణ్యమృతే తేజోమయే పరంజ్యోతిర్మయే సదానందమయే స్వప్రకాశే సదోదితే నిత్యే శుద్ధే ముక్తే జ్ఞేశ్వరే పరే బ్రహ్మణి రమతే రమతే రమతే రమతే | య ఏవం గణేశతాపనీయోపనిషదం వేద స సంసారం తరతి ఘోరం తరతి దుఃఖం తరతి విఘ్నాంస్తరతి మహోపసర్గం తరతి | ఆనందో భవతి స నిత్యో భవతి స శుద్ధో భవతి స ముక్తో భవతి స స్వప్రకాశో భవతి స ఈశ్వరో భవతి స ముఖ్యో భవతి స వైశ్వానరో భవతి స తైజసో భవతి స ప్రాజ్ఞో భవతి స సాక్షీ భవతి స ఏవ భవతి స సర్వో భవతి స సర్వో భవతీతి | ఇత్యుపనిషత్ | ఓం స హ నావవతు ||
ఇతి గణేశోత్తరతాపిన్యుపనిషత్సు పంచమోపనిషత్ ||
ఓం || అథోవాచ భగవతీ గౌరీ హ వై రుద్రమేతస్య మంత్రరాజస్యానుష్ఠానవిధిం మే బ్రూహీతి | స హోవాచ రుద్రో విధిం లబ్ధాంశం గురుదేవతయోరాలభ్య మనసా పుష్పం నివేద్యోపక్రమ్య భూతోత్సారణమాసనబంధాద్యాత్మరక్షాసునియమభూతశుద్ధి-ప్రాణస్థాపనప్రణవావర్తన-మాతృపూజనాంతర్మాతృకాంతర్యాగాది సంపాద్యాత్ర కేచన సమంత్రం మూలవైదికకల్పైరుపక్రమం గ్రహణసమర్పణనివేదనాని బాహ్యే'న్యథేతి మహార్ఘ్యం శంఖం త్రిపాద్యోర్గంధాదినా పూజితయోః స్థాప్య పాత్రాసాదనం దక్షిణోపక్రమేణ పాద్యార్ఘ్యాచమనమధుపర్క-పునరాచమననివేదనపాత్రాణి సంస్థాసు యథోపదిష్టం చతుర్థ్యోః పర్వణి సంస్థాసు యథావిధి స్థాప్య నివేదనే ప్రక్షాలనమేవ తతో'ర్వాక్ పంచామృతపాత్రాణి రిక్తం చ మూలేనాలభ్య నివేదిన్యార్ఘ్యోదకేనాత్మానం పాత్రాణి సంభారం చ ప్రోక్ష్య పాత్రాతిరిక్తాని మహార్ఘ్యోదకేన సర్వనివేదనం కరశుద్ధిం మూలాసునియమం యథోక్తర్షిచ్ఛందోదైవతం స్మృత్వా వినియోగశ్చ నిత్యే పూజాంగో జపో జపాంగా పూజా జప ఇత్యంగుష్ఠవ్యాపకస్వాంతాష్టాంగదండిముండిన్యాసాది కృత్వా ముఖమవేక్ష్యాత్మానం దేవరూపిణం సంభావ్య మూర్ధ్ని పుష్పం దత్త్వా పీఠం సంపూజ్యాసనం దత్త్వా ఋష్యాది కృత్వా ధ్యాత్వా హృదయాంభోజే యోగినో'త్ర జపంతి | స్వాంతాంభోజాద్దేవమావాహ్య ముద్రాం దర్శయిత్వా దేవస్య సకలీకరణాంగుష్ఠహృదయార్పిన్యా స్వాంతే ముద్రాం నివేద్య పాత్రాణి చ మూలేన దత్త్వా రిక్తే పంచామృతం సంయోజ్య తేన పంచవారం సకృద్వా'భిషిచ్య నిత్యేన సంతర్ప్య కల్పస్తవనాదిపురుషసూక్త-రుద్రాధ్యాయఘోషశాంత్యాదినా మూలేన చాభిషిచ్య సర్వపూజాం నివేద్య దీపం త్రిర్భ్రామ్య సవ్యేనాప్లావ్య మహానైవేద్యపీఠావరణాన్యుపసంహృత్య దర్శయేత్ | తాంబూలాంతే కించిన్మూలమావర్త్య పునర్ధూపాదిత్రయభక్ష్యాది నివేద్య ముద్రాః సర్వోపచారస్య దర్శయిత్వా నివేదనమిదమాసనం నమః పాద్యే ఏషో'ర్ఘ్యః స్వాహేతి దక్షిణకరే'ర్ఘ్యే ఇదం స్వధేతి పురస్త్రికే ముఖే నమ ఇతి స్నానేష్వేష గంధో నమో'క్షతేషు ఓం పుష్పాణి నమః పుష్పేష్వేష ధూపో దీపో నమో ధూపదీపయోః సమర్పయామీతి నైవేద్యఫలతాంబూలేషు నివేదయామి నమో హిరణ్యే ఏష పుష్పాంజలిర్నమ ఇతి మాలాయామితి పరమం రహస్యమప్రకాశ్యం బీజం య ఏవం వేద స సర్వం వేద స సర్వం వేద | వర్ణార్థం లబ్ధాంశేన మంత్రార్థేన చ పీఠావరణదేవతావధానేన వా జపతి స జపతి | ముఖ్యం లబ్ధాంశమాసనం మృదులం భుక్తరిక్తవాసఃకౌసుంభమాంజిష్ఠ-రక్తకంబలచిత్రమృగవ్యాఘ్రాజినం వా యథోక్తముక్తాన్యతరై-రాసనాంతరయోజనాస్ఫటికకమల-భద్రాక్షమణిముక్తాప్రవాలరుద్రాక్ష-
కుశగ్రంథిషు వా జపతి స జపతి | కుశమయీ నిత్యాక్షాలనం చందనాలేపో ధూపేనాభిమంత్ర్య పృథగభిమంత్రణం సద్యోజాతైః పంచభిః ప్రాణస్థాపనజీవనతర్పణగుప్తాని చ స్వమూలే గుహ్యం వామేన స్పృశేన్న దర్శయేత్ | ఏవం శ్రావణే పవిత్రేణ మధౌ దమనేన జపమాలయా మహానవమ్యాం తాపస్యాం చతుర్థ్యాం తిలలడ్డుకైః సప్తమ్యాం శీతలచందనేన శివరాత్ర్యాం బిల్వదలమాలయా'న్యస్మిన్పర్వణి మహత్యార్చయంతి తే'ర్చయంతి | మోదకపృథుకలాజసక్తురంభాఫలేక్షునారీకేలాపూపానన్యాని చ యథోపదిష్టమాహుతిభిర్జుహోతి | జపశ్చ ప్రాక్ప్రవణే హోమో'న్యథోపాస్యః | ఏవం యః కరోతి సో'మృతత్వం విందతి స ప్రతిష్ఠాం ప్రాప్నోతి ముక్తిం విందతి భుక్తిం భునక్తి వాచం వదతి యశో లభతే | ఇదం రహస్యం యో జానాతి స జానాతి యో'ధీతే సో'ధీతే స ఆనందో భవతి స నిత్యో భవతి స విశుద్ధో భవతి స ముక్తో భవతి స ప్రకాశో భవతి స దయావాన్భవతి జ్ఞానవాన్భవత్యానందవాన్భవతి విజ్ఞానవాన్భవతి విజ్ఞానానందో భవతి సో'మృతత్వం భవత్యమృతత్వం భవతీతి | ఓం సహ నావవత్వితి శాంతిః ||
ఇతి గణేశోత్తరతాపిన్యుపనిషత్సు షష్ఠోపనిషత్ ||
ఇత్యాథర్వణీయా గణేశతాపిన్యుపనిషత్సమాప్తా |
ఉపనిషత్తులు
तॆलुगु
स्तोत्रनिधि
उपनिषत्तुलु
|| अथ गणेशपूर्वतापिन्युपनिषत् ||
गणेशं प्रमथाधीशं निर्गुणं सगुणं विभुम् |
योगिनो यत्पदं यान्ति तं गौरीनन्दनं भजे ||
ॐ नमो वरदाय विघ्नहर्त्रे || अथातो ब्रह्मोपनिषदं व्याख्यास्यामः | ब्रह्मा देवानां सवितुः कवीनामृषिर्विप्राणां महिषो मृगाणाम् | धाता वसूनां सुरभिः सृजानां नमो ब्रह्मणेऽथर्वपुत्राय मीढुषे || धाता देवानां प्रथमं हि चेतो मनो वनानीव मनसाऽकल्पयद्यः | नमो ब्रह्मणे ब्रह्मपुत्राय तुभ्यं ज्येष्ठायाथर्वपुत्राय धन्विने ||
ॐ प्रजापतिः प्रजा असृजत | ताः सृष्टा अब्रुवन् कथमन्नाद्या अभवन्निति | स त्रेधा व्यभजद्भूर्भुवःस्वरिति | स तपोऽतप्यत | स ब्रह्मा स विष्णुः स शिवः स प्रजापतिः सेन्द्रः सोऽग्निः समभवत् | स तूष्णीं मनसा ध्यायन् कथमिमेऽन्नाद्याः स्युरिति | सोऽपश्यदात्मनाऽऽत्मानं गजरूपधरं देवं शशिवर्णं चतुर्भुजं यतो वा इमानि भूतानि जायन्ते यतो वायन्ति यत्रैव यन्ति च | तदेतदक्षरं परं ब्रह्म | एतस्माज्जायते प्राणो मनः सर्वेन्द्रियाणि च | खं वायुरापो ज्योतिः पृथिवी विश्वस्य धारिणी | पुरुष एवेदं विश्वं तपो ब्रह्म परामृतमिति ||
सोऽस्तुवत नमो ब्रह्मणे नमो ब्राह्मणेभ्यो नमो वेदेभ्यो नम ऋषिभ्यो नमः कुल्येभ्यः प्रकुल्येभ्यो नमः सवित्रे प्रसवित्रे नमो भोज्याय प्रकृष्टाय कपर्दिने चक्राय चक्रधरायान्नायान्नपतये शिवाय सदाशिवाय तुर्याय तुरीयाय भूर्भुवःस्वःपते रायस्पते वाजिपते गोपते ऋग्यजुःसामाथर्वाङ्गिरःपते नमो ब्रह्मपुत्रायेति ||
सोऽब्रवीद्वरदोऽस्म्यहमिति | स प्रजापतिरब्रवीत्कथमिमेऽन्नाद्याः स्युरिति | स होवाच ब्रह्मपुत्रस्तपस्तेपे सिद्धक्षेत्रे महायशाः | स सर्वस्य वक्ता सर्वस्य ज्ञातासीति | स होवाच तपस्यन्तं सिद्धारण्ये भृगुपुत्रं पृच्छध्वमिति | ते प्रत्याययुः | स होवाच किमेतदिति | ते होचुः कथं वयमन्नाद्या भवाम इति | स तूष्णीं मनसा ध्यायन् कथमिमेऽन्नाद्याः स्युरिति | स एतमानुष्टुभं मन्त्रराजमपश्यत् | यदिदं किञ्च सर्वमसृजत | तस्मात्सर्वानुष्टुभमित्याचक्षते यदिदं किञ्च | अनुष्टुभा वा इमानि भूतानि जायन्ते | अनुष्टुभा जातानि जीवन्त्यनुष्टुभं प्रयन्त्यभिसंविशन्ति | तस्यैषा भवति अनुष्टुप्प्रथमा भवत्यनुष्टुबुत्तमा भवति | वाग्वा अनुष्टुब्वाचैव प्रयन्ति वाचैवोद्यन्ति | परमा वा एषा छन्दसां यदनुष्टुप् | सर्वमनुष्टुप् | एतं मन्त्रराजं यः पश्यति स पश्यति | स भुक्तिं मुक्तिं च विन्दति | तेन सर्वज्ञानं भवति | तदेतन्निदर्शनं भवति ; एको देवः प्रापको यो वसूनां श्रिया जुष्टः सर्वतोभद्र एषः | मायादेवो बलगहनो ब्रह्मारातीस्तं देवमीडे दक्षिणास्यम् || आ तू न इन्द्र क्षुमन्तं चित्रं ग्राभं सङ्गृभाय | महाहस्ती दक्षिणेन || इति सहस्रकृत्वस्तुष्टाव ||
अथापश्यन्महादेवं श्रिया जुष्टं मदोत्कटम् | सनकादिमहायोगिवेदविद्भिरुपासितम् || द्रुहिणादिमदेवेशषट्पदालिविराजितम् | लसत्कर्णं महादेवं गजरूपधरं शिवम् || स होवाच वरदोऽस्मीति | स तूष्णीं मनसा वव्रे | स तथेति होवाच | तदेष श्लोकः ; स संस्तुतो दैवतदेवसूनुः सुतं भृगोर्वाक्यमुवाच तुष्टः | अवेहि मां भार्गव वक्रतुण्डमनाथनाथं त्रिगुणात्मकं शिवम् ||
अथ तस्य षडङ्गानि प्रादुर्बभूवुः | स होवाच जपध्वमानुष्टुभं मन्त्रराज षट्पदं सषडक्षरम् | इति यो जपति स भूतिमान् भवतीति यूयमन्नाद्या भवेयुरिति | तदेतन्निदर्शनम् ; गणानां त्वा गणनाथं सुरेन्द्रं कविं कवीनामतिमेधविग्रहम् | ज्येष्ठराजं वृषभं केतुमेकं सा नः शृण्वन्नूतिभिः सीद शाश्वत् ||
ते होचुः कथमानुष्टुभं मन्त्रराजमभिजानीम इति | स एतमानुष्टुभं षट्पदं मन्त्रराज कथयाञ्चक्रे | स साम भवति | ऋग्वै गायत्री यजुरुष्णिगनुष्टुप् साम | स आदित्यो भवति | ऋग्वै वसुर्यजू रुद्राः सामादित्या इति | स षट्पदो भवति | साम वै षट्पदः | ससागरां सप्तद्वीपां सपर्वतां वसुन्धरां तत्साम्नः प्रथमं पादं जानीयाद्रायस्पोषस्य दातेति | तेन सप्तद्वीपाधिपो भवति भूःपतित्वं च गच्छति | यक्षगन्धर्वाप्सरोगणसेवितमन्तरिक्षं द्वितीयं पादं जानीयान्निधिदातेति | तेन धनदादिकाष्ठापतिर्भवति भुवःपतित्वं च गच्छति | वसुरुद्रादित्यैः सर्वैर्देवैः सेवितं दिवं तत्साम्नस्तृतीयं पादं जानीयादन्नदो मत इति | तेन देवाधिपत्यं स्वःपतित्वं च गच्छति | ऋग्यजुःसामाथर्वाङ्गिरोगणसेवितं ब्रह्मलोकं तुर्यं पादं जानीयाद्रक्षोहण इति | तेन देवाधिपत्यं ब्रह्माधिपत्यं च गच्छति | वासुदेवादिचतुर्व्यूहसेवितं विष्णुलोकं तत्साम्नः पञ्चमं पादं जानीयाद्बलगहन इति | तेन सर्वदेवाधिपत्यं विष्णुलोकाधिपत्यं च गच्छति | ब्रह्मस्वरूपं निरञ्जनं परमव्योम्निकं तत्साम्नः षष्ठं पादं जानीयात् | तेन वक्रतुण्डाय हुमिति यो जानीयात्सोऽमृतत्वं च गच्छति | सत्यलोकाधिपत्यं च गच्छति ||
ऋग्यजुःसामाथर्वाश्चत्वारः पादा भवन्ति | रायस्पोषस्य दाता चेति प्रथमः पादो भवति ऋग्वै प्रथमः पादः | निधिदाताऽन्नदो मत इति द्वितीयः पादः यजुर्वै द्वितीयः पादः | रक्षोहणो वो बलगहन इति तृतीयः पादः साम वै तृतीयः पादः | वक्रतुण्डाय हुमिति चतुर्थः पादः अथर्वश्चतुर्थः पादोऽथर्वश्चतुर्थः पाद इति ||
इति गणेशपूर्वतापिन्युपनिषत्सु प्रथमोपनिषत् ||
स होवाच प्रजापतिरग्निर्वै वेदा इदं सर्वं विश्वानि भूतानि विराट् स्वराट् सम्राट् तत्साम्नः प्रथमं पादं जानीयात् | ऋग्यजुःसामाथर्वरूपः सूर्योऽन्तरादित्ये हिरण्मयः पुरुषस्तत्साम्नो द्वितीयं पादं जानीयात् | य ओषधीनां प्रभविता तारापतिः सोमस्तत्साम्नस्तृतीयं पादं जानीयात् | यो ब्रह्मा तत्साम्नश्चतुर्थं पादं जानीयात् | यो हरिस्तत्साम्नः पञ्चमं पादं जानीयात् | यः शिवः स परं ब्रह्म तत्साम्नोऽन्त्यं पादं जानीयात् | यो जानीते सोऽमृतत्वं च गच्छति परं ब्रह्मैव भवति | तस्मादिदमानुष्टुभं साम यत्र क्वचिन्नाचष्टे | यदि दातुमपेक्षते पुत्राय शुश्रूषवे दास्यत्यन्यस्मै शिष्याय वेति ||
तस्य हि षडङ्गानि भवन्ति ; ॐ हृदयाय नमः, शिरसे स्वाहा, शिखायै वषट्, कवचाय हुम् | नेत्रत्रयाय वौषट्, अस्त्राय फडिति प्रथमं प्रथमेन द्वितीयं द्वितीयेन तृतीयं तृतीयेन चतुर्थं चतुर्थेन पञ्चमं पञ्चमेन षष्ठं षष्ठेन प्रत्यक्षरमुभयतो माया लक्ष्मीश्च भवति | माया वा एषा वैनायकी सर्वमिदं सृजति सर्वमिदं रक्षति सर्वमिदं संहरति तस्मान्मायामेतां शक्तिं वेद | स मृत्युं जयति | स पाप्मानं तरति | स महतीं श्रियमश्नुते | सोऽभिवादी षट्कर्मसंसिद्धो भवत्यमृतत्वं च गच्छति | मीमांसन्ते ब्रह्मवादिनो ह्रस्वा वा दीर्घा वा प्लुता वेति | यदि ह्रस्वा भवति सर्वपाप्मानं तरत्यमृतत्वं च गच्छति | यदि दीर्घा भवति महतीं श्रियमाप्नुयादमृतत्वं च गच्छति | यदि प्लुता भवति ज्ञानवान् भवत्यमृतत्वं च गच्छति | तदेतदृषिणोक्तं निदर्शनम् ; स ईं पाहि य ऋजीषी तरुद्रः स श्रियं लक्ष्मीमौपलांबिकां गाम् | षष्ठीं च यामिन्द्रसेनेत्युत आहुस्तां विद्यां ब्रह्मयोनिस्वरूपाम् || तामिहायुषे शरणं प्रपद्ये | क्षीरोदार्णवशायिनं कल्पद्रुमाधःस्थितं वरदं व्योमरूपिणं प्रचण्डदण्डदोर्दण्डं वक्रतुण्डस्वरूपिणं पार्श्वाधःस्थितकामधेनुं शिवोमातनयं विभुम् | रुक्मांबरनिभाकाशं रक्तवर्णं चतुर्भुजम् | कपर्दिनं शिवं शान्तं भक्तानामभयप्रदम् ||
उन्नतप्रपदाङ्गुष्ठं गूढगुल्फं सपार्ष्णिकम् | पीनजङ्घं गूढजानुं स्थूलोरुं प्रोन्नमत्कटिम् ||
निम्ननाभिं कंबुकण्ठं लंबोष्ठं लंबनासिकम् | सिद्धिबुद्ध्युभयाश्लिष्टं प्रसन्नवदनांबुजम् ||
अथ छन्दोदैवतम् | अनुष्टुप्छन्दो भवति द्वात्रिंशदक्षरानुष्टुब भवति | अनुष्टुभा सर्वमिदं सृष्टमनुष्टुभा सर्वमुपसंहृतम् | शिवोमायुतः परमात्मा वरदो देवता | ते होचुः कथं शिवोमायुत इति | स होवाच भृगुपुत्रः प्रकृतिपुरुषमयो हि स धनद इति प्रकृतिर्माया पुरुषः शिव इति | सोऽयं विश्वात्मा देवतेति | तदेतन्निदर्शनम् ; इन्द्रो मायाभिः पुरुहूत ईडे शर्वो विश्वं मायया स्विद्दधार | सोऽजः शेते मायया स्विद्गुहायां विश्वं न्यस्तं विष्णुरेको विजज्ञे || तदेतन्माया हंसमयी देवानाम् ||
सर्वेषां वा एतद्भूतानामाकाशः परायणम् | सर्वाणि ह वा इमानि भूतान्याकाशादेव जायन्ते जातानि जीवन्त्याकाशं प्रयन्त्यभिसंविशन्ति | तस्मादाकाशबीजं शिवो विद्यात् | तदेतन्निदर्शनम् ; हंसः शुचिषद्वसुरन्तरिक्षसद्धोता वेदिषदतिथिर्दुरोणसत् | नृषद्वरसदृतसद्व्योमसदब्जा गोजा ऋतजा अद्रिजा ऋतं बृहदिति ||
अथाधिष्ठानम् ; मध्ये बिन्दुं त्रिकोणं तदनु ऋतुगणं वसुदलं द्वादशारं षोडशकर्णिकेति | मध्ये बीजात्मकं देवं यजेत् | वामदक्षिणे सिद्धिर्बुद्धिः | अग्रे कामदुघा षट्कोणे सुमुखादयः षड्विनायकाः | वसुदले वक्रतुण्डाद्यष्टविनायकाः | द्वादशारे बटुको वामनो महादशकमहोदरौ सुभद्रो माली वरो राम उमा शिवः स्कन्दो नन्दी | तद्बाह्येऽणिमादिसिद्धयः | षोडशारे दिक्पालाः सायुधा इति ||
अथ प्रसारः ; य एतेन चतुर्थीषु पक्षयोरुभयोरपि | लक्षं जुहुयादपूपानां तत्क्षणाद्धनदो भवेत् || सिद्धौदनं त्रिमासं तु जुह्वदग्नावनन्यधीः | तावज्जुह्वत्पृथुकान्हि साक्षाद्वैश्रवणो भवेत् || उच्चाटयेद्विभीतैश्च मारयेद्विषवृक्षजैः | वश्याय पङ्कजैर्विद्वान्धनार्थी मोदकैर्हुनेत् || एवं ज्ञात्वा कृतकर्मा भवति कृतकर्मा भवतीति ||
इति गणेशपूर्वतापिन्युपनिषत्सु द्वितीयोपनिषत् ||
अथ होवाच भृगुपुत्रस्तन्त्रं विजिज्ञासितव्यमिति | मूले शून्यं विजानीयात् | शून्यं वै परं ब्रह्म | तत्र सतारं समायं साम न्यसेत्त्रिरेखं भवति त्रयो हीमे लोकास्त्रयो हीमे वेदाः | ऋग्वै भूः सा माया भवति | यजुर्वै भुवः स शिवो भवति | साम वै स्वः स हिरण्यगर्भो भवति | षट्कोणं भवति षड् हीमे लोकाः षड्ढा ऋतवो भवन्ति | तत्र तारमायारमामारविश्वेशधरणीक्रमान्न्यसेत् | अष्टपत्रं भवत्यष्टाक्षरा गायत्री भवति ब्रह्मगायत्रीं न्यसेत् | द्वादशपत्र भवति द्वादशादित्या भवन्ति ते स्वरा भवन्ति | स्वरान् ज्ञात्वादित्यलोकमश्नुते | षोडशपत्रं भवति षोडशकलो वै पुरुषो वर्णो ह वै पुरुषः स लोकाधिष्ठितो भवत्यनुष्टुब् वै पुरुषः ||
स होवाच भृगुपुत्र एतमानुष्टुभं मन्त्रराजं साङ्गं सप्रसृतिकं समायं साधिष्ठानं सतन्त्रं यो जानाति स भूतिमान् भवति सोऽमृतत्वं च गच्छति सोऽमृतत्वं च गच्छतीति ||
इति गणेशपूर्वतापिन्युपनिषत्सु तृतीयोपनिषत् ||
इत्याथर्वणीया गणेशपूर्वतापिन्युपनिषत्समाप्ता ||
|| अथ गणेशोत्तरतापिन्युपनिषत् ||
ॐ || ओमित्येकाक्षरं ब्रह्मेदं सर्वम् | तस्योपव्याख्यानम् | सर्वं भूतं भव्यं भविष्यदिति सर्वमोङ्कार एव | एतच्चान्यच्च त्रिकालातीतं तदप्योङ्कार एव | सर्वं ह्येतद्गणेशोऽयमात्मा ब्रह्मेति | सोऽयमात्मा चतुष्पात् | जागरितस्थानो बहिःप्रज्ञः सप्ताङ्ग एकोनविंशतिमुखः स्थूलभुग्वैश्वानरः प्रथमः पादः | स्वप्नस्थानोऽन्तःप्रज्ञः सप्ताङ्ग एकोनविंशतिमुखः प्रविविक्तभुक् तैजसो द्वितीयः पादः | यत्र सुप्तो न कञ्चन कामं कामयते न कञ्चन स्वप्नं पश्यति तत्सुषुप्तम् | सुषुप्तिस्थान एकीभूतः प्रज्ञानघन एवानन्दभुक् चेतोमुखः प्राज्ञस्तृतीयः पादः | एष सर्वेश्वर एष सर्वज्ञ एषोऽन्तर्याम्येष योनिः सर्वस्य प्रभवाप्ययौ हि भूतानाम् | नान्तःप्रज्ञं न बहिःप्रज्ञं नोभयतःप्रज्ञं न प्रज्ञं नाप्रज्ञं न प्रज्ञानघनमदृष्ट-मव्यवहार्यमग्राह्यमलक्षण-मचिन्त्यमव्यपदेश्य-मैकात्म्यप्रत्ययसारं प्रपञ्चोपशमं शिवमद्वैतं चतुर्थं मन्यन्ते स गणेश आत्मा विज्ञेयः | सदोज्ज्वलो विद्यातत्कार्यहीनः स्वात्मबन्धरहितः सर्वदोषरहित आनन्दरूपः सर्वाधिष्ठानः सन्मात्रो निरस्ताविद्यातमोमोहमेवेति संभाव्याहमों तत्सत्परं ब्रह्म विघ्नराजश्चिदात्मकः सोऽहमों तद्विनायकं परं ज्योती रसोऽहमित्यात्मानमादाय मनसा ब्रह्मणैकीकुर्यात् | विनायकोऽहमित्येतत्तत्त्वतः प्रवदन्ति ये | न ते संसारिणो नूनं प्रमोदो वै न संशयः || इत्युपनिषत् | य एवं वेद स मुख्यो भवतीति याज्ञवल्क्य इति याज्ञवल्क्य इति | एतदेव परं ध्यानमेतदेव परं तपः | विनायकस्य यज्ज्ञानं पूजनं भवमोचनम् || अश्वमेधसहस्राणि वाजपेयशतानि च | एकस्य ध्यानयोगस्य कलां नार्हन्ति षोडशीम् ||
इति गणेशोत्तरतापिन्युपनिषत्सु प्रथमोपनिषत् ||
ॐ || स विष्णुः स शिवः स ब्रह्मा सेन्द्रः सेन्दुः स सूर्यः स वायुः सोऽग्निः स ब्रह्मायमात्मने सर्वदेवाय आत्मने भूताय आत्मन इति मन्यन्ते | ॐ सोऽहं ॐ सोऽहं ॐ सोऽहमिति | ॐ ब्रह्मन् ॐ ब्रह्मन् ॐ ब्रह्मन्निति | ॐ शिवं ॐ शिवं ॐ शिवमिति | तं गणेशं तं गणेशमिदं श्रेष्ठम् | ॐ गणानां त्वा गणपतिः | सप्रियाणां त्वा प्रियपतिः | सनिधीनां त्वा निधिपतिः | ॐ तत्पुरुषाय विद्महे वक्रतुण्डाय धीमहि | तन्नो दन्ती प्रचोदयात् | ॐ तद्गणेशः | ॐ सद्गणेशः | ॐ परं गणेशः | ॐ ब्रह्म गणेशः | गणनाकारो नादः | एतत्सर्वो नादः | सर्वाकारो नादः | एतदाकारो नादः | महान्नादः | स गणेशो महान् भवति | सोऽणुर्भवति | स वन्द्यो भवति | स मुख्यो भवति | स पूज्यो भवति | रूपवान् भवति | अरूपवान् भावति | द्वैतो भवति | अद्वैतो भवति | स्थावरस्वरूपवान् भवति | जङ्गमस्वरूपवान् भवति | सचेतनविचेतनो भवति | सर्वं भवति | स गणेशोऽव्यक्तो योऽणुर्यः श्रेष्ठः स वै वेगवत्तरः | अह्रस्वाह्रस्वश्च | अतिह्रस्वातिह्रस्वातिह्रस्वश्च | अस्थूलास्थूलास्थूलश्च | ॐ न वायुर्नाग्निर्नाकाशो नापः पृथिवी न च | न दृश्यं न दृश्यं न दृश्यम् | न शीतं नोष्णं न वर्षं च | न पीतं न पीतं न पीतम् | न श्वेतं न श्वेतं न श्वेतम् | न रक्तं न रक्तं न रक्तं | न कृष्णं न कृष्णं न कृष्णम् | न रूपं न नाम न गुणम् | न प्राप्यं गणेशं मन्यन्ते | स शुद्धः स शुद्धः स शुद्धो गणेशः | स ब्रह्म स ब्रह्म स ब्रह्म गणेशः | स शिवः स शिवः स शिवो गणेशः | इन्द्रो गणेशो विष्णुर्गणेशः सूर्यो गणेश एतत्सर्वं गणेशः | स निर्गुणः स निरहङ्कारः स निर्विकल्पः स निरीहः स निराकार आनन्दरूपस्तेजोरूपमनिर्वाच्यमप्रमेयः पुरातनो गणेशो निगद्यते | स आद्यः सोऽक्षरः सोऽनन्तः सोऽव्ययो महान्पुरुषः | तच्छुद्धं तच्छबलं ततः प्रकृतिमहत्तत्त्वानि जायन्ते | ततश्चाहङ्कारादि पञ्चतन्मात्राणि जायन्ते | ततः पृथ्व्यप्तेजोवाय्वाकाश पञ्चमहद्भूतानि जायन्ते | पृथिव्या ओषधय ओषधीभ्योऽन्नमन्नाद्रेतस्ततः पुरुषस्ततः सर्वं ततः सर्वं ततः सर्वं ततः सर्वं जगत् | सर्वाणि भूतानि जायन्ते | देवा नु जायन्ते | ततश्च जीवन्ति | देवा नु जीवन्ति | यज्ञा नु जीवन्ति | सर्वं जीवति | स गणेश आत्मा विज्ञेयः | इत्युपनिषत् | य एवं वेद स मुख्यो भवतीति याज्ञवल्क्य इति याज्ञवल्क्य इति ||
इति गणेशोत्तरतापिन्युपनिषत्सु द्वितीयोपनिषत् ||
ॐ || गणेशो वै ब्रह्म तद्विद्यात् | यदिदं किञ्च सर्वं भूतं भव्यं जायमानं च तत्सर्वमित्याचक्षते | अस्मान्नातः परं किञ्चित् | यो वै वेद स वेद ब्रह्म ब्रह्मैवोपाप्नोति | तत्सर्वमित्याचक्षते | ब्रह्मविष्ण्वादिगणानामीशभूतमित्याह तद्गणेश इति | तत्परमित्याह यमेते नाप्नुवन्ति पृथिवी सुवर्चा युवतिः सजोषाः | यद्वै वाङ् नाक्रामति मनसा सह नाग्निर्न पृथ्वी न तेजो न वायुर्न व्योम न जलमित्याह | नेन्द्रियं न शरीरं न नाम न रूपम् | न शुक्लं न रक्तं न पीतं न कृष्णमिति | न जाग्रन्न स्वप्नो न सुषुप्तिर्न वै तुरीया | तच्छुद्धमप्राप्यमप्राप्यं च | अज्ञेयं चाज्ञेयं च | विकल्पासहिष्णु तत्सशक्तिकं गजवक्त्रं गजाकारं जगदेवावरुन्धे | दिवमनन्तशीर्षैर्दिशमनन्तकरैर्व्योमानन्त-जठरैर्महीमनन्तपादैः स्वतेजसा बाह्यान्तरीयान्व्याप्य तिष्ठतीत्याह | तद्वै परं ब्रह्म गणेश इत्यात्मानं मन्यन्ते | तद्वै सर्वतः पश्यति स्म न किञ्चिद्ददर्श | ततो वै सोऽहमभूत् | नैकाकिता युक्तेति गुणान्निर्ममे | नामे रजः स वै ब्रह्मा | मुखात्सत्त्वं स वै विष्णुः | नयनात्तमः स वै हरः | ब्रह्माणमुपदिशति स्म ब्रह्मन् कुरु सृष्टिम् | ब्रह्मोवाच नाहं वेद्मि | गणेश उवाच मद्देहे ब्रह्माण्डान्तर्गतं विलोकय तथाविधामेव कुरु सृष्टिम् | अथ ब्रह्मा जन्मद्वारेण ब्रह्माण्डान्तर्गतं विलोकयति स्म | समुद्रान् सरितः पर्वतान् वनानि महीं दिवं पातालं च नरान् पशून्मृगान्नागान् हयान् गोव्रजान् सूर्याचन्द्रमसो नक्षत्राण्यग्नीन् वायून्दिशस्ततो वै सृष्टिमचीकरत् | ततश्चात्मानमिति मन्यते स्म | न वै मत्तः परं किञ्चिदहमेव सर्वस्येश इति यावद्वदति तावत्क्रूरा अजायेरन् | महद्देहा जिह्वया भुवं लिहाना दंष्ट्राव्याप्ताकाशा महच्छब्दा ब्रह्माणं हन्तुमुद्युक्ताः | तान्दृष्ट्वाबिभ्यत्तत्संस्मार | ततश्चाग्रे कोटिसूर्यप्रतीकाशमानन्दरूपं गजवक्त्रं विलोकयति स्म | तुष्टावाथ गणेश्वरम् | त्वं निर्माता क्ष्माभृतां सरितां सागराणां स्थावराणां जङ्गमानां च | त्वत्तः परतरं किञ्चिन्नैवास्ति जगतः प्रभो | कर्ता सर्वस्य विश्वस्य पातसंहारकारकः |
भवानिदं जगत्सर्वं व्याप्यैव परितिष्ठति || इति स्तुत्वा ब्रह्माणं तदुवाच ब्रह्मंस्तपस्व तपस्वेत्युक्त्वाऽन्तर्हिते तस्मिन् ब्रह्मा तपश्चचार | कियत्स्वतीतेष्वनेहःसु तपसि स्थिते ब्रह्मणि पुरो भूत्वोवाच | प्रसन्नोऽहं प्रसन्नोऽहं वरान् वरय | श्रुत्वैवं वचोन्मील्य नयने यावत्पुरः पश्यति तावद्गणेशं ददर्श | स्तौति स्म | त्वं ब्रह्मा त्वं विष्णुस्त्वं हरस्त्वं प्रजापतिस्त्वमिन्द्रस्त्वं सूर्यस्त्वं सोमस्त्वं गणेशः | त्वया व्याप्तं चराचरं त्वदृते न हि किञ्चन | ततश्च गणेश उवाच | त्वं चाहं च न वै भिन्नौ कुरु सृष्टिं प्रजापते | शक्तिं गृहाण मद्दत्तां जगत्सर्जनकर्मणि || ततो वै गृहीतायां शस्त्वा ब्रह्मणः सृष्टिरजायत | ब्राह्मणो वै मुखाज्जज्ञे बाह्वोः क्षत्रमूर्वोर्वैश्यः पद्भ्यां शूद्रश्चक्षुषो वै सूर्यो मनश्चन्द्रमा अग्निर्वै मुखात्प्राणाद्वायुर्नाभेर्व्योम शीर्ष्णो द्यौः पद्भ्यां भूमिर्दिशः श्रोत्रात् | तथा लोकानकल्पयन्निति | ततो वै सत्त्वमुवाच त्वं वै विष्णुः पाहि पाहि जगत्सर्वम् | विष्णुरुवाच न मे शक्तिः | सोवाच गृहाणेमां विद्याम् | ततो वै सत्त्वं तामादाय जगत्पाति स्म | हरमुवाच कुरु हर संहारम् | जगद्धरणाद्धरो भव | हरश्चात्मानमित्यवैति स्म न वै मत्परं किञ्चिद्विश्वस्यादिरहं हर इति गर्वं दधौ यावत्तावद्व्याप्तं व्योम गजवक्त्रैर्महच्छब्दैर्हरं हर्तुमुद्युक्तैः | हरो वै विलोक्य रुदति स्म | रोदनाद्रुद्रसंज्ञः | ततस्तं पुरुषं स्मृत्वा तुष्टाव त्वं ब्रह्मा त्वं कर्ता त्वं प्रधानं त्वं लोकान् सृजसि रक्षसि हरसि |
विश्वाधारस्त्वमनाधारोऽनाधेयोऽनिर्देश्योऽप्रतर्क्यो व्याप्येदं सर्वं तिष्ठसीति स्तवनाद्विनायकं ददर्श | ततश्च तं ननाम | गणेश उवाच कुरु हर हरणम् | तद्वै संहर्ताऽभूद्रुद्रः | य एवं वेद स गणेशो भवति | इत्युपनिषत् ||
इति गणेशोत्तरतापिन्युपनिषत्सु तृतीयोपनिषत् ||
ॐ || गणेशो वै सदजायत तद्वै परं ब्रह्म | तद्विदाप्नोति परम् | तदेषाभ्युक्ता यदनादिभूतं यदनन्तरूपं यद्विज्ञानरूपं यद्देवाः सर्वे ब्रह्म ज्येष्ठमुपासते न वै कार्यं करणं न तत्समश्चाधिकश्च दृश्यः | सूर्योऽस्माद्भीत उदेति | वातोऽस्माद्भीतः पवते | अग्निर्वै भीतस्तिष्ठति | तच्चित्स्वरूपं निर्विकारमद्वैतं च | तन्मायाशबलमजनीत्याह | अनेन यथा तमस्ततश्चोमिति ध्वनिरभूत् | स वै गजाकारः | अनिर्वचनीया सैव माया जगद्बीजमित्याह | सैव प्रकृतिरिति गणेश इति प्रधानमिति च मायाशबलमिति च | एतस्माद्वै महत्तत्त्वमजायत | ततः कराग्रेणाहङ्कारं सृष्टवान् | स वै त्रिविधः सात्त्विको राजसस्तामसश्चेति | सात्त्विकी ज्ञानशक्तिः | राजसी क्रियाशक्तिः | तामसी द्रव्यशक्तिः | तामस्याः पञ्चतन्मात्रा अजायन्त पञ्चभूतान्यजायन्त | राजस्याः पञ्च ज्ञानेन्द्रियाणि पञ्च कर्मेन्द्रियाणि पञ्च वायवश्चाजायन्त | सात्त्विक्या दिशो वायुः सूर्यो वरुणोऽश्विनाविति ज्ञानेन्द्रियदेवता अग्निरिन्द्रो विष्णुः प्रजापतिर्मित्र इति कर्मेन्द्रियदेवताः | इदमादिपुरुषरूपम् | परमात्मनः सूक्ष्मशरीरमिदमेवोच्यते | अथ द्वितीयम् | पञ्चतन्मात्राः पञ्चसूक्ष्मभूतान्युपादाय पञ्चीकरणे कृते पञ्चमहाभूतान्यजायन्त |
अवशिष्टानां पञ्चपञ्चाशानां कल्पारंभसमये भूतविभागे चैतन्यप्रवेशादहमित्यभिमानः | तस्मादादिगणेशो भवानुच्यते | ततो वै भूतेभ्यश्चतुर्दश लोका अजायेरन् | तदन्तर्गतजीवराशयः स्थूलशरीरैः सह विराडित्युच्यते | इति द्वितीयम् | राजसो ब्रह्मा सात्त्विको विष्णुस्तामसो वै हरः | त्रयं मिलित्वा परस्परमुवाच अहमेव सर्वस्येश इति | ततो वै परस्परमसहमानाश्चोर्ध्वं जग्मुः | तत्र न किञ्चिद्ददृशुः | ततश्चाधःप्रदेशे दशदिक्षु भ्रमन्तो न किञ्चित्पश्यन्ति स्म | ततो वै ध्यानस्थिता अभूवन् | ततश्च हृद्देशे महान्तं पुरुषं गजवक्त्रमसंख्यशीर्षमसंख्यपादमनन्तकरं तेजसा व्याप्ताखिललोकं ब्रह्ममूर्धानं दिक्श्रवणं ब्रह्माण्डगण्डं चिद्व्योमतालुकं सत्यजननं च जगदुत्पत्त्यपायोन्मेषनिमेषं सोमार्काग्निनेत्रं पर्वतेशरदं पुण्यापुण्योष्ठं ग्रहोडुदशनं भारतीजिह्वं शक्रघ्राणं कुलगोत्रांसं सोमेन कण्ठं हरशिरोरुहं सरिन्नदभुजमुरगाङ्गुलिकमृक्षनखं श्रीहृत्कामाकाशनाभिकं सागरोदरं महीकटिदेशं सृष्टिलिङ्गकं पर्वतेशोरुं दस्रजानुकं जठरान्तःस्थितयक्षगन्धर्वरक्षःकिन्नरमानुषं पातालजंघकं मुनिचरणं कालाङ्गुष्ठकं तारकाजाललाङ्गुलं दृष्ट्वा स्तुवन्ति स्म | यतो वा इमानि भूतानि जायन्ते यतोऽग्निः पृथिव्यप्तेजो वायुर्यत्कराग्राद्ब्रह्मविष्णुरुद्रा अजायन्त यतो वै समुद्राः सरितः पर्वताश्च यतो वै चराचरमिति स्तवनात्प्रसन्नो भूत्वोवाचाऽहं सर्वस्येशो मत्तः सर्वाणि भूतानि मत्तः सर्वं चराचरं भवन्तो वै न मद्भिन्ना गुणा मे वै न संशयः | गुणेशं मां हृदि सञ्चिन्त्य राजस त्वं जगत्कुरु सात्त्विक त्वं पालय तामस त्वं हरेत्युक्त्वान्तर्हितः | स वै गणेशः | सर्वात्मा विज्ञेयः सर्वदेवात्मा वै स एकः | य एवं वेद स गणेशो भवति | इत्युपनिषत् |
इति गणेशोत्तरतापिन्युपनिषत्सु चतुर्थोपनिषत् ||
ॐ || देवा ह वै रुद्रमब्रुवन् कथमेतस्योपासनम् | स होवाच रुद्रो गणको निचृद्गायत्री श्रीगणपतेरेनं मन्त्रराजमन्योन्याभावात्प्रणवस्वरूपस्यास्य परमात्मनोऽङ्गानि जानीते स जानाति सोऽमृतत्वं च गच्छति | योऽधीते स सर्वं तरति | य एनं मन्त्रराजं गणपतेः सर्वदं नित्यं जपति सोऽग्निं स्तंभयति स उदकं स्तंभयति स वायुं स्तंभयति स सूर्यं स्तंभयति स सर्वान्देवान् स्तंभयति स विषं स्तंभयति स सर्वोपद्रवान् स्तंभयति | इत्युपनिषत् | य एनं मन्त्रराजं नित्यमधीते स विघ्नानाकर्षयति देवान्यक्षान् रोगान् ग्रहान्मनुष्यान् सर्वानाकर्षयति | स भूर्लोकं जयति स भुवर्लोकं जयति स स्वर्लोकं स महर्लोकं स जनोलोकं स तपोलोकं स सत्यलोकं स सप्तलोकं स सर्वलोकं जयति | सोऽग्निष्टोमेन यजते सोऽत्यग्निष्टोमेन स उक्थ्येन स षोडशीयेन स वाजपेयेन सोऽतिरात्रेण सोऽप्तोर्यामेण स सर्वैः क्रतुभिर्यजते | य एनं मन्त्रराजं वैघ्नराजं नित्यमधीते स ऋचोऽधीते स यजूंष्यधीते स सामान्यधीते सोऽथर्वणमधीते सोऽङ्गिरसमधीते स शाखा अधीते स पुराणान्यधीते स कल्पानधीते स गाथा अधीते स नाराशंसीरधीते स प्रणवमधीते | य एनं मन्त्रराजं गाणेशं वेद स सर्वं वेद स सर्वं वेद | स वेदसमः स मुनिसमः स नागसमः स सूर्यसमः सोऽग्निसम इति | उपनीतैकाधिकशतं गृहस्थैकाधिकशतं वानप्रस्थकाधिकशतं रुद्रजापकसमम् | यतीनामेकाधिकशतमथर्वशिरःशिखाध्यापकसमम् |
रुद्रजापकैकाधिकशतमथर्वशिरःशिखाध्यापकैकाधिकशतं गाणेशतापनीयोपनिषदध्यापकसमम् | मन्त्रराजजापकस्य यत्र रविसोमौ न तपतो यत्र वायुर्नक्षत्राणि न वाति भान्ति यत्राग्निर्मृत्युर्न दहति प्रविशति यत्र मोहो न दुःखं सदानन्दं परानन्दं समं शाश्वतं सदाशिवं परं ब्रह्मादिवन्दितं योगिध्येयं परमं पदं चिन्मात्रं ब्रह्मणस्पतिमेकाक्षरमेवं परमात्मानं बाह्यान्ते लब्धांशं हृदि समावेश्य किञ्चिज्जप्त्वा ततो न जपो न माला नासनं न ध्यानावाहनादि | स्वयमवतीर्णो ह्ययमात्मा ब्रह्म सोऽहमात्मा चतुष्पात् | बहिःप्रज्ञः प्रविविक्तभुक् तैजसः | यत्र सुप्तो न कञ्चन कामं कामयते न कञ्चन स्वप्नं पश्यति तत्सुषुप्तम् | तत्रैकीभूतः प्रज्ञानघन एवानन्दभुक् चेतोमुखः प्राज्ञः | एष सर्वेश्वरः सर्वान्तर्यामी एष योनिः सर्वभूतानाम् | न बहिःप्रज्ञं नान्तःप्रज्ञं नोभयतःप्रज्ञं न प्रज्ञानघनमव्यपदेश्यमव्यवहार्यमग्राह्यमलक्षणमचिन्त्यमैकात्म्यप्रत्ययसारं प्रपञ्चोपशमं शिवमद्वैतमेवं चतुष्पादं ध्यायन् स एवात्मा भवति | स आत्मा विज्ञेयः सदोज्ज्वलोऽविद्यातत्कार्यहीनः स्वात्मबन्धरहितो द्वैतरहितो निरस्ताविद्यातमोमोहाहङ्कारप्रधानमहमेव सर्वमिति संभाव्य विघ्नराजब्रह्मण्यमृते तेजोमये परंज्योतिर्मये सदानन्दमये स्वप्रकाशे सदोदिते नित्ये शुद्धे मुक्ते ज्ञेश्वरे परे ब्रह्मणि रमते रमते रमते रमते | य एवं गणेशतापनीयोपनिषदं वेद स संसारं तरति घोरं तरति दुःखं तरति विघ्नांस्तरति महोपसर्गं तरति | आनन्दो भवति स नित्यो भवति स शुद्धो भवति स मुक्तो भवति स स्वप्रकाशो भवति स ईश्वरो भवति स मुख्यो भवति स वैश्वानरो भवति स तैजसो भवति स प्राज्ञो भवति स साक्षी भवति स एव भवति स सर्वो भवति स सर्वो भवतीति | इत्युपनिषत् | ॐ स ह नाववतु ||
इति गणेशोत्तरतापिन्युपनिषत्सु पञ्चमोपनिषत् ||
ॐ || अथोवाच भगवती गौरी ह वै रुद्रमेतस्य मन्त्रराजस्यानुष्ठानविधिं मे ब्रूहीति | स होवाच रुद्रो विधिं लब्धांशं गुरुदेवतयोरालभ्य मनसा पुष्पं निवेद्योपक्रम्य भूतोत्सारणमासनबन्धाद्यात्मरक्षासुनियमभूतशुद्धि-प्राणस्थापनप्रणवावर्तन-मातृपूजनान्तर्मातृकान्तर्यागादि सम्पाद्यात्र केचन समन्त्रं मूलवैदिककल्पैरुपक्रमं ग्रहणसमर्पणनिवेदनानि बाह्येऽन्यथेति महार्घ्यं शङ्खं त्रिपाद्योर्गन्धादिना पूजितयोः स्थाप्य पात्रासादनं दक्षिणोपक्रमेण पाद्यार्घ्याचमनमधुपर्क-पुनराचमननिवेदनपात्राणि संस्थासु यथोपदिष्टं चतुर्थ्योः पर्वणि संस्थासु यथाविधि स्थाप्य निवेदने प्रक्षालनमेव ततोऽर्वाक् पञ्चामृतपात्राणि रिक्तं च मूलेनालभ्य निवेदिन्यार्घ्योदकेनात्मानं पात्राणि संभारं च प्रोक्ष्य पात्रातिरिक्तानि महार्घ्योदकेन सर्वनिवेदनं करशुद्धिं मूलासुनियमं यथोक्तर्षिच्छन्दोदैवतं स्मृत्वा विनियोगश्च नित्ये पूजाङ्गो जपो जपाङ्गा पूजा जप इत्यङ्गुष्ठव्यापकस्वान्ताष्टाङ्गदण्डिमुण्डिन्यासादि कृत्वा मुखमवेक्ष्यात्मानं देवरूपिणं संभाव्य मूर्ध्नि पुष्पं दत्त्वा पीठं सम्पूज्यासनं दत्त्वा ऋष्यादि कृत्वा ध्यात्वा हृदयांभोजे योगिनोऽत्र जपन्ति | स्वान्तांभोजाद्देवमावाह्य मुद्रां दर्शयित्वा देवस्य सकलीकरणाङ्गुष्ठहृदयार्पिन्या स्वान्ते मुद्रां निवेद्य पात्राणि च मूलेन दत्त्वा रिक्ते पञ्चामृतं संयोज्य तेन पञ्चवारं सकृद्वाऽभिषिच्य नित्येन संतर्प्य कल्पस्तवनादिपुरुषसूक्त-रुद्राध्यायघोषशान्त्यादिना मूलेन चाभिषिच्य सर्वपूजां निवेद्य दीपं त्रिर्भ्राम्य सव्येनाप्लाव्य महानैवेद्यपीठावरणान्युपसंहृत्य दर्शयेत् | तांबूलान्ते किञ्चिन्मूलमावर्त्य पुनर्धूपादित्रयभक्ष्यादि निवेद्य मुद्राः सर्वोपचारस्य दर्शयित्वा निवेदनमिदमासनं नमः पाद्ये एषोऽर्घ्यः स्वाहेति दक्षिणकरेऽर्घ्ये इदं स्वधेति पुरस्त्रिके मुखे नम इति स्नानेष्वेष गन्धो नमोऽक्षतेषु ॐ पुष्पाणि नमः पुष्पेष्वेष धूपो दीपो नमो धूपदीपयोः समर्पयामीति नैवेद्यफलतांबूलेषु निवेदयामि नमो हिरण्ये एष पुष्पाञ्जलिर्नम इति मालायामिति परमं रहस्यमप्रकाश्यं बीजं य एवं वेद स सर्वं वेद स सर्वं वेद | वर्णार्थं लब्धांशेन मन्त्रार्थेन च पीठावरणदेवतावधानेन वा जपति स जपति | मुख्यं लब्धांशमासनं मृदुलं भुक्तरिक्तवासःकौसुंभमाञ्जिष्ठ-रक्तकंबलचित्रमृगव्याघ्राजिनं वा यथोक्तमुक्तान्यतरै-रासनान्तरयोजनास्फटिककमल-भद्राक्षमणिमुक्ताप्रवालरुद्राक्ष-
कुशग्रन्थिषु वा जपति स जपति | कुशमयी नित्याक्षालनं चन्दनालेपो धूपेनाभिमन्त्र्य पृथगभिमन्त्रणं सद्योजातैः पञ्चभिः प्राणस्थापनजीवनतर्पणगुप्तानि च स्वमूले गुह्यं वामेन स्पृशेन्न दर्शयेत् | एवं श्रावणे पवित्रेण मधौ दमनेन जपमालया महानवम्यां तापस्यां चतुर्थ्यां तिललड्डुकैः सप्तम्यां शीतलचन्दनेन शिवरात्र्यां बिल्वदलमालयाऽन्यस्मिन्पर्वणि महत्यार्चयन्ति तेऽर्चयन्ति | मोदकपृथुकलाजसक्तुरंभाफलेक्षुनारीकेलापूपानन्यानि च यथोपदिष्टमाहुतिभिर्जुहोति | जपश्च प्राक्प्रवणे होमोऽन्यथोपास्यः | एवं यः करोति सोऽमृतत्वं विन्दति स प्रतिष्ठां प्राप्नोति मुक्तिं विन्दति भुक्तिं भुनक्ति वाचं वदति यशो लभते | इदं रहस्यं यो जानाति स जानाति योऽधीते सोऽधीते स आनन्दो भवति स नित्यो भवति स विशुद्धो भवति स मुक्तो भवति स प्रकाशो भवति स दयावान्भवति ज्ञानवान्भवत्यानन्दवान्भवति विज्ञानवान्भवति विज्ञानानन्दो भवति सोऽमृतत्वं भवत्यमृतत्वं भवतीति | ॐ सह नाववत्विति शान्तिः ||
इति गणेशोत्तरतापिन्युपनिषत्सु षष्ठोपनिषत् ||
इत्याथर्वणीया गणेशतापिन्युपनिषत्समाप्ता |
मरिन्नि
श्री गणेश स्तोत्रालु
चूडंडि. मरिन्नि
उपनिषत्तुलु
चूडंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु
tèlugu
upaniṣattulu
|| atha gaṇeśapūrvatāpinyupaniṣat ||
gaṇeśaṃ pramathādhīśaṃ nirguṇaṃ saguṇaṃ vibhum |
yogino yatpadaṃ yānti taṃ gaurīnandanaṃ bhaje ||
oṃ namo varadāya vighnahartre || athāto brahmopaniṣadaṃ vyākhyāsyāmaḥ | brahmā devānāṃ savituḥ kavīnāmṛṣirviprāṇāṃ mahiṣo mṛgāṇām | dhātā vasūnāṃ surabhiḥ sṛjānāṃ namo brahmaṇe'tharvaputrāya mīḍhuṣe || dhātā devānāṃ prathamaṃ hi ceto mano vanānīva manasā'kalpayadyaḥ | namo brahmaṇe brahmaputrāya tubhyaṃ jyeṣṭhāyātharvaputrāya dhanvine ||
oṃ prajāpatiḥ prajā asṛjata | tāḥ sṛṣṭā abruvan kathamannādyā abhavanniti | sa tredhā vyabhajadbhūrbhuvaḥsvariti | sa tapo'tapyata | sa brahmā sa viṣṇuḥ sa śivaḥ sa prajāpatiḥ sendraḥ so'gniḥ samabhavat | sa tūṣṇīṃ manasā dhyāyan kathamime'nnādyāḥ syuriti | so'paśyadātmanā''tmānaṃ gajarūpadharaṃ devaṃ śaśivarṇaṃ caturbhujaṃ yato vā imāni bhūtāni jāyante yato vāyanti yatraiva yanti ca | tadetadakṣaraṃ paraṃ brahma | etasmājjāyate prāṇo manaḥ sarvendriyāṇi ca | khaṃ vāyurāpo jyotiḥ pṛthivī viśvasya dhāriṇī | puruṣa evedaṃ viśvaṃ tapo brahma parāmṛtamiti ||
so'stuvata namo brahmaṇe namo brāhmaṇebhyo namo vedebhyo nama ṛṣibhyo namaḥ kulyebhyaḥ prakulyebhyo namaḥ savitre prasavitre namo bhojyāya prakṛṣṭāya kapardine cakrāya cakradharāyānnāyānnapataye śivāya sadāśivāya turyāya turīyāya bhūrbhuvaḥsvaḥpate rāyaspate vājipate gopate ṛgyajuḥsāmātharvāṅgiraḥpate namo brahmaputrāyeti ||
so'bravīdvarado'smyahamiti | sa prajāpatirabravītkathamime'nnādyāḥ syuriti | sa hovāca brahmaputrastapastepe siddhakṣetre mahāyaśāḥ | sa sarvasya vaktā sarvasya jñātāsīti | sa hovāca tapasyantaṃ siddhāraṇye bhṛguputraṃ pṛcchadhvamiti | te pratyāyayuḥ | sa hovāca kimetaditi | te hocuḥ kathaṃ vayamannādyā bhavāma iti | sa tūṣṇīṃ manasā dhyāyan kathamime'nnādyāḥ syuriti | sa etamānuṣṭubhaṃ mantrarājamapaśyat | yadidaṃ kiñca sarvamasṛjata | tasmātsarvānuṣṭubhamityācakṣate yadidaṃ kiñca | anuṣṭubhā vā imāni bhūtāni jāyante | anuṣṭubhā jātāni jīvantyanuṣṭubhaṃ prayantyabhisaṃviśanti | tasyaiṣā bhavati anuṣṭupprathamā bhavatyanuṣṭubuttamā bhavati | vāgvā anuṣṭubvācaiva prayanti vācaivodyanti | paramā vā eṣā chandasāṃ yadanuṣṭup | sarvamanuṣṭup | etaṃ mantrarājaṃ yaḥ paśyati sa paśyati | sa bhuktiṃ muktiṃ ca vindati | tena sarvajñānaṃ bhavati | tadetannidarśanaṃ bhavati ; eko devaḥ prāpako yo vasūnāṃ śriyā juṣṭaḥ sarvatobhadra eṣaḥ | māyādevo balagahano brahmārātīstaṃ devamīḍe dakṣiṇāsyam || ā tū na indra kṣumantaṃ citraṃ grābhaṃ saṅgṛbhāya | mahāhastī dakṣiṇena || iti sahasrakṛtvastuṣṭāva ||
athāpaśyanmahādevaṃ śriyā juṣṭaṃ madotkaṭam | sanakādimahāyogivedavidbhirupāsitam || druhiṇādimadeveśaṣaṭpadālivirājitam | lasatkarṇaṃ mahādevaṃ gajarūpadharaṃ śivam || sa hovāca varado'smīti | sa tūṣṇīṃ manasā vavre | sa tatheti hovāca | tadeṣa ślokaḥ ; sa saṃstuto daivatadevasūnuḥ sutaṃ bhṛgorvākyamuvāca tuṣṭaḥ | avehi māṃ bhārgava vakratuṇḍamanāthanāthaṃ triguṇātmakaṃ śivam ||
atha tasya ṣaḍaṅgāni prādurbabhūvuḥ | sa hovāca japadhvamānuṣṭubhaṃ mantrarāja ṣaṭpadaṃ saṣaḍakṣaram | iti yo japati sa bhūtimān bhavatīti yūyamannādyā bhaveyuriti | tadetannidarśanam ; gaṇānāṃ tvā gaṇanāthaṃ surendraṃ kaviṃ kavīnāmatimedhavigraham | jyeṣṭharājaṃ vṛṣabhaṃ ketumekaṃ sā naḥ śṛṇvannūtibhiḥ sīda śāśvat ||
te hocuḥ kathamānuṣṭubhaṃ mantrarājamabhijānīma iti | sa etamānuṣṭubhaṃ ṣaṭpadaṃ mantrarāja kathayāñcakre | sa sāma bhavati | ṛgvai gāyatrī yajuruṣṇiganuṣṭup sāma | sa ādityo bhavati | ṛgvai vasuryajū rudrāḥ sāmādityā iti | sa ṣaṭpado bhavati | sāma vai ṣaṭpadaḥ | sasāgarāṃ saptadvīpāṃ saparvatāṃ vasundharāṃ tatsāmnaḥ prathamaṃ pādaṃ jānīyādrāyaspoṣasya dāteti | tena saptadvīpādhipo bhavati bhūḥpatitvaṃ ca gacchati | yakṣagandharvāpsarogaṇasevitamantarikṣaṃ dvitīyaṃ pādaṃ jānīyānnidhidāteti | tena dhanadādikāṣṭhāpatirbhavati bhuvaḥpatitvaṃ ca gacchati | vasurudrādityaiḥ sarvairdevaiḥ sevitaṃ divaṃ tatsāmnastṛtīyaṃ pādaṃ jānīyādannado mata iti | tena devādhipatyaṃ svaḥpatitvaṃ ca gacchati | ṛgyajuḥsāmātharvāṅgirogaṇasevitaṃ brahmalokaṃ turyaṃ pādaṃ jānīyādrakṣohaṇa iti | tena devādhipatyaṃ brahmādhipatyaṃ ca gacchati | vāsudevādicaturvyūhasevitaṃ viṣṇulokaṃ tatsāmnaḥ pañcamaṃ pādaṃ jānīyādbalagahana iti | tena sarvadevādhipatyaṃ viṣṇulokādhipatyaṃ ca gacchati | brahmasvarūpaṃ nirañjanaṃ paramavyomnikaṃ tatsāmnaḥ ṣaṣṭhaṃ pādaṃ jānīyāt | tena vakratuṇḍāya humiti yo jānīyātso'mṛtatvaṃ ca gacchati | satyalokādhipatyaṃ ca gacchati ||
ṛgyajuḥsāmātharvāścatvāraḥ pādā bhavanti | rāyaspoṣasya dātā ceti prathamaḥ pādo bhavati ṛgvai prathamaḥ pādaḥ | nidhidātā'nnado mata iti dvitīyaḥ pādaḥ yajurvai dvitīyaḥ pādaḥ | rakṣohaṇo vo balagahana iti tṛtīyaḥ pādaḥ sāma vai tṛtīyaḥ pādaḥ | vakratuṇḍāya humiti caturthaḥ pādaḥ atharvaścaturthaḥ pādo'tharvaścaturthaḥ pāda iti ||
iti gaṇeśapūrvatāpinyupaniṣatsu prathamopaniṣat ||
sa hovāca prajāpatiragnirvai vedā idaṃ sarvaṃ viśvāni bhūtāni virāṭ svarāṭ samrāṭ tatsāmnaḥ prathamaṃ pādaṃ jānīyāt | ṛgyajuḥsāmātharvarūpaḥ sūryo'ntarāditye hiraṇmayaḥ puruṣastatsāmno dvitīyaṃ pādaṃ jānīyāt | ya oṣadhīnāṃ prabhavitā tārāpatiḥ somastatsāmnastṛtīyaṃ pādaṃ jānīyāt | yo brahmā tatsāmnaścaturthaṃ pādaṃ jānīyāt | yo haristatsāmnaḥ pañcamaṃ pādaṃ jānīyāt | yaḥ śivaḥ sa paraṃ brahma tatsāmno'ntyaṃ pādaṃ jānīyāt | yo jānīte so'mṛtatvaṃ ca gacchati paraṃ brahmaiva bhavati | tasmādidamānuṣṭubhaṃ sāma yatra kvacinnācaṣṭe | yadi dātumapekṣate putrāya śuśrūṣave dāsyatyanyasmai śiṣyāya veti ||
tasya hi ṣaḍaṅgāni bhavanti ; oṃ hṛdayāya namaḥ, śirase svāhā, śikhāyai vaṣaṭ, kavacāya hum | netratrayāya vauṣaṭ, astrāya phaḍiti prathamaṃ prathamena dvitīyaṃ dvitīyena tṛtīyaṃ tṛtīyena caturthaṃ caturthena pañcamaṃ pañcamena ṣaṣṭhaṃ ṣaṣṭhena pratyakṣaramubhayato māyā lakṣmīśca bhavati | māyā vā eṣā vaināyakī sarvamidaṃ sṛjati sarvamidaṃ rakṣati sarvamidaṃ saṃharati tasmānmāyāmetāṃ śaktiṃ veda | sa mṛtyuṃ jayati | sa pāpmānaṃ tarati | sa mahatīṃ śriyamaśnute | so'bhivādī ṣaṭkarmasaṃsiddho bhavatyamṛtatvaṃ ca gacchati | mīmāṃsante brahmavādino hrasvā vā dīrghā vā plutā veti | yadi hrasvā bhavati sarvapāpmānaṃ taratyamṛtatvaṃ ca gacchati | yadi dīrghā bhavati mahatīṃ śriyamāpnuyādamṛtatvaṃ ca gacchati | yadi plutā bhavati jñānavān bhavatyamṛtatvaṃ ca gacchati | tadetadṛṣiṇoktaṃ nidarśanam ; sa īṃ pāhi ya ṛjīṣī tarudraḥ sa śriyaṃ lakṣmīmaupalāṃbikāṃ gām | ṣaṣṭhīṃ ca yāmindrasenetyuta āhustāṃ vidyāṃ brahmayonisvarūpām || tāmihāyuṣe śaraṇaṃ prapadye | kṣīrodārṇavaśāyinaṃ kalpadrumādhaḥsthitaṃ varadaṃ vyomarūpiṇaṃ pracaṇḍadaṇḍadordaṇḍaṃ vakratuṇḍasvarūpiṇaṃ pārśvādhaḥsthitakāmadhenuṃ śivomātanayaṃ vibhum | rukmāṃbaranibhākāśaṃ raktavarṇaṃ caturbhujam | kapardinaṃ śivaṃ śāntaṃ bhaktānāmabhayapradam ||
unnataprapadāṅguṣṭhaṃ gūḍhagulphaṃ sapārṣṇikam | pīnajaṅghaṃ gūḍhajānuṃ sthūloruṃ pronnamatkaṭim ||
nimnanābhiṃ kaṃbukaṇṭhaṃ laṃboṣṭhaṃ laṃbanāsikam | siddhibuddhyubhayāśliṣṭaṃ prasannavadanāṃbujam ||
atha chandodaivatam | anuṣṭupchando bhavati dvātriṃśadakṣarānuṣṭuba bhavati | anuṣṭubhā sarvamidaṃ sṛṣṭamanuṣṭubhā sarvamupasaṃhṛtam | śivomāyutaḥ paramātmā varado devatā | te hocuḥ kathaṃ śivomāyuta iti | sa hovāca bhṛguputraḥ prakṛtipuruṣamayo hi sa dhanada iti prakṛtirmāyā puruṣaḥ śiva iti | so'yaṃ viśvātmā devateti | tadetannidarśanam ; indro māyābhiḥ puruhūta īḍe śarvo viśvaṃ māyayā sviddadhāra | so'jaḥ śete māyayā svidguhāyāṃ viśvaṃ nyastaṃ viṣṇureko vijajñe || tadetanmāyā haṃsamayī devānām ||
sarveṣāṃ vā etadbhūtānāmākāśaḥ parāyaṇam | sarvāṇi ha vā imāni bhūtānyākāśādeva jāyante jātāni jīvantyākāśaṃ prayantyabhisaṃviśanti | tasmādākāśabījaṃ śivo vidyāt | tadetannidarśanam ; haṃsaḥ śuciṣadvasurantarikṣasaddhotā vediṣadatithirduroṇasat | nṛṣadvarasadṛtasadvyomasadabjā gojā ṛtajā adrijā ṛtaṃ bṛhaditi ||
athādhiṣṭhānam ; madhye binduṃ trikoṇaṃ tadanu ṛtugaṇaṃ vasudalaṃ dvādaśāraṃ ṣoḍaśakarṇiketi | madhye bījātmakaṃ devaṃ yajet | vāmadakṣiṇe siddhirbuddhiḥ | agre kāmadughā ṣaṭkoṇe sumukhādayaḥ ṣaḍvināyakāḥ | vasudale vakratuṇḍādyaṣṭavināyakāḥ | dvādaśāre baṭuko vāmano mahādaśakamahodarau subhadro mālī varo rāma umā śivaḥ skando nandī | tadbāhye'ṇimādisiddhayaḥ | ṣoḍaśāre dikpālāḥ sāyudhā iti ||
atha prasāraḥ ; ya etena caturthīṣu pakṣayorubhayorapi | lakṣaṃ juhuyādapūpānāṃ tatkṣaṇāddhanado bhavet || siddhaudanaṃ trimāsaṃ tu juhvadagnāvananyadhīḥ | tāvajjuhvatpṛthukānhi sākṣādvaiśravaṇo bhavet || uccāṭayedvibhītaiśca mārayedviṣavṛkṣajaiḥ | vaśyāya paṅkajairvidvāndhanārthī modakairhunet || evaṃ jñātvā kṛtakarmā bhavati kṛtakarmā bhavatīti ||
iti gaṇeśapūrvatāpinyupaniṣatsu dvitīyopaniṣat ||
atha hovāca bhṛguputrastantraṃ vijijñāsitavyamiti | mūle śūnyaṃ vijānīyāt | śūnyaṃ vai paraṃ brahma | tatra satāraṃ samāyaṃ sāma nyasettrirekhaṃ bhavati trayo hīme lokāstrayo hīme vedāḥ | ṛgvai bhūḥ sā māyā bhavati | yajurvai bhuvaḥ sa śivo bhavati | sāma vai svaḥ sa hiraṇyagarbho bhavati | ṣaṭkoṇaṃ bhavati ṣaḍ hīme lokāḥ ṣaḍḍhā ṛtavo bhavanti | tatra tāramāyāramāmāraviśveśadharaṇīkramānnyaset | aṣṭapatraṃ bhavatyaṣṭākṣarā gāyatrī bhavati brahmagāyatrīṃ nyaset | dvādaśapatra bhavati dvādaśādityā bhavanti te svarā bhavanti | svarān jñātvādityalokamaśnute | ṣoḍaśapatraṃ bhavati ṣoḍaśakalo vai puruṣo varṇo ha vai puruṣaḥ sa lokādhiṣṭhito bhavatyanuṣṭub vai puruṣaḥ ||
sa hovāca bhṛguputra etamānuṣṭubhaṃ mantrarājaṃ sāṅgaṃ saprasṛtikaṃ samāyaṃ sādhiṣṭhānaṃ satantraṃ yo jānāti sa bhūtimān bhavati so'mṛtatvaṃ ca gacchati so'mṛtatvaṃ ca gacchatīti ||
iti gaṇeśapūrvatāpinyupaniṣatsu tṛtīyopaniṣat ||
ityātharvaṇīyā gaṇeśapūrvatāpinyupaniṣatsamāptā ||
|| atha gaṇeśottaratāpinyupaniṣat ||
oṃ || omityekākṣaraṃ brahmedaṃ sarvam | tasyopavyākhyānam | sarvaṃ bhūtaṃ bhavyaṃ bhaviṣyaditi sarvamoṅkāra eva | etaccānyacca trikālātītaṃ tadapyoṅkāra eva | sarvaṃ hyetadgaṇeśo'yamātmā brahmeti | so'yamātmā catuṣpāt | jāgaritasthāno bahiḥprajñaḥ saptāṅga ekonaviṃśatimukhaḥ sthūlabhugvaiśvānaraḥ prathamaḥ pādaḥ | svapnasthāno'ntaḥprajñaḥ saptāṅga ekonaviṃśatimukhaḥ praviviktabhuk taijaso dvitīyaḥ pādaḥ | yatra supto na kañcana kāmaṃ kāmayate na kañcana svapnaṃ paśyati tatsuṣuptam | suṣuptisthāna ekībhūtaḥ prajñānaghana evānandabhuk cetomukhaḥ prājñastṛtīyaḥ pādaḥ | eṣa sarveśvara eṣa sarvajña eṣo'ntaryāmyeṣa yoniḥ sarvasya prabhavāpyayau hi bhūtānām | nāntaḥprajñaṃ na bahiḥprajñaṃ nobhayataḥprajñaṃ na prajñaṃ nāprajñaṃ na prajñānaghanamadṛṣṭa-mavyavahāryamagrāhyamalakṣaṇa-macintyamavyapadeśya-maikātmyapratyayasāraṃ prapañcopaśamaṃ śivamadvaitaṃ caturthaṃ manyante sa gaṇeśa ātmā vijñeyaḥ | sadojjvalo vidyātatkāryahīnaḥ svātmabandharahitaḥ sarvadoṣarahita ānandarūpaḥ sarvādhiṣṭhānaḥ sanmātro nirastāvidyātamomohameveti saṃbhāvyāhamoṃ tatsatparaṃ brahma vighnarājaścidātmakaḥ so'hamoṃ tadvināyakaṃ paraṃ jyotī raso'hamityātmānamādāya manasā brahmaṇaikīkuryāt | vināyako'hamityetattattvataḥ pravadanti ye | na te saṃsāriṇo nūnaṃ pramodo vai na saṃśayaḥ || ityupaniṣat | ya evaṃ veda sa mukhyo bhavatīti yājñavalkya iti yājñavalkya iti | etadeva paraṃ dhyānametadeva paraṃ tapaḥ | vināyakasya yajjñānaṃ pūjanaṃ bhavamocanam || aśvamedhasahasrāṇi vājapeyaśatāni ca | ekasya dhyānayogasya kalāṃ nārhanti ṣoḍaśīm ||
iti gaṇeśottaratāpinyupaniṣatsu prathamopaniṣat ||
oṃ || sa viṣṇuḥ sa śivaḥ sa brahmā sendraḥ senduḥ sa sūryaḥ sa vāyuḥ so'gniḥ sa brahmāyamātmane sarvadevāya ātmane bhūtāya ātmana iti manyante | oṃ so'haṃ oṃ so'haṃ oṃ so'hamiti | oṃ brahman oṃ brahman oṃ brahmanniti | oṃ śivaṃ oṃ śivaṃ oṃ śivamiti | taṃ gaṇeśaṃ taṃ gaṇeśamidaṃ śreṣṭham | oṃ gaṇānāṃ tvā gaṇapatiḥ | sapriyāṇāṃ tvā priyapatiḥ | sanidhīnāṃ tvā nidhipatiḥ | oṃ tatpuruṣāya vidmahe vakratuṇḍāya dhīmahi | tanno dantī pracodayāt | oṃ tadgaṇeśaḥ | oṃ sadgaṇeśaḥ | oṃ paraṃ gaṇeśaḥ | oṃ brahma gaṇeśaḥ | gaṇanākāro nādaḥ | etatsarvo nādaḥ | sarvākāro nādaḥ | etadākāro nādaḥ | mahānnādaḥ | sa gaṇeśo mahān bhavati | so'ṇurbhavati | sa vandyo bhavati | sa mukhyo bhavati | sa pūjyo bhavati | rūpavān bhavati | arūpavān bhāvati | dvaito bhavati | advaito bhavati | sthāvarasvarūpavān bhavati | jaṅgamasvarūpavān bhavati | sacetanavicetano bhavati | sarvaṃ bhavati | sa gaṇeśo'vyakto yo'ṇuryaḥ śreṣṭhaḥ sa vai vegavattaraḥ | ahrasvāhrasvaśca | atihrasvātihrasvātihrasvaśca | asthūlāsthūlāsthūlaśca | oṃ na vāyurnāgnirnākāśo nāpaḥ pṛthivī na ca | na dṛśyaṃ na dṛśyaṃ na dṛśyam | na śītaṃ noṣṇaṃ na varṣaṃ ca | na pītaṃ na pītaṃ na pītam | na śvetaṃ na śvetaṃ na śvetam | na raktaṃ na raktaṃ na raktaṃ | na kṛṣṇaṃ na kṛṣṇaṃ na kṛṣṇam | na rūpaṃ na nāma na guṇam | na prāpyaṃ gaṇeśaṃ manyante | sa śuddhaḥ sa śuddhaḥ sa śuddho gaṇeśaḥ | sa brahma sa brahma sa brahma gaṇeśaḥ | sa śivaḥ sa śivaḥ sa śivo gaṇeśaḥ | indro gaṇeśo viṣṇurgaṇeśaḥ sūryo gaṇeśa etatsarvaṃ gaṇeśaḥ | sa nirguṇaḥ sa nirahaṅkāraḥ sa nirvikalpaḥ sa nirīhaḥ sa nirākāra ānandarūpastejorūpamanirvācyamaprameyaḥ purātano gaṇeśo nigadyate | sa ādyaḥ so'kṣaraḥ so'nantaḥ so'vyayo mahānpuruṣaḥ | tacchuddhaṃ tacchabalaṃ tataḥ prakṛtimahattattvāni jāyante | tataścāhaṅkārādi pañcatanmātrāṇi jāyante | tataḥ pṛthvyaptejovāyvākāśa pañcamahadbhūtāni jāyante | pṛthivyā oṣadhaya oṣadhībhyo'nnamannādretastataḥ puruṣastataḥ sarvaṃ tataḥ sarvaṃ tataḥ sarvaṃ tataḥ sarvaṃ jagat | sarvāṇi bhūtāni jāyante | devā nu jāyante | tataśca jīvanti | devā nu jīvanti | yajñā nu jīvanti | sarvaṃ jīvati | sa gaṇeśa ātmā vijñeyaḥ | ityupaniṣat | ya evaṃ veda sa mukhyo bhavatīti yājñavalkya iti yājñavalkya iti ||
iti gaṇeśottaratāpinyupaniṣatsu dvitīyopaniṣat ||
oṃ || gaṇeśo vai brahma tadvidyāt | yadidaṃ kiñca sarvaṃ bhūtaṃ bhavyaṃ jāyamānaṃ ca tatsarvamityācakṣate | asmānnātaḥ paraṃ kiñcit | yo vai veda sa veda brahma brahmaivopāpnoti | tatsarvamityācakṣate | brahmaviṣṇvādigaṇānāmīśabhūtamityāha tadgaṇeśa iti | tatparamityāha yamete nāpnuvanti pṛthivī suvarcā yuvatiḥ sajoṣāḥ | yadvai vāṅ nākrāmati manasā saha nāgnirna pṛthvī na tejo na vāyurna vyoma na jalamityāha | nendriyaṃ na śarīraṃ na nāma na rūpam | na śuklaṃ na raktaṃ na pītaṃ na kṛṣṇamiti | na jāgranna svapno na suṣuptirna vai turīyā | tacchuddhamaprāpyamaprāpyaṃ ca | ajñeyaṃ cājñeyaṃ ca | vikalpāsahiṣṇu tatsaśaktikaṃ gajavaktraṃ gajākāraṃ jagadevāvarundhe | divamanantaśīrṣairdiśamanantakarairvyomānanta-jaṭharairmahīmanantapādaiḥ svatejasā bāhyāntarīyānvyāpya tiṣṭhatītyāha | tadvai paraṃ brahma gaṇeśa ityātmānaṃ manyante | tadvai sarvataḥ paśyati sma na kiñciddadarśa | tato vai so'hamabhūt | naikākitā yukteti guṇānnirmame | nāme rajaḥ sa vai brahmā | mukhātsattvaṃ sa vai viṣṇuḥ | nayanāttamaḥ sa vai haraḥ | brahmāṇamupadiśati sma brahman kuru sṛṣṭim | brahmovāca nāhaṃ vedmi | gaṇeśa uvāca maddehe brahmāṇḍāntargataṃ vilokaya tathāvidhāmeva kuru sṛṣṭim | atha brahmā janmadvāreṇa brahmāṇḍāntargataṃ vilokayati sma | samudrān saritaḥ parvatān vanāni mahīṃ divaṃ pātālaṃ ca narān paśūnmṛgānnāgān hayān govrajān sūryācandramaso nakṣatrāṇyagnīn vāyūndiśastato vai sṛṣṭimacīkarat | tataścātmānamiti manyate sma | na vai mattaḥ paraṃ kiñcidahameva sarvasyeśa iti yāvadvadati tāvatkrūrā ajāyeran | mahaddehā jihvayā bhuvaṃ lihānā daṃṣṭrāvyāptākāśā mahacchabdā brahmāṇaṃ hantumudyuktāḥ | tāndṛṣṭvābibhyattatsaṃsmāra | tataścāgre koṭisūryapratīkāśamānandarūpaṃ gajavaktraṃ vilokayati sma | tuṣṭāvātha gaṇeśvaram | tvaṃ nirmātā kṣmābhṛtāṃ saritāṃ sāgarāṇāṃ sthāvarāṇāṃ jaṅgamānāṃ ca | tvattaḥ parataraṃ kiñcinnaivāsti jagataḥ prabho | kartā sarvasya viśvasya pātasaṃhārakārakaḥ |
bhavānidaṃ jagatsarvaṃ vyāpyaiva paritiṣṭhati || iti stutvā brahmāṇaṃ taduvāca brahmaṃstapasva tapasvetyuktvā'ntarhite tasmin brahmā tapaścacāra | kiyatsvatīteṣvanehaḥsu tapasi sthite brahmaṇi puro bhūtvovāca | prasanno'haṃ prasanno'haṃ varān varaya | śrutvaivaṃ vaconmīlya nayane yāvatpuraḥ paśyati tāvadgaṇeśaṃ dadarśa | stauti sma | tvaṃ brahmā tvaṃ viṣṇustvaṃ harastvaṃ prajāpatistvamindrastvaṃ sūryastvaṃ somastvaṃ gaṇeśaḥ | tvayā vyāptaṃ carācaraṃ tvadṛte na hi kiñcana | tataśca gaṇeśa uvāca | tvaṃ cāhaṃ ca na vai bhinnau kuru sṛṣṭiṃ prajāpate | śaktiṃ gṛhāṇa maddattāṃ jagatsarjanakarmaṇi || tato vai gṛhītāyāṃ śastvā brahmaṇaḥ sṛṣṭirajāyata | brāhmaṇo vai mukhājjajñe bāhvoḥ kṣatramūrvorvaiśyaḥ padbhyāṃ śūdraścakṣuṣo vai sūryo manaścandramā agnirvai mukhātprāṇādvāyurnābhervyoma śīrṣṇo dyauḥ padbhyāṃ bhūmirdiśaḥ śrotrāt | tathā lokānakalpayanniti | tato vai sattvamuvāca tvaṃ vai viṣṇuḥ pāhi pāhi jagatsarvam | viṣṇuruvāca na me śaktiḥ | sovāca gṛhāṇemāṃ vidyām | tato vai sattvaṃ tāmādāya jagatpāti sma | haramuvāca kuru hara saṃhāram | jagaddharaṇāddharo bhava | haraścātmānamityavaiti sma na vai matparaṃ kiñcidviśvasyādirahaṃ hara iti garvaṃ dadhau yāvattāvadvyāptaṃ vyoma gajavaktrairmahacchabdairharaṃ hartumudyuktaiḥ | haro vai vilokya rudati sma | rodanādrudrasaṃjñaḥ | tatastaṃ puruṣaṃ smṛtvā tuṣṭāva tvaṃ brahmā tvaṃ kartā tvaṃ pradhānaṃ tvaṃ lokān sṛjasi rakṣasi harasi |
viśvādhārastvamanādhāro'nādheyo'nirdeśyo'pratarkyo vyāpyedaṃ sarvaṃ tiṣṭhasīti stavanādvināyakaṃ dadarśa | tataśca taṃ nanāma | gaṇeśa uvāca kuru hara haraṇam | tadvai saṃhartā'bhūdrudraḥ | ya evaṃ veda sa gaṇeśo bhavati | ityupaniṣat ||
iti gaṇeśottaratāpinyupaniṣatsu tṛtīyopaniṣat ||
oṃ || gaṇeśo vai sadajāyata tadvai paraṃ brahma | tadvidāpnoti param | tadeṣābhyuktā yadanādibhūtaṃ yadanantarūpaṃ yadvijñānarūpaṃ yaddevāḥ sarve brahma jyeṣṭhamupāsate na vai kāryaṃ karaṇaṃ na tatsamaścādhikaśca dṛśyaḥ | sūryo'smādbhīta udeti | vāto'smādbhītaḥ pavate | agnirvai bhītastiṣṭhati | taccitsvarūpaṃ nirvikāramadvaitaṃ ca | tanmāyāśabalamajanītyāha | anena yathā tamastataścomiti dhvanirabhūt | sa vai gajākāraḥ | anirvacanīyā saiva māyā jagadbījamityāha | saiva prakṛtiriti gaṇeśa iti pradhānamiti ca māyāśabalamiti ca | etasmādvai mahattattvamajāyata | tataḥ karāgreṇāhaṅkāraṃ sṛṣṭavān | sa vai trividhaḥ sāttviko rājasastāmasaśceti | sāttvikī jñānaśaktiḥ | rājasī kriyāśaktiḥ | tāmasī dravyaśaktiḥ | tāmasyāḥ pañcatanmātrā ajāyanta pañcabhūtānyajāyanta | rājasyāḥ pañca jñānendriyāṇi pañca karmendriyāṇi pañca vāyavaścājāyanta | sāttvikyā diśo vāyuḥ sūryo varuṇo'śvināviti jñānendriyadevatā agnirindro viṣṇuḥ prajāpatirmitra iti karmendriyadevatāḥ | idamādipuruṣarūpam | paramātmanaḥ sūkṣmaśarīramidamevocyate | atha dvitīyam | pañcatanmātrāḥ pañcasūkṣmabhūtānyupādāya pañcīkaraṇe kṛte pañcamahābhūtānyajāyanta |
avaśiṣṭānāṃ pañcapañcāśānāṃ kalpāraṃbhasamaye bhūtavibhāge caitanyapraveśādahamityabhimānaḥ | tasmādādigaṇeśo bhavānucyate | tato vai bhūtebhyaścaturdaśa lokā ajāyeran | tadantargatajīvarāśayaḥ sthūlaśarīraiḥ saha virāḍityucyate | iti dvitīyam | rājaso brahmā sāttviko viṣṇustāmaso vai haraḥ | trayaṃ militvā parasparamuvāca ahameva sarvasyeśa iti | tato vai parasparamasahamānāścordhvaṃ jagmuḥ | tatra na kiñciddadṛśuḥ | tataścādhaḥpradeśe daśadikṣu bhramanto na kiñcitpaśyanti sma | tato vai dhyānasthitā abhūvan | tataśca hṛddeśe mahāntaṃ puruṣaṃ gajavaktramasaṃkhyaśīrṣamasaṃkhyapādamanantakaraṃ tejasā vyāptākhilalokaṃ brahmamūrdhānaṃ dikśravaṇaṃ brahmāṇḍagaṇḍaṃ cidvyomatālukaṃ satyajananaṃ ca jagadutpattyapāyonmeṣanimeṣaṃ somārkāgninetraṃ parvateśaradaṃ puṇyāpuṇyoṣṭhaṃ grahoḍudaśanaṃ bhāratījihvaṃ śakraghrāṇaṃ kulagotrāṃsaṃ somena kaṇṭhaṃ haraśiroruhaṃ sarinnadabhujamuragāṅgulikamṛkṣanakhaṃ śrīhṛtkāmākāśanābhikaṃ sāgarodaraṃ mahīkaṭideśaṃ sṛṣṭiliṅgakaṃ parvateśoruṃ dasrajānukaṃ jaṭharāntaḥsthitayakṣagandharvarakṣaḥkinnaramānuṣaṃ pātālajaṃghakaṃ municaraṇaṃ kālāṅguṣṭhakaṃ tārakājālalāṅgulaṃ dṛṣṭvā stuvanti sma | yato vā imāni bhūtāni jāyante yato'gniḥ pṛthivyaptejo vāyuryatkarāgrādbrahmaviṣṇurudrā ajāyanta yato vai samudrāḥ saritaḥ parvatāśca yato vai carācaramiti stavanātprasanno bhūtvovācā'haṃ sarvasyeśo mattaḥ sarvāṇi bhūtāni mattaḥ sarvaṃ carācaraṃ bhavanto vai na madbhinnā guṇā me vai na saṃśayaḥ | guṇeśaṃ māṃ hṛdi sañcintya rājasa tvaṃ jagatkuru sāttvika tvaṃ pālaya tāmasa tvaṃ haretyuktvāntarhitaḥ | sa vai gaṇeśaḥ | sarvātmā vijñeyaḥ sarvadevātmā vai sa ekaḥ | ya evaṃ veda sa gaṇeśo bhavati | ityupaniṣat |
iti gaṇeśottaratāpinyupaniṣatsu caturthopaniṣat ||
oṃ || devā ha vai rudramabruvan kathametasyopāsanam | sa hovāca rudro gaṇako nicṛdgāyatrī śrīgaṇapaterenaṃ mantrarājamanyonyābhāvātpraṇavasvarūpasyāsya paramātmano'ṅgāni jānīte sa jānāti so'mṛtatvaṃ ca gacchati | yo'dhīte sa sarvaṃ tarati | ya enaṃ mantrarājaṃ gaṇapateḥ sarvadaṃ nityaṃ japati so'gniṃ staṃbhayati sa udakaṃ staṃbhayati sa vāyuṃ staṃbhayati sa sūryaṃ staṃbhayati sa sarvāndevān staṃbhayati sa viṣaṃ staṃbhayati sa sarvopadravān staṃbhayati | ityupaniṣat | ya enaṃ mantrarājaṃ nityamadhīte sa vighnānākarṣayati devānyakṣān rogān grahānmanuṣyān sarvānākarṣayati | sa bhūrlokaṃ jayati sa bhuvarlokaṃ jayati sa svarlokaṃ sa maharlokaṃ sa janolokaṃ sa tapolokaṃ sa satyalokaṃ sa saptalokaṃ sa sarvalokaṃ jayati | so'gniṣṭomena yajate so'tyagniṣṭomena sa ukthyena sa ṣoḍaśīyena sa vājapeyena so'tirātreṇa so'ptoryāmeṇa sa sarvaiḥ kratubhiryajate | ya enaṃ mantrarājaṃ vaighnarājaṃ nityamadhīte sa ṛco'dhīte sa yajūṃṣyadhīte sa sāmānyadhīte so'tharvaṇamadhīte so'ṅgirasamadhīte sa śākhā adhīte sa purāṇānyadhīte sa kalpānadhīte sa gāthā adhīte sa nārāśaṃsīradhīte sa praṇavamadhīte | ya enaṃ mantrarājaṃ gāṇeśaṃ veda sa sarvaṃ veda sa sarvaṃ veda | sa vedasamaḥ sa munisamaḥ sa nāgasamaḥ sa sūryasamaḥ so'gnisama iti | upanītaikādhikaśataṃ gṛhasthaikādhikaśataṃ vānaprasthakādhikaśataṃ rudrajāpakasamam | yatīnāmekādhikaśatamatharvaśiraḥśikhādhyāpakasamam |
rudrajāpakaikādhikaśatamatharvaśiraḥśikhādhyāpakaikādhikaśataṃ gāṇeśatāpanīyopaniṣadadhyāpakasamam | mantrarājajāpakasya yatra ravisomau na tapato yatra vāyurnakṣatrāṇi na vāti bhānti yatrāgnirmṛtyurna dahati praviśati yatra moho na duḥkhaṃ sadānandaṃ parānandaṃ samaṃ śāśvataṃ sadāśivaṃ paraṃ brahmādivanditaṃ yogidhyeyaṃ paramaṃ padaṃ cinmātraṃ brahmaṇaspatimekākṣaramevaṃ paramātmānaṃ bāhyānte labdhāṃśaṃ hṛdi samāveśya kiñcijjaptvā tato na japo na mālā nāsanaṃ na dhyānāvāhanādi | svayamavatīrṇo hyayamātmā brahma so'hamātmā catuṣpāt | bahiḥprajñaḥ praviviktabhuk taijasaḥ | yatra supto na kañcana kāmaṃ kāmayate na kañcana svapnaṃ paśyati tatsuṣuptam | tatraikībhūtaḥ prajñānaghana evānandabhuk cetomukhaḥ prājñaḥ | eṣa sarveśvaraḥ sarvāntaryāmī eṣa yoniḥ sarvabhūtānām | na bahiḥprajñaṃ nāntaḥprajñaṃ nobhayataḥprajñaṃ na prajñānaghanamavyapadeśyamavyavahāryamagrāhyamalakṣaṇamacintyamaikātmyapratyayasāraṃ prapañcopaśamaṃ śivamadvaitamevaṃ catuṣpādaṃ dhyāyan sa evātmā bhavati | sa ātmā vijñeyaḥ sadojjvalo'vidyātatkāryahīnaḥ svātmabandharahito dvaitarahito nirastāvidyātamomohāhaṅkārapradhānamahameva sarvamiti saṃbhāvya vighnarājabrahmaṇyamṛte tejomaye paraṃjyotirmaye sadānandamaye svaprakāśe sadodite nitye śuddhe mukte jñeśvare pare brahmaṇi ramate ramate ramate ramate | ya evaṃ gaṇeśatāpanīyopaniṣadaṃ veda sa saṃsāraṃ tarati ghoraṃ tarati duḥkhaṃ tarati vighnāṃstarati mahopasargaṃ tarati | ānando bhavati sa nityo bhavati sa śuddho bhavati sa mukto bhavati sa svaprakāśo bhavati sa īśvaro bhavati sa mukhyo bhavati sa vaiśvānaro bhavati sa taijaso bhavati sa prājño bhavati sa sākṣī bhavati sa eva bhavati sa sarvo bhavati sa sarvo bhavatīti | ityupaniṣat | oṃ sa ha nāvavatu ||
iti gaṇeśottaratāpinyupaniṣatsu pañcamopaniṣat ||
oṃ || athovāca bhagavatī gaurī ha vai rudrametasya mantrarājasyānuṣṭhānavidhiṃ me brūhīti | sa hovāca rudro vidhiṃ labdhāṃśaṃ gurudevatayorālabhya manasā puṣpaṃ nivedyopakramya bhūtotsāraṇamāsanabandhādyātmarakṣāsuniyamabhūtaśuddhi-prāṇasthāpanapraṇavāvartana-mātṛpūjanāntarmātṛkāntaryāgādi sampādyātra kecana samantraṃ mūlavaidikakalpairupakramaṃ grahaṇasamarpaṇanivedanāni bāhye'nyatheti mahārghyaṃ śaṅkhaṃ tripādyorgandhādinā pūjitayoḥ sthāpya pātrāsādanaṃ dakṣiṇopakrameṇa pādyārghyācamanamadhuparka-punarācamananivedanapātrāṇi saṃsthāsu yathopadiṣṭaṃ caturthyoḥ parvaṇi saṃsthāsu yathāvidhi sthāpya nivedane prakṣālanameva tato'rvāk pañcāmṛtapātrāṇi riktaṃ ca mūlenālabhya nivedinyārghyodakenātmānaṃ pātrāṇi saṃbhāraṃ ca prokṣya pātrātiriktāni mahārghyodakena sarvanivedanaṃ karaśuddhiṃ mūlāsuniyamaṃ yathoktarṣicchandodaivataṃ smṛtvā viniyogaśca nitye pūjāṅgo japo japāṅgā pūjā japa ityaṅguṣṭhavyāpakasvāntāṣṭāṅgadaṇḍimuṇḍinyāsādi kṛtvā mukhamavekṣyātmānaṃ devarūpiṇaṃ saṃbhāvya mūrdhni puṣpaṃ dattvā pīṭhaṃ sampūjyāsanaṃ dattvā ṛṣyādi kṛtvā dhyātvā hṛdayāṃbhoje yogino'tra japanti | svāntāṃbhojāddevamāvāhya mudrāṃ darśayitvā devasya sakalīkaraṇāṅguṣṭhahṛdayārpinyā svānte mudrāṃ nivedya pātrāṇi ca mūlena dattvā rikte pañcāmṛtaṃ saṃyojya tena pañcavāraṃ sakṛdvā'bhiṣicya nityena saṃtarpya kalpastavanādipuruṣasūkta-rudrādhyāyaghoṣaśāntyādinā mūlena cābhiṣicya sarvapūjāṃ nivedya dīpaṃ trirbhrāmya savyenāplāvya mahānaivedyapīṭhāvaraṇānyupasaṃhṛtya darśayet | tāṃbūlānte kiñcinmūlamāvartya punardhūpāditrayabhakṣyādi nivedya mudrāḥ sarvopacārasya darśayitvā nivedanamidamāsanaṃ namaḥ pādye eṣo'rghyaḥ svāheti dakṣiṇakare'rghye idaṃ svadheti purastrike mukhe nama iti snāneṣveṣa gandho namo'kṣateṣu oṃ puṣpāṇi namaḥ puṣpeṣveṣa dhūpo dīpo namo dhūpadīpayoḥ samarpayāmīti naivedyaphalatāṃbūleṣu nivedayāmi namo hiraṇye eṣa puṣpāñjalirnama iti mālāyāmiti paramaṃ rahasyamaprakāśyaṃ bījaṃ ya evaṃ veda sa sarvaṃ veda sa sarvaṃ veda | varṇārthaṃ labdhāṃśena mantrārthena ca pīṭhāvaraṇadevatāvadhānena vā japati sa japati | mukhyaṃ labdhāṃśamāsanaṃ mṛdulaṃ bhuktariktavāsaḥkausuṃbhamāñjiṣṭha-raktakaṃbalacitramṛgavyāghrājinaṃ vā yathoktamuktānyatarai-rāsanāntarayojanāsphaṭikakamala-bhadrākṣamaṇimuktāpravālarudrākṣa-
kuśagranthiṣu vā japati sa japati | kuśamayī nityākṣālanaṃ candanālepo dhūpenābhimantrya pṛthagabhimantraṇaṃ sadyojātaiḥ pañcabhiḥ prāṇasthāpanajīvanatarpaṇaguptāni ca svamūle guhyaṃ vāmena spṛśenna darśayet | evaṃ śrāvaṇe pavitreṇa madhau damanena japamālayā mahānavamyāṃ tāpasyāṃ caturthyāṃ tilalaḍḍukaiḥ saptamyāṃ śītalacandanena śivarātryāṃ bilvadalamālayā'nyasminparvaṇi mahatyārcayanti te'rcayanti | modakapṛthukalājasakturaṃbhāphalekṣunārīkelāpūpānanyāni ca yathopadiṣṭamāhutibhirjuhoti | japaśca prākpravaṇe homo'nyathopāsyaḥ | evaṃ yaḥ karoti so'mṛtatvaṃ vindati sa pratiṣṭhāṃ prāpnoti muktiṃ vindati bhuktiṃ bhunakti vācaṃ vadati yaśo labhate | idaṃ rahasyaṃ yo jānāti sa jānāti yo'dhīte so'dhīte sa ānando bhavati sa nityo bhavati sa viśuddho bhavati sa mukto bhavati sa prakāśo bhavati sa dayāvānbhavati jñānavānbhavatyānandavānbhavati vijñānavānbhavati vijñānānando bhavati so'mṛtatvaṃ bhavatyamṛtatvaṃ bhavatīti | oṃ saha nāvavatviti śāntiḥ ||
iti gaṇeśottaratāpinyupaniṣatsu ṣaṣṭhopaniṣat ||
ityātharvaṇīyā gaṇeśatāpinyupaniṣatsamāptā |
marinni
śrī gaṇeśa stotrālu
cūḍaṃḍi. marinni
upaniṣattulu
cūḍaṃḍi.
mā pracuraṇa:
priṃṭiṃgu pūrti ayi kònugoluku siddhaṃgā uṃdi.
mā tèlugu vāṭsāp chānal ni phālo ceyaḍāniki
ikkaḍa klik ceyaṃḍi
"tèlugu"
viprulaku, dvijulaku vijñapti :
maṃtra anuṣṭhānaṃ leka neṭi kālaṃlo dharmācaraṇa kṣīṇistū unnadi. dayacesi mīku upadeśaṃ unna maṃtraṃ kanīsaṃ lakṣa japaṃ ceyaṃḍi. mīku atidaggaralo unna devālayāniki pratirojū vèḻḻi akkaḍi devata maṃtrānni kanīsaṃ 108 japaṃcesi, ā devata balānni vṛddhi ceyaṃḍi. devata anugrahaṃ uṃṭene ā prāṃtaṃlo dharmaṃ vardhillutuṃdi.
tèlugu
🕉️ పారాయణ విధానము & ఆధ్యాత్మిక ప్రాశస్త్యము (Chanting Methodology & Significance)
🪔 పారాయణ సమయము (Auspicious Chanting Time)
Best recited during Brahma Muhurta (4:00 AM – 6:00 AM) or during evening Sandhya Kaala after cleansing and lighting a traditional oil lamp (దీపారాధన).
🧘 ఆసనము & నియమములు (Posture & Focus)
Sit facing East or North on a clean woolen or cotton mat. Chant with clear pronunciation, maintaining steady rhythm and heartfelt devotion to Divinity.
Preserved across authentic palm-leaf manuscripts and classical Sanskrit traditions, this sacred hymn is revered across generations as an essential daily sadhana for spiritual seekers and householders alike.