Sri Krishna Sahasranama Stotram

– पूर्वपीठिका –
श्रीमद्रुक्मिमहीपालवंशरक्षामणिः स्थिरः ।राजा हरिहरः क्षोणीं रक्षत्यंबुधिमेखलाम् ।। १ ।।
स राजा सर्वतंत्रज्ञः समभ्यर्च्य वरप्रदम् ।देवं श्रियः पतिं स्तुत्या समस्तौद्वेदवेदितम् ।। २ ।।
तस्य हृष्टाशयः स्तुत्या विष्णुर्गोपांगनावृतः ।स पिंछश्यामलं रूपं पिंछोत्तंसमदर्शयत् ।। ३ ।।
स पुनः स्वात्मविन्यस्तचित्तं हरिहरं नृपम् ।अभिषिच्य कृपावर्षैरभाषत कृतांजलिम् ।। ४ ।।
श्रीभगवानुवाच ।मामवेहि महाभाग कृष्णं कृत्यविदां वर ।पुरः स्थितोऽस्मि त्वद्भक्त्या पूर्णाः संतु मनोरथाः ।। ५ ।।
संरक्षणाय शिष्टानां दुष्टानां शिक्षणाय च ।समृद्ध्यै वेदधर्माणां ममांशस्त्वमिहोदितः ।। ६ ।।
राजन्नामसहस्रेण रामो नाम्नां स्तुतस्त्वया ।सोऽहं सर्वविदस्तस्मात् प्रसन्नोऽस्मि विशेषतः ।। ७ ।।
मामपि त्वं महाभाग मदीयचरितात्मना ।संप्रीणय सहस्रेण नाम्नां सर्वार्थदायिनाम् ।। ८ ।।
पराशरेण मुनिना व्यासेनाम्नायदर्शिना ।स्वात्मभाजा शुकेनापि सूक्तेऽप्येतद्विभावितम् ।। ९ ।।
तं हि त्वमनुसंधेहि सहस्रशिरसं प्रभुम् ।दत्तास्येषु मया न्यस्तं सहस्रं रक्षयिष्यति ।। १० ।।
इदं विश्वहितार्थाय रसनारंगगोचरम् ।प्रकाशय त्वं मेदिन्यां परमागमसम्मतम् ।। ११ ।।
इदं शठाय मूर्खाय नास्तिकाय विकीर्णिने ।असूयिनेऽहितायापि न प्रकाश्यं कदाचन ।। १२ ।।
विवेकिने विशुद्धाय वेदमार्गानुसारिणे ।आस्तिकायात्मनिष्ठाय स्वात्मन्यनुसृतोदयम् ।कृष्णनामसहस्रं वै कृतधीरेतदीरयेत् ।। १३ ।।
अस्य श्रीकृष्ण सहस्रनाम स्तोत्रमंत्रस्य पराशर ऋषिः, अनुष्टुप् छंदः, श्रीकृष्णः परमात्मा देवता, श्रीकृष्णेति बीजं, श्रीवल्लभेति शक्तिः, शार्ङ्गीति कीलकं, श्रीकृष्णप्रीत्यर्थे जपे विनियोगः ।।
ध्यानम् –केषां चित्प्रेम पुंसां विगळितमनसां बाललीलाविलासंकेषां गोपाललीलांकितरसिकतनुर्वेणुवाद्येन देवम् ।केषां वामासमाजे जनितमनसिजो दैत्यदर्पापहैवंज्ञात्वा भिन्नाभिलाषं स जयति जगतामीश्वरस्तादृशोऽभूत् ।। १ ।।
क्षीराब्धौ कृतसंस्तवः सुरगणैर्ब्रह्मादिभिः पंडितैःप्रोद्भूतो वसुदेवसद्मनि मुदा चिक्रीड यो गोकुले ।कंसध्वंसकृते जगाम मधुरां सारामसद्वारकांगोपालोऽखिलगोपिकाजनसखः पायादपायात् स नः ।। २ ।।
फुल्लेंदीवरकांतिमिंदुवदनं बर्हावतंसप्रियंश्रीवत्सांकमुदारकौस्तुभधरं पीतांबरं सुंदरम् ।गोपीनां नयनोत्पलार्चिततनुं गोगोपसंघावृतंगोविंदं कलवेणुवादनरतं दिव्यांगभूषं भजे ।। ३ ।।
– स्तोत्रम् –
ओं । कृष्णः श्रीवल्लभः शार्ङ्गी विष्वक्सेनः स्वसिद्धिदः ।क्षीरोदधामा व्यूहेशः शेषशायी जगन्मयः ।। १ ।।
भक्तिगम्यस्त्रयीमूर्तिर्भारार्तवसुधास्तुतः ।देवदेवो दयासिंधुर्देवो देवशिखामणिः ।। २ ।।
सुखभावः सुखाधारो मुकुंदो मुदिताशयः ।अविक्रियः क्रियामूर्तिरध्यात्मस्वस्वरूपवान् ।। ३ ।।
शिष्टाभिलक्ष्यो भूतात्मा धर्मत्राणार्थचेष्टितः ।अंतर्यामी कालरूपः कालावयवसाक्षिकः ।। ४ ।।
वसुधायासहरणो नारदप्रेरणोन्मुखः ।प्रभूष्णुर्नारदोद्गीतो लोकरक्षापरायणः ।। ५ ।।
रौहिणेयकृतानंदो योगज्ञाननियोजकः ।महागुहांतर्निक्षिप्तः पुराणवपुरात्मवान् ।। ६ ।।
शूरवंशैकधीः शौरिः कंसशंकाविषादकृत् ।वसुदेवोल्लसच्छक्तिर्देवक्यष्टमगर्भगः ।। ७ ।।
वसुदेवसुतः श्रीमान् देवकीनंदनो हरिः ।आश्चर्यबालः श्रीवत्सलक्ष्मवक्षाश्चतुर्भुजः ।। ८ ।।
स्वभावोत्कृष्टसद्भावः कृष्णाष्टम्यंतसंभवः ।प्राजापत्यर्क्षसंभूतो निशीथसमयोदितः ।। ९ ।।
शंखचक्रगदापद्मपाणिः पद्मनिभेक्षणः ।किरीटी कौस्तुभोरस्कः स्फुरन्मकरकुंडलः ।। १० ।।
पीतवासा घनश्यामः कुंचितांचितकुंतलः ।सुव्यक्तव्यक्ताभरणः सूतिकागृहभूषणः ।। ११ ।।
कारागारांधकारघ्नः पितृप्राग्जन्मसूचकः ।वसुदेवस्तुतः स्तोत्रं तापत्रयनिवारणः ।। १२ ।।
निरवद्यः क्रियामूर्तिर्न्यायवाक्यनियोजकः ।अदृष्टचेष्टः कूटस्थो धृतलौकिकविग्रहः ।। १३ ।।
महर्षिमानसोल्लासो महीमंगळदायकः ।संतोषितसुरव्रातः साधुचित्तप्रसादकः ।। १४ ।।
जनकोपायनिर्देष्टा देवकीनयनोत्सवः ।पितृपाणिपरिष्कारो मोहितागाररक्षकः ।। १५ ।।
स्वशक्त्युद्घाटिताशेषकपाटः पितृवाहकः ।शेषोरगफणाच्छत्रः शेषोक्ताख्यासहस्रकः ।। १६ ।।
यमुनापूरविध्वंसी स्वभासोद्भासितव्रजः ।कृतात्मविद्याविन्यासो योगमायाग्रसंभवः ।। १७ ।।
दुर्गानिवेदितोद्भावो यशोदातल्पशायकः ।नंदगोपोत्सवस्फूर्तिर्व्रजानंदकरोदयः ।। १८ ।।
सुजातजातकर्मश्रीर्गोपीभद्रोक्तिनिर्वृतः ।अलीकनिद्रोपगमः पूतनास्तनपीडनः ।। १९ ।।
स्तन्यात्तपूतनाप्राणः पूतनाक्रोशकारकः ।विन्यस्तरक्षागोधूळिर्यशोदाकरलालितः ।। २० ।।
नंदाघ्रातशिरोमध्यः पूतनासुगतिप्रदः ।बालः पर्यंकनिद्राळुर्मुखार्पितपदांगुळिः ।। २१ ।।
अंजनस्निग्धनयनः पर्यायांकुरितस्मितः ।लीलाक्षस्तरळालोकः शकटासुरभंजनः ।। २२ ।।
द्विजोदितस्वस्त्ययनो मंत्रपूतजलाप्लुतः ।यशोदोत्संगपर्यंको यशोदामुखवीक्षकः ।। २३ ।।
यशोदास्तन्यमुदितस्तृणावर्तादिदुस्सहः ।तृणावर्तासुरध्वंसी मातृविस्मयकारकः ।। २४ ।।
प्रशस्तनामकरणो जानुचंक्रमणोत्सुकः ।व्यालंबिचूलिकारत्नो घोषगोपप्रहर्षणः ।। २५ ।।
स्वमुखप्रतिबिंबार्थी ग्रीवाव्याघ्रनखोज्ज्वलः ।पंकानुलेपरुचिरो मांसलोरुकटीतटः ।। २६ ।।
घृष्टजानुकरद्वंद्वः प्रतिबिंबानुकारकृत् ।अव्यक्तवर्णवाग्वृत्तिः स्मितलक्ष्यरदोद्गमः ।। २७ ।।
धात्रीकरसमालंबी प्रस्खलच्चित्रचंक्रमः ।अनुरूपवयस्याढ्यश्चारुकौमारचापलः ।। २८ ।।
वत्सपुच्छसमाकृष्टो वत्सपुच्छविकर्षणः ।विस्मारितान्यव्यापारो गोपगोपीमुदावहः ।। २९ ।।
अकालवत्सनिर्मोक्ता व्रजव्याक्रोशसुस्मितः ।नवनीतमहाचोरो दारकाहारदायकः ।। ३० ।।
पीठोलूखलसोपानः क्षीरभांडविभेदनः ।शिक्यभांडसमाकर्षी ध्वांतागारप्रवेशकृत् ।। ३१ ।।
भूषारत्नप्रकाशाढ्यो गोप्युपालंभभर्त्सितः ।परागधूसराकारो मृद्भक्षणकृतेक्षणः ।। ३२ ।।
बालोक्तमृत्कथारंभो मित्रांतर्गूढविग्रहः ।कृतसंत्रासलोलाक्षो जननीप्रत्ययावहः ।। ३३।।
मातृदृश्यात्तवदनो वक्त्रलक्ष्यचराचरः ।यशोदालालितस्वात्मा स्वयं स्वाच्छंद्यमोहनः ।। ३४ ।।
सवित्रीस्नेहसंश्लिष्टः सवित्रीस्तनलोलुपः ।नवनीतार्थनाप्रह्वो नवनीतमहाशनः ।। ३५ ।।
मृषाकोपप्रकंपोष्ठो गोष्ठांगणविलोकनः ।दधिमंथघटीभेत्ता किंकिणीक्वाणसूचितः ।। ३६ ।।
हैयंगवीनरसिको मृषाश्रुश्चौर्यशंकितः ।जननीश्रमविज्ञाता दामबंधनियंत्रितः ।। ३७ ।।
दामाकल्पश्चलापांगो गाढोलूखलबंधनः ।आकृष्टोलूखलोऽनंतः कुबेरसुतशापवित् ।। ३८ ।।
नारदोक्तिपरामर्शी यमळार्जुनभंजनः ।धनदात्मजसंघुष्टो नंदमोचितबंधनः ।। ३९ ।।
बालकोद्गीतनिरतो बाहुक्षेपोदितप्रियः ।आत्मज्ञो मित्रवशगो गोपीगीतगुणोदयः ।। ४० ।।
प्रस्थानशकटारूढो बृंदावनकृतालयः ।गोवत्सपालनैकाग्रो नानाक्रीडापरिच्छदः ।। ४१ ।।
क्षेपणीक्षेपणप्रीतो वेणुवाद्यविशारदः ।वृषवत्सानुकरणो वृषध्वानविडंबनः ।। ४२ ।।
नियुद्धलीलासंहृष्टः कूजानुकृतकोकिलः ।उपात्तहंसगमनः सर्वजंतुरुतानुकृत् ।। ४३ ।।
भृंगानुकारी दध्यन्नचोरो वत्सपुरस्सरः ।बली बकासुरग्राही बकतालुप्रदाहकः ।। ४४ ।।
भीतगोपार्भकाहूतो बकचंचुविदारणः ।बकासुरारिर्गोपालो बालो बालाद्भुतावहः ।। ४५ ।।
बलभद्रसमाश्लिष्टः कृतक्रीडानिलायनः ।क्रीडासेतुनिधानज्ञः प्लवंगोत्प्लवनोऽद्भुतः ।। ४६ ।।
कंदुकक्रीडनो लुप्तनंदादिभववेदनः ।सुमनोऽलंकृतशिराः स्वादुस्निग्धान्नशिक्यभृत् ।। ४७ ।।
गुंजाप्रालंबनच्छन्नः पिंछैरलकवेषकृत् ।वन्याशनप्रियः शृंगरवाकारितवत्सकः ।। ४८ ।।
मनोज्ञपल्लवोत्तंसपुष्पस्वेच्छात्तषट्पदः ।मंजुशिंजितमंजीरचरणः करकंकणः ।। ४९ ।।
अन्योन्यशासनः क्रीडापटुः परमकैतवः ।प्रतिध्वानप्रमुदितः शाखाचतुरचंक्रमः ।। ५० ।।
अघदानवसंहर्ता व्रजविघ्नविनाशनः ।व्रजसंजीवनः श्रेयोनिधिर्दानवमुक्तिदः ।। ५१ ।।
काळिंदीपुलिनासीनः सहभुक्तव्रजार्भकः ।कक्षाजठरविन्यस्तवेणुर्वल्लवचेष्टितः ।। ५२ ।।
भुजसंध्यंतरन्यस्तशृंगवेत्रः शुचिस्मितः ।वामपाणिस्थदध्यन्नकबळः कलभाषणः ।। ५३ ।।
अंगुळ्यंतरविन्यस्तफलः परमपावनः ।अदृश्यतर्णकान्वेषी वल्लवार्भकभीतिहा ।। ५४ ।।
अदृष्टवत्सपव्रातो ब्रह्मविज्ञातवैभवः ।गोवत्सवत्सपान्वेषी विराट्पुरुषविग्रहः ।। ५५ ।।
स्वसंकल्पानुरूपार्थवत्सवत्सपरूपधृत् ।यथावत्सक्रियारूपो यथास्थाननिवेशनः ।। ५६ ।।
यथाव्रजार्भकाकारो गोगोपीस्तन्यपः सुखी ।चिराद्बलोहितो दांतो ब्रह्मविज्ञातवैभवः ।। ५७ ।।
विचित्रशक्तिर्व्यालीनसृष्टगोवत्सवत्सपः ।ब्रह्मत्रपाकरो धातृस्तुतः सर्वार्थसाधकः ।। ५८ ।।
ब्रह्म ब्रह्ममयोऽव्यक्तस्तेजोरूपः सुखात्मकः ।निरुक्तं व्याकृतिर्व्यक्तो निरालंबनभावनः ।। ५९ ।।
प्रभविष्णुरतंत्रीको देवपक्षार्थरूपधृत् ।अकामः सर्ववेदादिरणीयः स्थूलरूपवान् ।। ६० ।।
व्यापी व्याप्यः कृपाकर्ता विचित्राचारसम्मतः ।छंदोमयः प्रधानात्मा मूर्तामूर्तद्वयाकृतिः ।। ६१ ।।
अनेकमूर्तिरक्रोधः परः प्रकृतिरक्रमः ।सकलावरणोपेतः सर्वदेवो महेश्वरः ।। ६२ ।।
महाप्रभावनः पूर्ववत्सवत्सपदर्शकः ।कृष्णयादवगोपालो गोपालोकनहर्षितः ।। ६३ ।।
स्मितेक्षाहर्षितब्रह्मा भक्तवत्सलवाक्प्रियः ।ब्रह्मानंदाश्रुधौतांघ्रिर्लीलावैचित्र्यकोविदः ।। ६४ ।।
बलभद्रैकहृदयो नामाकारितगोकुलः ।गोपालबालको भव्यो रज्जुयज्ञोपवीतवान् ।। ६५ ।।
वृक्षच्छायाहताशांतिर्गोपोत्संगोपबर्हणः ।गोपसंवाहितपदो गोपव्यजनवीजितः ।। ६६।गोपगानसुखोन्निद्रः श्रीदामार्जितसौहृदः ।सुनंदसुहृदेकात्मा सुबलप्राणरंजनः ।। ६७ ।।
तालीवनकृतक्रीडो बलपातितधेनुकः ।गोपीसौभाग्यसंभाव्यो गोधूळिच्छुरितालकः ।। ६८ ।।
गोपीविरहसंतप्तो गोपिकाकृतमज्जनः ।प्रलंबबाहुरुत्फुल्लपुंडरीकावतंसकः ।। ६९ ।।
विलासललितस्मेरगर्भलीलावलोकनः ।स्रग्भूषणानुलेपाढ्यो जनन्युपहृतान्नभुक् ।। ७० ।।
वरशय्याशयो राधाप्रेमसल्लापनिर्वृतः ।यमुनातटसंचारी विषार्तव्रजहर्षदः ।। ७१ ।।
काळियक्रोधजनकः वृद्धाहिकुलवेष्टितः ।काळियाहिफणारंगनटः काळियमर्दनः ।। ७२ ।।
नागपत्नीस्तुतिप्रीतो नानावेषसमृद्धिकृत् ।अविष्वक्तदृगात्मेशः स्वदृगात्मस्तुतिप्रियः ।। ७३ ।।
सर्वेश्वरः सर्वगुणः प्रसिद्धः सर्वसात्वतः ।अकुंठधामा चंद्रार्कदृष्टिराकाशनिर्मलः ।। ७४ ।।
अनिर्देश्यगतिर्नागवनितापतिभैक्षदः ।स्वांघ्रिमुद्रांकनागेंद्रमूर्धा काळियसंस्तुतः ।। ७५ ।।
अभयो विश्वतश्चक्षुः स्तुतोत्तमगुणः प्रभुः ।अहमात्मा मरुत्प्राणः परमात्मा द्युशीर्षवान् ।। ७६ ।।
नागोपायनहृष्टात्मा ह्रदोत्सारितकाळियः ।बलभद्रसुखालापो गोपालिंगननिर्वृतः ।। ७७ ।।
दावाग्निभीतगोपालगोप्ता दावाग्निनाशनः ।नयनाच्छादनक्रीडालंपटो नृपचेष्टितः ।। ७८ ।।
काकपक्षधरः सौम्यो बलवाहककेळिमान् ।बलघातितदुर्धर्षप्रलंबो बलवत्सलः ।। ७९ ।।
मुंजाटव्यग्निशमनः प्रावृट्कालविनोदवान् ।शिलान्यस्तान्नभृद्दैत्यसंहर्ता शाद्वलासनः ।। ८० ।।
सदाप्तगोपिकोद्गीतः कर्णिकारावतंसकः ।नटवेषधरः पद्ममालांको गोपिकावृतः ।। ८१ ।।
गोपीमनोहरापांगो वेणुवादनतत्परः ।विन्यस्तवदनांभोजश्चारुशब्दकृताननः ।। ८२ ।।
बिंबाधरार्पितोदारवेणुर्विश्वविमोहनः ।व्रजसंवर्णितः श्राव्यवेणुनादः श्रुतिप्रियः ।। ८३ ।।
गोगोपगोपीजन्मेप्सुब्रह्मेंद्राद्यभिवंदितः ।गीतस्रुतिसरित्पूरो नादनर्तितबर्हिणः ।। ८४ ।।
रागपल्लवितस्थाणुर्गीतानमितपादपः ।विस्मारिततृणग्रासमृगो मृगविलोभितः ।। ८५ ।।
व्याघ्रादिहिंस्रसहजवैरहर्ता सुगायनः ।गाढोदीरितगोबृंदप्रेमोत्कर्णिततर्णकः ।। ८६ ।।
निष्पंदयानब्रह्मादिवीक्षितो विश्ववंदितः ।शाखोत्कर्णशकुंतौघश्छत्रायितबलाहकः ।। ८७ ।।
प्रसन्नः परमानंदश्चित्रायितचराचरः ।गोपिकामदनो गोपीकुचकुंकुममुद्रितः ।। ८८ ।।
गोपकन्याजलक्रीडाहृष्टो गोप्यंशुकापहृत् ।स्कंधारोपितगोपस्त्रीवासाः कुंदनिभस्मितः ।। ८९ ।।
गोपीनेत्रोत्पलशशी गोपिकायाचितांशुकः ।गोपीनमस्क्रियादेष्टा गोप्येककरवंदितः ।। ९० ।।
गोप्यंजलिविशेषार्थी गोपक्रीडाविलोभितः ।शांतवासस्फुरद्गोपीकृतांजलिरघापहः ।। ९१ ।।
गोपीकेळिविलासार्थी गोपीसंपूर्णकामदः ।गोपस्त्रीवस्त्रदो गोपीचित्तचोरः कुतूहली ।। ९२ ।।
बृंदावनप्रियो गोपबंधुर्यज्वान्नयाचिता ।यज्ञेशो यज्ञभावज्ञो यज्ञपत्न्यभिवांछितः ।। ९३ ।।
मुनिपत्नीवितीर्णान्नतृप्तो मुनिवधूप्रियः ।द्विजपत्न्यभिभावज्ञो द्विजपत्नीवरप्रदः ।। ९४ ।।
प्रतिरुद्धसतीमोक्षप्रदो द्विजविमोहिता ।मुनिज्ञानप्रदो यज्वस्तुतो वासवयागवित् ।। ९५ ।।
पितृप्रोक्तक्रियारूपशक्रयागनिवारणः ।शक्राऽमर्षकरः शक्रवृष्टिप्रशमनोन्मुखः ।। ९६ ।।
गोवर्धनधरो गोपगोबृंदत्राणतत्परः ।गोवर्धनगिरिच्छत्रचंडदंडभुजार्गळः ।। ९७ ।।
सप्ताहविधृताद्रींद्रो मेघवाहनगर्वहा ।भुजाग्रोपरिविन्यस्तक्ष्माधरक्ष्माभृदच्युतः ।। ९८ ।।
स्वस्थानस्थापितगिरिर्गोपीदध्यक्षतार्चितः ।सुमनः सुमनोवृष्टिहृष्टो वासववंदितः ।। ९९ ।।
कामधेनुपयःपूराभिषिक्तः सुरभिस्तुतः ।धरांघ्रिरोषधीरोमा धर्मगोप्ता मनोमयः ।। १०० ।।
ज्ञानयज्ञप्रियः शास्त्रनेत्रः सर्वार्थसारथिः ।ऐरावतकरानीतवियद्गंगाप्लुतो विभुः ।। १०१ ।।
ब्रह्माभिषिक्तो गोगोप्ता सर्वलोकशुभंकरः ।सर्ववेदमयो मग्ननंदान्वेषी पितृप्रियः ।। १०२ ।।
वरुणोदीरितात्मेक्षाकौतुको वरुणार्चितः ।वरुणानीतजनको गोपज्ञातात्मवैभवः ।। १०३ ।।
स्वर्लोकालोकसंहृष्टगोपवर्गस्त्रिवर्गदः ।ब्रह्महृद्गोपितो गोपद्रष्टा ब्रह्मपदप्रदः ।। १०४ ।।
शरच्चंद्रविहारोत्कः श्रीपतिर्वशकः क्षमः ।भयापहो भर्तृरुद्धगोपिकाध्यानगोचरः ।। १०५ ।।
गोपिकानयनास्वाद्यो गोपीनर्मोक्तिनिर्वृतः ।गोपिकामानहरणो गोपिकाशतयूथपः ।। १०६ ।।
वैजयंतीस्रगाकल्पो गोपिकामानवर्धनः ।गोपकांतासुनिर्देष्टा कांतो मन्मथमन्मथः ।। १०७ ।।
स्वात्मास्यदत्ततांबूलः फलितोत्कृष्टयौवनः ।वल्लवीस्तनसक्ताक्षो वल्लवीप्रेमचालितः ।। १०८ ।।
गोपीचेलांचलासीनो गोपीनेत्राब्जषट्पदः ।रासक्रीडासमासक्तो गोपीमंडलमंडनः ।। १०९ ।।
गोपीहेममणिश्रेणिमध्येंद्रमणिरुज्ज्वलः ।विद्याधरेंदुशापघ्नः शंखचूडशिरोहरः ।। ११० ।।
शंखचूडशिरोरत्नसंप्रीणितबलोऽनघः ।अरिष्टारिष्टकृद्दुष्टकेशिदैत्यनिषूदनः ।। १११ ।।
सरसः सस्मितमुखः सुस्थिरो विरहाकुलः ।संकर्षणार्पितप्रीतिरक्रूरध्यानगोचरः ।। ११२ ।।
अक्रूरसंस्तुतो गूढो गुणवृत्त्युपलक्षितः ।प्रमाणगम्यस्तन्मात्रावयवी बुद्धितत्परः ।। ११३ ।।
सर्वप्रमाणप्रमथी सर्वप्रत्ययसाधकः ।पुरुषश्च प्रधानात्मा विपर्यासविलोचनः ।। ११४ ।।
मधुराजनसंवीक्ष्यो रजकप्रतिघातकः ।विचित्रांबरसंवीतो मालाकारवरप्रदः ।। ११५ ।।
कुब्जावक्रत्वनिर्मोक्ता कुब्जायौवनदायकः ।कुब्जांगरागसुरभिः कंसकोदंडखंडनः ।। ११६ ।।
धीरः कुवलयापीडमर्दनः कंसभीतिकृत् ।दंतिदंतायुधो रंगत्रासको मल्लयुद्धवित् ।। ११७ ।।
चाणूरहंता कंसारिर्देवकीहर्षदायकः ।वसुदेवपदानम्रः पितृबंधविमोचनः ।। ११८ ।।
उर्वीभयापहो भूप उग्रसेनाधिपत्यदः ।आज्ञास्थितशचीनाथः सुधर्मानयनक्षमः ।। ११९ ।।
आद्यो द्विजातिसत्कर्ता शिष्टाचारप्रदर्शकः ।सांदीपनिकृताभ्यस्तविद्याभ्यासैकधीस्सुधीः ।। १२० ।।
गुर्वभीष्टक्रियादक्षः पश्चिमोदधिपूजितः ।हतपंचजनप्राप्तपांचजन्यो यमार्चितः ।। १२१ ।।
धर्मराजजयानीतगुरुपुत्र उरुक्रमः ।गुरुपुत्रप्रदः शास्ता मधुराजनमानदः ।। १२२ ।।
जामदग्न्यसमभ्यर्च्यो गोमंतगिरिसंचरः ।गोमंतदावशमनो गरुडानीतभूषणः ।। १२३ ।।
चक्राद्यायुधसंशोभी जरासंधमदापहः ।सृगालावनिपालघ्नः सृगालात्मजराज्यदः ।। १२४ ।।
विध्वस्तकालयवनो मुचुकुंदवरप्रदः ।आज्ञापितमहांभोधिर्द्वारकापुरकल्पनः ।। १२५ ।।
द्वारकानिलयो रुक्मिमानहंता यदूद्वहः ।रुचिरो रुक्मिणीजानिः प्रद्युम्नजनकः प्रभुः ।। १२६ ।।
अपाकृतत्रिलोकार्तिरनिरुद्धपितामहः ।अनिरुद्धपदान्वेषी चक्री गरुडवाहनः ।। १२७ ।।
बाणासुरपुरीरोद्धा रक्षाज्वलनयंत्रजित् ।धूतप्रमथसंरंभो जितमाहेश्वरज्वरः ।। १२८ ।।
षट्चक्रशक्तिनिर्जेता भूतभेताळमोहकृत् ।शंभुत्रिशूलजिच्छंभुजृंभणः शंभुसंस्तुतः ।। १२९ ।।
इंद्रियात्मेंदुहृदयः सर्वयोगेश्वरेश्वरः ।हिरण्यगर्भहृदयो मोहावर्तनिवर्तनः ।। १३० ।।
आत्मज्ञाननिधिर्मेधाकोशस्तन्मात्ररूपवान् ।इंद्रोऽग्निवदनः कालनाभः सर्वागमाध्वगः ।। १३१ ।।
तुरीयसर्वधीसाक्षी द्वंद्वारामात्मदूरगः ।अज्ञातपारो वश्यश्रीरव्याकृतविहारवान् ।। १३२ ।।
आत्मप्रदीपो विज्ञानमात्रात्मा श्रीनिकेतनः ।बाणबाहुवनच्छेत्ता महेंद्रप्रीतिवर्धनः ।। १३३ ।।
अनिरुद्धनिरोधज्ञो जलेशाहृतगोकुलः ।जलेशविजयी वीरः सत्राजिद्रत्नयाचकः ।। १३४ ।।
प्रसेनान्वेषणोद्युक्तो जांबवद्धृतरत्नदः ।जितर्क्षराजतनयाहर्ता जांबवतीप्रियः ।। १३५ ।।
सत्यभामाप्रियः कामः शतधन्वशिरोहरः ।काळिंदीपतिरक्रूरबंधुरक्रूररत्नदः ।। १३६ ।।
कैकेयीरमणो भद्राभर्ता नाग्नजितीधवः ।माद्रीमनोहरः शैब्याप्राणबंधुरुरुक्रमः ।। १३७ ।।
सुशीलादयितो मित्रविंदानेत्रमहोत्सवः ।लक्ष्मणावल्लभो रुद्धप्राग्ज्योतिषमहापुरः ।। १३८ ।।
सुरपाशावृतिच्छेदी मुरारिः क्रूरयुद्धवित् ।हयग्रीवशिरोहर्ता सर्वात्मा सर्वदर्शनः ।। १३९ ।।
नरकासुरविच्छेत्ता नरकात्मजराज्यदः ।पृथ्वीस्तुतः प्रकाशात्मा हृद्यो यज्ञफलप्रदः ।। १४० ।।
गुणग्राही गुणद्रष्टा गूढस्वात्मा विभूतिमान् ।कविर्जगदुपद्रष्टा परमाक्षरविग्रहः ।। १४१ ।।
प्रपन्नपालनो माली महद्ब्रह्मविवर्धनः ।वाच्यवाचकशक्त्यर्थः सर्वव्याकृतसिद्धिदः ।। १४२ ।।
स्वयंप्रभुरनिर्वेद्यः स्वप्रकाशश्चिरंतनः ।नादात्मा मंत्रकोटीशो नानावादनिरोधकः ।। १४३ ।।
कंदर्पकोटिलावण्यः परार्थैकप्रयोजकः ।अमरीकृतदेवौघः कन्यकाबंधमोचनः ।। १४४ ।।
षोडशस्त्रीसहस्रेशः कांतः कांतामनोभवः ।क्रीडारत्नाचलाहर्ता वरुणच्छत्रशोभितः ।। १४५ ।।
शक्राभिवंदितः शक्रजननीकुंडलप्रदः ।अदितिप्रस्तुतस्तोत्रो ब्राह्मणोद्घुष्टचेष्टनः ।। १४६ ।।
पुराणस्संयमी जन्मालिप्तः षड्विंशकोऽर्थदः ।यशस्यनीतिराद्यंतरहितः सत्कथाप्रियः ।। १४७ ।।
ब्रह्मबोधः परानंदः पारिजातापहारकः ।पौंड्रकप्राणहरणः काशिराजनिषूदनः ।। १४८ ।।
कृत्यागर्वप्रशमनो विचक्रवधदीक्षितः ।कंसविध्वंसनः सांबजनको डिंभकार्दनः ।। १४९ ।।
मुनिर्गोप्ता पितृवरप्रदः सवनदीक्षितः ।रथी सारथ्यनिर्देष्टा फाल्गुनः फाल्गुनिप्रियः ।। १५० ।।
सप्ताब्धिस्तंभनोद्भूतो हरिः सप्ताब्धिभेदनः ।आत्मप्रकाशः पूर्णश्रीरादिनारायणेक्षितः ।। १५१ ।।
विप्रपुत्रप्रदश्चैव सर्वमातृसुतप्रदः ।पार्थविस्मयकृत्पार्थप्रणवार्थप्रबोधनः ।। १५२ ।।
कैलासयात्रासुमुखो बदर्याश्रमभूषणः ।घंटाकर्णक्रियामौढ्यात्तोषितो भक्तवत्सलः ।। १५३ ।।
मुनिबृंदादिभिर्ध्येयो घंटाकर्णवरप्रदः ।तपश्चर्यापरश्चीरवासाः पिंगजटाधरः ।। १५४ ।।
प्रत्यक्षीकृतभूतेशः शिवस्तोता शिवस्तुतः ।कृष्णास्वयंवरालोककौतुकी सर्वसम्मतः ।। १५५ ।।
बलसंरंभशमनो बलदर्शितपांडवः ।यतिवेषार्जुनाभीष्टदायी सर्वात्मगोचरः ।। १५६ ।।
सुभद्राफाल्गुनोद्वाहकर्ता प्रीणितफाल्गुनः ।खांडवप्रीणितार्चिष्मान्मयदानवमोचनः ।। १५७ ।।
सुलभो राजसूयार्हयुधिष्ठिरनियोजकः ।भीमार्दितजरासंधो मागधात्मजराज्यदः ।। १५८ ।।
राजबंधननिर्मोक्ता राजसूयाग्रपूजनः ।चैद्याद्यसहनो भीष्मस्तुतः सात्वतपूर्वजः ।। १५९ ।।
सर्वात्मार्थसमाहर्ता मंदराचलधारकः ।यज्ञावतारः प्रह्लादप्रतिज्ञाप्रतिपालकः ।। १६० ।।
बलियज्ञसभाध्वंसी दृप्तक्षत्रकुलांतकः ।दशग्रीवांतको जेता रेवतीप्रेमवल्लभः ।। १६१ ।।
सर्वावताराधिष्ठाता वेदबाह्यविमोहनः ।कलिदोषनिराकर्ता दशनामा दृढव्रतः ।। १६२ ।।
अमेयात्मा जगत्स्वामी वाग्मी चैद्यशिरोहरः ।द्रौपदीरचितस्तोत्रः केशवः पुरुषोत्तमः ।। १६३ ।।
नारायणो मधुपतिर्माधवो दोषवर्जितः ।गोविंदः पुंडरीकाक्षो विष्णुश्च मधुसूदनः ।। १६४ ।।
त्रिविक्रमस्त्रिलोकेशो वामनः श्रीधरः पुमान् ।हृषीकेशो वासुदेवः पद्मनाभो महाह्रदः ।। १६५ ।।
दामोदरश्चतुर्व्यूहः पांचालीमानरक्षणः ।साल्वघ्नस्समरश्लाघी दंतवक्त्रनिबर्हणः ।। १६६ ।।
दामोदरप्रियसखः पृथुकास्वादनप्रियः ।घृणी दामोदरः श्रीदो गोपीपुनरवेक्षकः ।। १६७ ।।
गोपिकामुक्तिदो योगी दुर्वासस्तृप्तिकारकः ।अविज्ञातव्रजाकीर्णपांडवालोकनो जयी ।। १६८ ।।
पार्थसारथ्यनिरतः प्राज्ञः पांडवदौत्यकृत् ।विदुरातिथ्यसंतुष्टः कुंतीसंतोषदायकः ।। १६९ ।।
सुयोधनतिरस्कर्ता दुर्योधनविकारवित् ।विदुराभिष्ठुतो नित्यो वार्ष्णेयो मंगळात्मकः ।। १७० ।।
पंचविंशतितत्त्वेशश्चतुर्विंशतिदेहभाक् ।सर्वानुग्राहकः सर्वदाशार्हसततार्चितः ।। १७१ ।।
अचिंत्यो मधुरालापः साधुदर्शी दुरासदः ।मनुष्यधर्मानुगतः कौरवेंद्रक्षयेक्षिता ।। १७२ ।।
उपेंद्रो दानवारातिरुरुगीतो महाद्युतिः ।ब्रह्मण्यदेवः श्रुतिमान् गोब्राह्मणहिताशयः ।। १७३ ।।
वरशीलः शिवारंभः सुविज्ञानविमूर्तिमान् ।स्वभावशुद्धः सन्मित्रः सुशरण्यः सुलक्षणः ।। १७४ ।।
धृतराष्ट्रगतो दृष्टिप्रदः कर्णविभेदनः ।प्रतोदधृद्विश्वरूपविस्मारितधनंजयः ।। १७५ ।।
सामगानप्रियो धर्मधेनुर्वर्णोत्तमोऽव्ययः ।चतुर्युगक्रियाकर्ता विश्वरूपप्रदर्शकः ।। १७६ ।।
ब्रह्मबोधपरित्रातपार्थो भीष्मार्थचक्रभृत् ।अर्जुनायासविध्वंसी कालदंष्ट्राविभूषणः ।। १७७ ।।
सुजातानंतमहिमा स्वप्नव्यापारितार्जुनः ।अकालसंध्याघटनश्चक्रांतरितभास्करः ।। १७८ ।।
दुष्टप्रमथनः पार्थप्रतिज्ञापरिपालकः ।सिंधुराजशिरःपातस्थानवक्ता विवेकदृक् ।। १७९ ।।
सुभद्राशोकहरणो द्रोणोत्सेकादिविस्मितः ।पार्थमन्युनिराकर्ता पांडवोत्सवदायकः ।। १८० ।।
अंगुष्ठाक्रांतकौंतेयरथः शक्तोऽहिशीर्षजित् ।कालकोपप्रशमनो भीमसेनजयप्रदः ।। १८१ ।।
अश्वत्थामवधायासत्रातपांडुसुतः कृती ।इषीकास्त्रप्रशमनो द्रौणिरक्षाविचक्षणः ।। १८२ ।।
पार्थापहारितद्रौणिचूडामणिरभंगुरः ।धृतराष्ट्रपरामृष्टभीमप्रतिकृतिस्मयः ।। १८३ ।।
भीष्मबुद्धिप्रदः शांतः शरच्चंद्रनिभाननः ।गदाग्रजन्मा पांचालीप्रतिज्ञापरिपालकः ।। १८४ ।।
गांधारीकोपदृग्गुप्तधर्मसूनुरनामयः ।प्रपन्नार्तिभयच्छेत्ता भीष्मशल्यव्यथापहः ।। १८५ ।।
शांतः शांतनवोदीर्णसर्वधर्मसमाहितः ।स्मारितब्रह्मविद्यार्थप्रीतपार्थो महास्त्रवित् ।। १८६ ।।
प्रसादपरमोदारो गांगेयसुगतिप्रदः ।विपक्षपक्षक्षयकृत्परीक्षित्प्राणरक्षणः ।। १८७ ।।
जगद्गुरुर्धर्मसूनोर्वाजिमेधप्रवर्तकः ।विहितार्थाप्तसत्कारो मासकात्परिवर्तदः ।। १८८ ।।
उत्तंकहर्षदात्मीयदिव्यरूपप्रदर्शकः ।जनकावगतस्वोक्तभारतः सर्वभावनः ।। १८९ ।।
असोढयादवोद्रेको विहिताप्तादिपूजनः ।समुद्रस्थापिताश्चर्यमुसलो वृष्णिवाहकः ।। १९० ।।
मुनिशापायुधः पद्मासनादित्रिदशार्थितः ।सृष्टिप्रत्यवहारोत्कः स्वधामगमनोत्सुकः ।। १९१ ।।
प्रभासालोकनोद्युक्तो नानाविधनिमित्तकृत् ।सर्वयादवसंसेव्यः सर्वोत्कृष्टपरिच्छदः ।। १९२ ।।
वेलाकाननसंचारी वेलानिलहृतश्रमः ।कालात्मा यादवोऽनंतः स्तुतिसंतुष्टमानसः ।। १९३ ।।
द्विजालोकनसंतुष्टः पुण्यतीर्थमहोत्सवः ।सत्काराह्लादिताशेषभूसुरः सुरवल्लभः ।। १९४ ।।
पुण्यतीर्थाप्लुतः पुण्यः पुण्यदस्तीर्थपावनः ।विप्रसात्कृतगोकोटिः शतकोटिसुवर्णदः ।। १९५ ।।
स्वमायामोहिताशेषवृष्णिवीरो विशेषवित् ।जलजायुधनिर्देष्टा स्वात्मावेशितयादवः ।। १९६ ।।
देवताभीष्टवरदः कृतकृत्यः प्रसन्नधीः ।स्थिरशेषायुतबलः सहस्रफणिवीक्षणः ।। १९७ ।।
ब्रह्मवृक्षवरच्छायासीनः पद्मासनस्थितः ।प्रत्यगात्मा स्वभावार्थः प्रणिधानपरायणः ।। १९८ ।।
व्याधेषुविद्धपूज्यांघ्रिर्निषादभयमोचनः ।पुलिंदस्तुतिसंतुष्टः पुलिंदसुगतिप्रदः ।। १९९ ।।
दारुकार्पितपार्थादिकरणीयोक्तिरीशिता ।दिव्यदुंदुभिसंयुक्तः पुष्पवृष्टिप्रपूजितः ।। २०० ।।
पुराणः परमेशानः पूर्णभूमा परिष्टुतः ।शुकवागमृताब्धींदुः गोविंदो योगिनां पतिः ।। २०१ ।।
वसुदेवात्मजः पुण्यो लीलामानुषविग्रहः ।जगद्गुरुर्जगन्नाथो गीतामृतमहोदधिः ।। २०२ ।।
पुण्यश्लोकस्तीर्थपादो वेदवेद्यो दयानिधिः ।नारायणो यज्ञमूर्तिः पन्नगाशनवाहनः ।पतिराद्यः परं ब्रह्म परमात्मा परात्परः ।। २०३ ।।
श्रीपरमात्मा परात्परः ओं नमः इति ।।
– फलश्रुतिः –
इदं सहस्रं कृष्णस्य नाम्नां सर्वार्थदायकम् ।अनंतरूपी भगवान् व्याख्याताऽऽदौ स्वयंभुवे ।। २०४ ।।
तेन प्रोक्तं वसिष्ठाय ततो लब्धा पराशरः ।व्यासाय तेन संप्रोक्तं शुको व्यासादवाप्तवान् ।। २०५ ।।
तच्छिष्यैर्बहुभिर्भूमौ ख्यापितं द्वापरे युगे ।कृष्णाज्ञया हरिहरः कलौ प्राख्यापयद्विभुः ।। २०६ ।।
इदं पठति भक्त्या यः शृणोति च समाहितः ।स्वसिद्ध्यै प्रार्थयंत्येनं तीर्थक्षेत्रादिदेवताः ।। २०७ ।।
प्रायश्चित्तान्यशेषाणि नालं यानि व्यपोहितुम् ।तानि पापानि नश्यंति सकृदस्य प्रशंसनात् ।। २०८ ।।
ऋणत्रयविमुक्तस्य श्रौतस्मार्तानुवर्तिनः ।ऋषेस्त्रिमूर्तिरूपस्य फलं विंदेदिदं पठन् ।। २०९ ।।
इदं नामसहस्रं यः पठत्येतच्छृणोति च ।शिवलिंगसहस्रस्य स प्रतिष्ठाफलं लभेत् ।। २१० ।।
इदं किरीटी संजप्य जयी पाशुपतास्त्रभाक् ।कृष्णस्य प्राणभूतः सन् कृष्णं सारथिमाप्तवान् ।। २११ ।।
द्रौपद्या दमयंत्या च सावित्र्या च सुशीलया ।दुरितानि जितान्येतज्जपादाप्तं च वांछितम् ।। २१२ ।।
किमिदं बहुना शंसन्मानवो मोदनिर्भरः ।ब्रह्मानंदमवाप्यांते कृष्णसायूज्यमाप्नुयात् ।। २१३ ।।
इति श्रीविष्णुधर्मोत्तर पुराणे श्री कृष्ण सहस्रनाम स्तोत्रम् ।।
विप्रुलकु, द्विजुलकु विज्ञप्ति :मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वेळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
Chant other stotras inतेलुगु,ಕನ್ನಡ,தமிழ்,देवनागरी,english.