Sri Ganesha Bahya Puja

तॆलुगु
स्तोत्रनिधि
श्री गणेश स्तोत्रालु
ऐल उवाच |
बाह्यपूजां वद विभो गृत्समदप्रकीर्तिताम् |
तेन मार्गेण विघ्नेशं भजिष्यसि निरंतरम् ||

गार्ग्य उवाच |
आदौ च मानसीं पूजां कृत्वा गृत्समदो मुनिः |
बाह्यां चकार विधिवत्तां शृणुष्व सुखप्रदाम् ||

हृदि ध्यात्वा गणेशानं परिवारादिसंयुतम् |
नासिकारंध्रमार्गेण तं बाह्यांगं चकार ह ||

आदौ वैदिकमंत्रं स गणानां त्वेति संपठन् |
पश्चाच्छ्लोकं समुच्चार्य पूजयामास विघ्नपम् ||

गृत्समद उवाच |
चतुर्बाहुं त्रिनेत्रं च गजास्यं रक्तवर्णकम् |
पाशांकुशादिसंयुक्तं मायायुक्तं प्रचिंतयेत् ||

आगच्छ ब्रह्मणां नाथ सुराऽसुरवरार्चित |
सिद्धिबुद्ध्यादिसंयुक्त भक्तिग्रहणलालस ||

कृतार्थोऽहं कृतार्थोऽहं तवागमनतः प्रभो |
विघ्नेशानुगृहीतोऽहं सफलो मे भवोऽभवत् ||

रत्नसिंहासनं स्वामिन् गृहाण गणनायक |
तत्रोपविश्य विघ्नेश रक्ष भक्तान्विशेषतः ||

सुवासिताभिरद्भिश्च पादप्रक्षालनं प्रभो |
शीतोष्णांभः करोमि ते गृहाण पाद्यमुत्तमम् ||

सर्वतीर्थाहृतं तोयं सुवासितं सुवस्तुभिः |
आचमनं च तेनैव कुरुष्व गणनायक ||

रत्नप्रवालमुक्ताद्यैरनर्घ्यैः संस्कृतं प्रभो |
अर्घ्यं गृहाण हेरंब द्विरदानन तोषकम् ||

दधिमधुघृतैर्युक्तं मधुपर्कं गजानन |
गृहाण भावसंयुक्तं मया दत्तं नमोऽस्तु ते ||

पाद्ये च मधुपर्के च स्नाने वस्त्रोपधारणे |
उपवीते भोजनांते पुनराचमनं कुरु ||

चंपकाद्यैर्गणाध्यक्ष वासितं तैलमुत्तमम् |
अभ्यंगं कुरु सर्वेश लंबोदर नमोऽस्तु ते ||

यक्षकर्दमकाद्यैश्च विघ्नेश भक्तवत्सल |
उद्वर्तनं कुरुष्व त्वं मया दत्तैर्महाप्रभो ||

नानातीर्थजलैर्ढुंढे सुखोष्णभावरूपकैः |
कमंडलूद्भवैः स्नानं मया कुरु समर्पितैः ||

कामधेनुसमद्भूतं पयः परमपावनम् |
तेन स्नानं कुरुष्व त्वं हेरंब परमार्थवित् ||

पंचामृतानां मध्ये तु जलैः स्नानं पुनः पुनः |
कुरु त्वं सर्वतीर्थेभ्यो गंगादिभ्यः समाहृतैः ||

दधि धेनुपयोद्भूतं मलापहरणं परम् |
गृहाण स्नानकार्यार्थं विनायक दयानिधे ||

धेनोः समुद्भवं ढुंढे घृतं संतोषकारकम् |
महामलापघातार्थं तेन स्नानं कुरु प्रभो ||

सारघं संस्कृतं पूर्णं मधु मधुरसोद्भवम् |
गृहाण स्नानकार्यार्थं विनायक नमोऽस्तु ते ||

इक्षुदंडसमुद्भूतां शर्करां मलनाशिनीम् |
गृहाण गणनाथ त्वं तया स्नानं समाचर ||

यक्षकर्दमकाद्यैश्च स्नानं कुरु गणेश्वर |
आंत्यं मलहरं शुद्धं सर्वसौगंध्यकारकम् ||

ततो गंधाक्षतादींश्च दूर्वांकूरान्गजानन |
समर्पयामि स्वल्पांस्त्वं गृहाण परमेश्वर ||

ब्रह्मणस्पत्यसूक्तैश्च ह्येकविंशतिवारकैः |
अभिषेकं करोमि ते गृहाण द्विरदानन ||

तत आचमनं देव सुवासितजलेन च |
कुरुष्व गणनाथं त्वं सर्वतीर्थभवेन वै ||

वस्त्रयुग्मं गृहाण त्वमनर्घं रक्तवर्णकम् |
लोकलज्जाहरं चैव विघ्ननाथ नमोऽस्तु ते ||

उत्तरीयं सुचित्रं वै नभस्तारांकितं यथा |
गृहाण सर्वसिद्धीश मया दत्तं सुभक्तितः ||

उपवीतं गणाध्यक्ष गृहाण च ततः परम् |
त्रैगुण्यमयरूपं तु प्रणवग्रंथिबंधनम् ||

ततः सिंदूरकं देव गृहाण गणनायक |
अंगलेपनभावार्थं सदानंदविवर्धनम् ||

नानाभूषणकानि त्वमंगेषु विविधेषु च |
भासुरस्वर्णरत्नैश्च निर्मितानि गृहाण भो ||

अष्टगंधसमायुक्तं गंधं रक्तं गजानन |
द्वादशांगेषु ते ढुंढे लेपयामि सुचित्रवत् ||

रक्तचंदनसंयुक्तानथवा कुंकुमैर्युतान् |
अक्षतान्विघ्नराज त्वं गृहाण फालमंडले ||

चंपकादिसुवृक्षेभ्यः संभूतानि गजानन |
पुष्पाणि शमीमंदारदूर्वादीनि गृहाण च ||

दशांगं गुग्गुलुं धूपं सर्वसौरभकारकम् |
गृहाण त्वं मया दत्तं विनायक महोदर ||

नानाजातिभवं दीपं गृहाण गणनायक |
अज्ञानमलजं दीपं हरंतं ज्योतिरूपकम् ||

चतुर्विधान्नसंपन्नं मधुरं लड्डुकादिकम् |
नैवेद्यं ते मया दत्तं भोजनं कुरु विघ्नप ||

सुवासितं गृहाणेदं जलं तीर्थसमाहृतम् |
भुक्तिमध्ये च पानार्थं देवदेवेश ते नमः ||

भोजनांते करोद्वर्तं यक्षकर्दमकेन च |
कुरुष्व त्वं गणाध्यक्ष पिब तोयं सुवासितम् ||

दाडिमं खर्जुरं द्राक्षां रंभादीनि फलानि वै |
गृहाण देवदेवेश नानामधुरकाणि तु ||

अष्टांगं देव तांबूलं गृहाण मुखवासनम् |
असकृद्विघ्नराज त्वं मया दत्तं विशेषतः ||

दक्षिणां कांचनाद्यां तु नानाधातुसमुद्भवाम् |
रत्नाद्यैः संयुतां ढुंढे गृहाण सकलप्रिय ||

राजोपचारकाद्यानि गृहाण गणनायक |
दानानि तु विचित्राणि मया दत्तानि विघ्नप ||

तत आभरणं तेऽहमर्पयामि विधानतः |
उपचारैश्च विविधैः तेन तुष्टो भव प्रभो ||

ततो दूर्वांकुरान्ढुंढे एकविंशतिसंख्यकान् |
गृहाण न्यूनसिद्ध्यर्थं भक्तवात्सल्यकारणात् ||

नानादीपसमायुक्तं नीराजनं गजानन |
गृहाण भावसंयुक्तं सर्वाज्ञानविनाशन ||

गणानां त्वेति मंत्रस्य जपं साहस्रकं परम् |
गृहाण गणनाथ त्वं सर्वसिद्धिप्रदो भव ||

आर्तिक्यं च सुकर्पूरं नानादीपमयं प्रभो |
गृहाण ज्योतिषां नाथ तथा नीराजयाम्यहम् ||

पादयोस्ते तु चत्वारि नाभौ द्वे वदने प्रभो |
एकं तु सप्तवारं वै सर्वांगेषु निरंजनम् ||

चतुर्वेदभवैर्मंत्रैर्गाणपत्यैर्गजानन |
मंत्रितानि गृहाण त्वं पुष्पपत्राणि विघ्नप ||

पंचप्रकारकैः स्तोत्रैर्गाणपत्यैर्गणाधिप |
स्तौमि त्वां तेन संतुष्टो भव भक्तिप्रदायक ||

एकविंशतिसंख्यं वा त्रिसंख्यं वा गजानन |
प्रादक्षिण्यं गृहाण त्वं ब्रह्मन् ब्रह्मेशभावन ||

साष्टांगां प्रणतिं नाथ एकविंशतिसम्मिताम् |
हेरंब सर्वपूज्य त्वं गृहाण तु मया कृतम् ||

न्यूनातिरिक्तभावार्थं किंचिद्दुर्वांकुरान् प्रभो |
समर्पयामि तेन त्वं सांगां पूजां कुरुष्व ताम् ||

त्वया दत्तं स्वहस्तेन निर्माल्यं चिंतयाम्यहम् |
शिखायां धारयाम्येव सदा सर्वप्रदं च तत् ||

अपराधानसंख्यातान् क्षमस्व गणनायक |
भक्तं कुरु च मां ढुंढे तव पादप्रियं सदा ||

त्वं माता त्वं पिता मे वै सुहृत्संबंधिकादयः |
त्वमेव कुलदेवश्च सर्वं त्वं मे न संशयः ||

जाग्रत्स्वप्नसुषुप्तिभिर्देहवाङ्मनसैः कृतम् |
सांसर्गिकेण यत्कर्म गणेशाय समर्पये ||

बाह्यं नानाविधं पापं महोग्रं तल्लयं व्रजेत् |
गणेशपादतीर्थस्य मस्तके धारणात्किल ||

पादोदकं गणेशस्य पीतं मर्त्येन तत्क्षणात् |
सर्वांतर्गतजं पापं नश्यति गणनातिगम् ||

गणेशोच्छिष्टगंधं वै द्वादशांगेषु चर्चयेत् |
गणेशतुल्यरूपः स दर्शनात्सर्वपापहा ||

यदि गणेशपूजादौ गंधभस्मादिकं चरेत् |
अथवोच्छिष्टगंधं तु नो चेत्तत्र विधिं चरेत् ||

द्वादशांगेषु विघ्नेशं नाममंत्रेण चार्चयेत् |
तेन सोऽपि गणेशेन समो भवति भूतले ||

मूर्ध्नि गणेश्वरं चादौ ललाटे विघ्ननायकम् |
दक्षिणे कर्णमूले तु वक्रतुंडं समर्चयेत् ||

वामे कर्णस्य मूले वै चैकदंतं समर्चयेत् |
कंठे लंबोदरं देवं हृदि चिंतामणिं तथा ||

बाहौ दक्षिणके चैव हेरंबं वामबाहुके |
विकटं नाभिदेशे तु विनायकं समर्चयेत् ||

कुक्षौ दक्षिणगायां तु मयूरेशं समर्चयेत् |
वामकुक्षौ गजास्यं वै पृष्ठे स्वानंदवासिनम् ||

सर्वांगलेपनं शस्तं चित्रितमष्टगंधकैः |
गाणेशानां विशेषेण सर्वभद्रस्य कारणात् ||

ततोच्छिष्टं तु नैवेद्यं गणेशस्य भुनज्म्यहम् |
भुक्तिमुक्तिप्रदं पूर्णं नानापापनिकृंतनम् ||

गणेश स्मरणेनैव करोमि कालखंडनम् |
गाणपत्यैश्च संवासः सदा मेऽस्तु गजानन ||

गार्ग्य उवाच |
एवं गृत्समदश्चैव चकार बाह्यपूजनम् |
त्रिकालेषु महायोगी सदा भक्तिसमन्वितः ||

तथा कुरु महीपाल गाणपत्यो भविष्यसि |
यथा गृत्समदः साक्षात्तथा त्वमपि निश्चितम् ||

इति श्रीमदांत्ये मौद्गल्ये गणेश बाह्य पूजा |
मरिन्नि
श्री गणेश स्तोत्रालु
चूडंडि.
मा प्रचुरण:
श्री बगळामुखी स्तोत्रनिधि (तात्पर्य सहितं)
प्रिंटिंगु पूर्ति अयि कॊनुगोलुकु सिद्धंगा उंदि.
स्तोत्रनिधि (तॆलुगु) वाट्साप् छानल् :
मा तॆलुगु वाट्साप् छानल् नि फालो चेयडानिकि
इक्कड क्लिक् चेयंडि
"तॆलुगु"
विप्रुलकु, द्विजुलकु विज्ञप्ति :
मंत्र अनुष्ठानं लेक नेटि कालंलो धर्माचरण क्षीणिस्तू उन्नदि. दयचेसि मीकु उपदेशं उन्न मंत्रं कनीसं लक्ष जपं चेयंडि. मीकु अतिदग्गरलो उन्न देवालयानिकि प्रतिरोजू वॆळ्ळि अक्कडि देवत मंत्रान्नि कनीसं 108 जपंचेसि, आ देवत बलान्नि वृद्धि चेयंडि. देवत अनुग्रहं उंटेने आ प्रांतंलो धर्मं वर्धिल्लुतुंदि.
तॆलुगु